突然做左人地老豆，多左個女: 30

風和日麗，個太陽曬到落屎忽既夏天，最啱做啲乜？咁就梗係去海灘昅女！呀！唔係！係享受陽光與海灘！
 
阿南一早就揸架車過黎接小貞同我，小貞就call小海，而我就膽粗粗咁whatsapp左Yan……
 
「今日我地去海灘bbq, 你地一唔一齊?」
 
隔左幾個字，我幫小貞執好啲更換衣物、水樽、毛巾等等既裝備放入佢個背囊仔到，先見到Yan覆返我。
 
「sorry呀, 我今日要返工, 不過可唔可以帶埋瑜仔去? 本身我諗住帶佢去托兒所架, 我夜d放工再過黎得唔得?」
 


梗係得啦！
 
最後連家姐都自動請纓，話要黎埋一份。
 
阿南車左小貞同我，然後兜去車小海，小海著左一件紅色底黃色花花既吊帶連身裙，充滿夏日既陽光氣息。
 
小海跑左過黎，佢個印傭跟係後面，拎左好多袋野。
 
「小海，你嗰啲咩黎架？」阿南開左司機座位既窗問。
 


「食物呀！BBQ呀嘛！」小海好興趣咁哄埋阿南到講。
 
原來小海知道我地BBQ，一早就叫個印傭去買食物。
 
「小海呀，唔洗啦，我地等陣先一齊去買。」我道。
 
「吓……咁咪嘥左囉……」小海扁一扁嘴講。
 
「咁啦，小海你拎少少過黎，之後我地再一齊買啦。」阿南道。
 


「好耶！」小海興奮咁跳一跳，再哄埋去阿南到講：「都係南哥哥最好！」
 
超！
 
個印傭分左啲食物俾我地，自己又拎左幾袋返屋企，然後我、小貞同小海就三個人坐係後座。
 
「小海你係咪已經通知左你老豆老母架？」我問。
 
「係呀，洗唔洗我叫媽咪同你講呀？」小海眼超超咁同我講。
 
超！對住阿南就咁客氣，對住我就眼超超！
 
之後阿南兜左去瑜仔到，只見瑜仔同Yan已經係樓下等緊我地，瑜仔咩住個背囊仔，個樣呆下呆下咁，好似未訓醒。
 
「瑜仔就拜託你地啦！」Yan笑笑口咁講。


 
今日佢著左套OL　Look，白色短袖襯衫，黑色短裙襯黑絲，化左少少淡妝，依然係紮住條馬尾，美麗動人。
 
「你放心將瑜仔交俾我地啦。」我笑笑答。
 
「好啦，咁我夜啲會過黎海灘架啦，你地記得留返啲食物俾我。」
 
「好呀！」
 
「拜拜！」然後佢就笑住咁走左啦。
 
最後瑜仔同小海夾住小貞咁坐住左，我就俾佢地扔埋左一邊，隔離係瑜仔。
 
「喂，你地咁坐逼唔逼架？」阿南一邊揸車一邊問。
 


「南哥哥係咪想我坐係你隔離？」小海出哂水。
 
「唔係……」阿南好無奈咁。
 
最後，車埋家姐。
 
家姐想坐係後座，但發現已經滿哂。
 
「家姐，你坐係前面啦。」我道。
 
家姐好尷尬咁望一望阿南，然後話：「唔好啦，我自己坐巴士去啦。」
 
「唔洗啦，坐過黎啦。」阿南一直望住前面，唔敢望住家姐。
 
「嗯……」家姐紅都面哂咁點點頭。


 
我直覺話我知，佢地一定有啲野！
 
因為太早啦，小貞、小海同瑜仔三個細路一個挨住一個咁訓係車到，而阿南就開著左個電台，DJ就播緊首歌：
 
「眉目裡似哭不似哭 還祈求甚麼說不出
陪著你輕呼著煙圈 到唇邊 講不出滿足
你的溫柔怎可以捕捉 越來越近 卻從不接觸 La......
 
