突然做左人地老豆，多左個女: 番外篇，家姐同阿南
番外篇，家姐同阿南
望住係酒店張床到熟睡中既阿南，我自己都好疑惑，點解會帶左佢黎呢到……
「喂……Katie姐……你係邊呀？」
阿南打俾我既時候，我其實返緊工，聽到佢迷迷懞懞既聲線，我就知道佢又飲醉酒，而且都係為左個「情」字。
對上嗰次佢劈酒劈到貓左，都係因為同女朋友分左手，然後打黎搵我，最後我將佢扔左俾細佬。
我見已經無乜客人等住剪頭髮，我就提早收左間舖，間舖係細路中左六合彩之後，將其中一筆錢俾左我，我再同朋友夾份開既。
去到酒吧，我見阿南已經醉到伏左係到，但係身邊都不乏穿著性感既女性，可能佢地都等緊今晚食左身邊呢塊肥豬肉。
我走過去，推開阿南身邊既色中餓鬼，大聲嗌：「佢係我朋友黎架，麻煩你地讓開啦。」
有啲女唔信，唔肯眼白白咁放走呢塊肥豬肉，就攔住我話：「佢都係我朋友黎喎！」
「屌你老母！餓就去其他地方搵食啦！」我忍唔住爆發左。
阿南聽到我怒吼，似乎都有返啲知覺，「咦……Katie姐，你黎左啦？」
仆你個街！我唔係黎左又點扶住你呀！
身邊啲女聽到阿南咁嗌我，就掃哂興咁知難而退。
我一邊扶住阿南，阿南係另一邊就好大動作咁郁動，講咩「三萬蚊！雞黎架！」咁。
我諗，又唔知邊個女仔傷左佢個心啦。
我好吃力咁扶住佢，好吃力咁截到架的士。
「去邊間酒店呀？」點知一上到的士，個的士佬就咁講。
屌你咩！我邊忽似嗰啲色中餓鬼呀！
好似上次咁，我心裡面諗起細佬個地址，就講左細佬個地址出黎。
「哇！有埋屋企咁好呀！」的士佬繼續講。
屌你！揸車就揸車啦！咁撚多野講！
架的士浪下浪下咁，搞到阿南有啲唔舒服，好似想作嘔咁。
「嗱嗱嗱！你唔好嘔落我架車到呀大佬！前面呀！前面有膠袋架！快啲拎俾佢啦！」
我見的士佬慌慌張張咁，唯有拎左個膠袋遞去阿南到。
「喂！阿姐！你就咁遞俾佢點得架！佢醉成咁你老味點撚樣拎呀！」
屌你呀！同我鬥爛口！
「仆你個街專心揸車啦！」我一邊大聲喝住個的士佬，一邊將個膠袋遞埋去阿南口邊。
的士佬聽到我咁樣一喝，就即刻收聲，專心揸車。
去到細佬屋企樓下，我再吃力咁將阿南送上樓。
「叮噹！」
「喂！佢貓左呀！」我如常咁喝我細佬。
我一心諗住得救啦，點知個仆街細佬竟然無反應，我唯有繼續喝：「喂！佢擺住你屋企先得唔得呀？」
「傻的嗎等陣嘈親小貞點算？」點知細佬一句車埋黎就關左道門。
屌你呀！夠膽收家姐皮？
我燥燥地諗住再敲門既時候，諗起小貞的確係訓緊教，我唔應該帶件咁既野返黎嘈醒佢，我就放低左手。
點算好呢……
我無阿南屋企鎖匙，更加唔知阿南屋企地址，因為條仆街仔話佢嗰到係留黎扑野用，所以唔可以講個地址俾我地知。我有諗過送佢返我屋企，但老母都已經訓左，如果搞醒左佢，俾佢知道我帶阿南返黎，佢一定會亂諗野，即使阿南係我既青梅竹馬，但老母一直好恨我嫁到出去，佢一定會誤會我同阿南一齊左，到時要解釋就麻煩啦。
係無哂辦法之下，我唯有再截架的士。
「點嘛？老母唔俾你返屋企搞呀？」
你老味又係呢個的士佬！
我紅都面哂，但無辨法，「去最近既酒店啦……」
然後我見到的士佬陰陰濕濕咁笑左下。