茶沒有喝光早變酸 從來未熱戀已相戀
陪著你天天在兜圈 那纏繞 怎麼可算短
你的衣裳今天我在穿 未留住你 卻仍然溫暖
 
徘徊在似苦又甜之間 望不穿這曖昧的眼
愛或情借來填一晚 終須都歸還 無謂多貪


猶疑在似即若離之間 望不穿這曖昧的眼
似是濃卻仍然很淡 天早灰藍 想告別 偏未晚」
 

 
伴隨著王菲既天籟之音，我地三個都無出聲，只係靜靜咁係車到聽歌。
 
話咁快，就到左海灘附近既街市。
 
「小海，你嗰到有啲咩食物？」阿南落左車問。
 
小海諗左諗，再答：「豬扒、雞扒、腸仔……仲有……仲有咩呢……」
 
小海個頭仔側一側，我地個個都企係到等佢個答案。
 
「好似仲有雞翼！無啦！」
 
「好啦，即係呢啲肉類我地唔洗買啦，我地去左買啲金菇菜、番薯同粟米先啦！」阿南道。
 
「好！」三個細路齊齊舉高雙手講。
 
阿南買野拎野，家姐就負責俾錢同記數，我就睇住三個細路。
 
「小貞你睇下！」小海指住左隻訓係生果檔附近既棕色肥貓仔講。
 
「喵喵！」小貞嗌。
 
隻貓本身訓左係地下，聽到小貞把比加超聲線，佢張開左眼望一望小貞，然後又合返埋眼。
 
三個細路走埋過去，小貞同小海就係到輕輕摸隻貓，隻肥貓一於懶理，任得佢地摸。
 
「小朋友，肥仔係咪好得意呢？」生果檔既老闆娘望左過黎，笑笑道。
 
小貞同小海都點點頭回應。
 
「不過肥仔好快就要走啦。」老闆娘嘆息道。
 
小貞同小海都唔明白老闆娘咩意思，側一側頭。
 
老闆娘嘆左一口氣，話：「食環署啲人話啲貓影響衛生，所以唔俾再養呀。」老闆娘一邊整理啲生果，一邊繼續講：「明明啲貓就可以趕老鼠，都唔明點解要趕盡殺絕！」
 
「咁隻貓遲啲會點？」我問。
 
「我地搵緊好人家去收養佢，你地有無興趣？」老闆娘問。
 
我擰擰頭，「唔啦，我地已經養左一隻。」
 
希望肥仔佢將來會有好人家肯收養佢。
 
家姐同阿南買完餸之後，我地再出發去超市買飲品。
 
「小貞想食啲乜？」我推住架超市購物車，問跟係我身後既小貞。
 
小貞眼仔碌碌咁諗左諗，但都諗唔到食乜。
 
「燒棉花糖啦！好好味架！」小海搶答。
 
「燒棉花糖？乜野黎架？」小貞天真咁問，似乎佢都未試過燒棉花糖食。
 
「好啦！一於試下燒棉花糖啦！」我興趣道，「咁瑜仔呢？想食啲乜？」
 
瑜仔又諗左諗，話：「朱古力……」
 
小海笑勁佢話：「傻仔！朱古力唔燒得架！」
 
我笑笑，「唔緊要啦，買埋朱古力食啦。」
 
最後家姐同阿南買左幾盒飲品、燒烤叉、煤等等既工具，我就買左棉花糖、麵包、朱古力同蜂蜜。
 
擺左啲野係架車到，我地又開始出發啦。
 
去到海灘，陽光與大海，小海即刻撲埋去，點知跌左一膠，搞到成臉都係沙。
 
我笑勁佢，小貞就慢慢咁扶返佢起身，家姐就幫佢掃走身上啲沙，好在無整傷。
 
好彩我地黎得早，好順利咁霸左個爐位，然後阿南就開始透爐啦，家姐就係另一邊擺好啲食物。
 
作為閑人既我，就梗係同班細路玩啦。
 
「喂！小海！行返入黎呀！」小海對住個海邊愈行愈出，我喝住左佢。
 
最乖係小貞，只係行去海邊，輕輕咁拍打啲海浪，然後格格聲咁笑。至於瑜仔，佢好似好驚咁，只係遠遠咁望住小貞同小海，唔敢行過去海邊。
 
「傑哥哥！瑜仔！一齊玩啦！」小貞笑住咁大嗌，陽光照住小貞，顯得佢特別開朗。
 
屌！仆街！唔記得幫佢地查防曬！
 
我即刻走去問家姐拎返支防曬，然後吱左啲落小貞同小海既手掌仔到，叫佢地互相幫對方查，而我就幫瑜仔查。
 
查查下，有人係到放狗，係隻金毛黎。
 
隻金毛沿住個海邊緩步走，一有海浪拍埋黎，佢就企定定等啲海浪拍濕自己，好鬼好笑。
 
小貞同小海走埋去隻金毛到，金毛fing一fing個身，身上啲毛飛起哂，仲潑到唔少水落小貞同小海既身上，然後兩個又格格聲咁笑。
 
「喂！食得啦！」家姐係遠方大嗌。
 
我拖住小貞，小貞拖住小海，小海拖住瑜仔，四個人齊齊行返去爐邊。
 
行到過去，阿南已經燒緊隻雞翼。
 
我地一人拎住一支叉，揀好食物之後就埋位燒啦。
 
小海同瑜仔都燒緊腸仔，小貞望一望我地，就拎左包棉花糖過黎。
 
「小貞呀，棉花糖留返最後先燒啦。」阿南笑笑道。
 
小貞點點頭，然後擺返好包棉花糖，我幫小貞揀左啲雞翼，然後同佢一齊燒。
 
家姐就忙緊用錫紙包好啲粟米、金菇菜同番薯。
 
阿南燒好隻雞翼，過去查左啲蜜糖，見家姐仲忙緊，就話：「你埋去燒啦，呢啲慢慢再搞。」
 
家姐尷尷尬尬咁回答：「唔啦，好快搞掂姐。」
 
然後阿南返返埋位燒，燒左一陣，佢拎左隻雞翼俾家姐，「食住先啦，你都餓啦。」
 
家姐有啲錯愕咁望住隻雞翼，然後紅都面哂。
 
然後阿南向隻雞翼吹左兩吹，等隻雞翼無咁熱之後，就將塊雞翼塞左落家姐個口到，家姐呆左咁，阿南就再叉啲雞翼繼續燒。
 
我覺得好好笑，忍笑忍得好辛苦。
 
「呀！！！」小海一嗌，原來佢燒燶左啲腸仔。
 
我繼續笑鳩佢，點知原來瑜仔都燒燶左啲腸仔。
 
可能佢地隻手都好細隻，兩隻手拎住支叉都好攰，最後我同阿南就幫佢地燒，佢地三個就係到玩。後來家姐擺好啲粟米、金菇菜同番薯係個爐側邊，就同我地一齊燒啦。
 
「小貞你睇下！」小海又發現左啲野。
 
原來佢係沙到發現左隻雙頭蟲。
 
「好核突呀！」小海大嗌，瑜仔就企埋一邊疑視住隻蟲，好似覺得好新奇有趣咁。
 
「唔係呀，幾得意。」小貞笑笑講。
 
小貞，你啲品味真夠特別。
 
三個細路嘻嘻哈哈咁玩完一輪之後，覺得肚餓就走左過黎食野。
 
小貞嘟住舊雞翼，梅下梅下咁，食得津津有味；小海粗粗魯魯咁一啖咬落去舊腸仔到，享受住外脆內軟既爽快感；而瑜仔就靜靜將條粟米一粒粒咁咬到好乾淨，三個細路都食得好滋味，我地都覺得好滿足。
 
食完之後，小貞又靜雞雞咁攬住包棉花糖過黎，睇黎佢真係好想食。
 
「好啦，我地燒棉花糖。」我笑笑道。
 
小貞笑到見牙唔見眼咁遞左包棉花糖過黎。
 
我將四舊棉花糖平均塞係支燒烤叉到，然後放係爐到燒，小貞眼甘甘咁望住啲棉花糖，好期待又好興奮，小海同瑜仔俾小貞感染左，兩個都好期待咁望住啲棉花糖。
 
無幾耐，我就將啲棉花糖燒到金金黃黃。
 
「哇！」小貞見到棉花糖由純白色變到金黃色，覺得好驚嘆。
 
小海想途手就拎走啲棉花糖，我即刻縮開左，「喂！熱呀！」
 
小海扁一扁嘴，放低左隻手。
 
我輕輕咁將啲棉花糖褪出黎，好順利、好完整咁，然後逐粒逐粒分俾佢地三個，小貞好珍而重之咁接過粒棉花糖，然後細細啖咁咬落去，佢感受到外面脆口裡面痴口既感覺，好滿足咁嘟下嘟下個嘴巴。
 
「傑哥哥我仲要！」小海好快就食完左，想要埋我手上最後嗰塊。
 
我唔俾佢，一啖吞左舊棉花糖落口。
 
「吼……」小海扮狗仔發惡咁兇我。
 
「得啦，再燒咪得囉。」我揮揮手道。
 
食下玩下，唔經唔覺已經入夜……屌！幣！掛住燒野俾佢地食，阿南同我都唔記得左昅女！
 
當我地搵返今次黎沙灘既目的時，沙灘已經開始慢慢咁少人。
 
然後，北川景子迎面走過黎，呀，唔係，嗰個係Yan黎！
 
佢換左件衫，著左件黑色緊身背心加一條短牛仔褲，露出佢修長而又白滑既美腿，成個裝扮都好青春好有活力。
 
佢氣喘喘咁跑左過黎，笑笑咁話：「餓死我啦。」
 
我笑笑，然後遞左我地幫佢留起啲食物俾佢。
 
「唔該哂你地呀！」佢笑笑回應，繼續話：「瑜仔有無俾麻煩你地？」
 
「無呀，佢好乖。」我答。
 
瑜仔見到Yan，就走埋去佢身邊。
 
Yan摸摸瑜仔個頭仔，好溫柔咁講：「瑜仔今日好叻喎，俾傑哥哥讚你乖！」
 
總係覺得Yan講「傑哥哥」時，感覺特別溫柔、特別好聽、特別舒服。
 
雖然今日無昅到女，但有北川景子望下，都總算補償左今日既失落。
 
我望過去小貞嗰邊，只見小海同小貞玩緊，唔見左阿南同家姐，我走左出去遠望個海，先發現原來兩個係海邊到散緊步。
 
我唔理佢地，返返去爐邊，陪住Yan食野。
 
「今日做野攰唔攰？」因為無話題，所以我求其搵啲野講。
 
Yan擰擰頭，笑住答：「一諗到收工可以見到瑜仔，我就好精神！」
 
「一個人湊瑜仔，唔辛苦咩？」
 
Yan又笑笑，「點會辛苦！你都一個人湊住小貞啦！」
 
「咁又係。」
 
我發現，Yan真係好鐘意笑，而且笑得好可愛。
 
「好多謝你地今日湊左瑜仔成日！」Yan好衷心咁望住我講。
 
「唔洗客氣！」
 
「係喎！今日你地俾左幾多錢？我俾返你地啦！」
 
「哦，家姐未計，計完我星期一再同你講啦！」
 
「好呀！唔該哂你！」
 
講完佢又靜靜地食野，簡單既對話、舒服既氣氛，成個感覺好溫馨。
 
無幾耐，家姐同阿南返返黎，家姐臉上多左一抹笑容，係一抹好甜好甜既笑容。
 
我向阿南打一打眼色，心裡諗住：你搞咩黎？
 
點知阿南條仆街仔擰埋一邊唔理我。
 
我無癮，無得食花生，唯有擰返轉臉唔理佢地。
 
Yan食完之後，再同三個細路玩左一陣，無幾耐大家都覺得攰啦，大家收拾好啲野之後就坐阿南車返去。
 
因為家姐坐左係阿南隔離，後面就變左我、小貞、小海、瑜仔同Yan坐住。我攬住左小貞坐，Yan就攬住瑜仔，希望唔好咁逼。
 
Yan坐住我隔離，我地兩個既手臂時不時都會互相撞到，而Yan總會笑笑咁同我講唔好意思。
 
小貞、小海同瑜仔都玩得好攰啦，一上到車就訓著左，Yan同我望住佢地訓得好冧個樣，就覺得好甜好溫馨。
 
最後阿南先送左Yan同瑜仔走，Yan臨走時再揮揮手同我地講：「今日多謝哂！我地星期一見啦！」
 
跟住阿南送埋小海，小海個印傭已經係樓下等緊我地，佢見小海仲訓緊，就輕輕咁拍醒小海，小海打左個喊露之後就睡眼惺忪咁返左屋企。
 
最後阿南送埋小貞同我，我唔捨得叫醒小貞，所以就咁輕輕咁背住佢，小貞好輕，所以背住佢完全無難度。
 
目送阿南同家姐走左之後，我都小貞就上樓啦。
 
係搭緊升降機既期間，小貞個頭仔瀡左落黎，係我個膊頭到滴左幾滴口水，我輕聲道：「今日辛苦你啦小貞！」