唉吔！我咁大個女都係第一次咁鬼瘀架！真係好想搵個樹洞塞自己入去！
好快地，就到左酒店門口。
「玩得開心啲啦！記得戴套呀！」的士佬笑笑口咁講，然後就駛走左架車啦。
我尷尷尬尬咁去登記，再扶阿南上房，最後扔左阿南係張床到。
本來我諗住就咁走左去架啦，但望住係張床到熟睡中既阿南，我竟然唔想走，想留係到望多佢幾眼。
難得，可以恣無忌憚咁望住佢。
我輕輕撫摸阿南醉到通紅既臉頰，回憶起以前細細個既種種往事…
「你條仆街唔係真係以為自己好撚有型呀嘛！Katie姐你都拒絕，你好歹有限呀！」
嗰陣時，雖然阿南只係個小六雞，但都已經好撚爛口。
嗰陣時，我中二，我鐘意左個學校既風頭躉，佢係學校到夾band既，係吉他手。
我鐘意左佢好耐，最後係朋友既慫恿下，我決定放膽一試，走去表白。
最後食左檸檬。
我係屋企足足喊左三日三夜，唔敢見人，亦唔想見人。
後來聽到班姐妹講，阿南係同一日既朝頭早幫我表白過一次，嗰陣子嬲到上哂腦，完全無思考過成件事既來龍去脈，我就覺得一定係阿南係吉他手面前講左我壞話，所以我先被人請食檸檬，最後我嬲到上左阿南屋企，係咁搵野扔佢。
我嬲左阿南整整一個月，之後聽班姐妹講，阿南後來幫我係咁鬧個衰人，我先下返啖氣，但至於阿南有無俾人打，或者點樣拆解呢件事，我就唔清楚，亦都無問過啦。
「三萬蚊過夜呀……」阿南又係到喃喃自語。
我拎左條毛巾，濕左啲暖水，輕輕咁抹阿南個頭，希望佢可以清醒返啲。
嗰次之後，到左阿南同細佬中三，我中五，我地係同一間學校到讀。阿南打籃球高得好快，中三就已經成為學校新既風頭躉，而我就掛住應付會考，無乜點理過佢地兩個。
後來聽細佬講，阿南拍拖啦，係同個中二妹妹仔，個樣幾清純幾可愛。我聽到嗰陣時係有少少失落，可能係覺得，一個青梅竹馬要比人搶走啦。縱然呢種感覺唔係太好受，但我專注學業，我都無理過呢件事，淨係得閒寸下阿南，笑佢終於大個仔啦。
「嗯嗯……」阿南訓得好冧，個嘴巴嘟下嘟下咁，好鬼得意。
考完會考，我終於順利升上中六，然後同左個插班生拍拖。
你問我係咪好鐘意個插班生？我又唔覺得係，只不過當時身邊啲朋友個個開始拍拖，就覺得自己一個人好寂寞，咁啱個插班生追我，我地就一齊左。
呢個時候，阿南分左手。夜媽媽，佢自己走左去公園，買左一打啤酒係咁隊，又係隊冧左自己之後打俾我。
「喂……Katie姐……你係邊呀？」
同一樣既對白，第一次發生。
我無帶佢返屋企，淨係係公園陪佢鳩坐坐到天光，其實我唔明白，點解佢唔搵阿傑，要搵我。
「嘔嘔……」阿南又好似有啲作嘔咁，我又準備定個膠袋，但佢嘔左幾下氣又無事，繼續訓。
我同我男朋友一直好甜蜜咁發展，但直到有一日，佢要同我分手，原因係，我唔肯俾隻豬佢。
雖然我唔係咁愛佢，但始終相處耐左都會有感情，我又係喊足三日三夜，唔敢見人，亦唔想見人。
嗰一年，阿南又拍返拖，對象係一個佢既忠實擁躉。
嗰一年，阿南無再為我出風頭，我就自己一個捱過左咁難捱既時光，我繼續專心讀書。
但係好可惜咁，高考嗰時，我病住咁去考試，結果成績好差，升唔到大學。老母叫我自修多年再考過，但我要臉，我唔想再衰多次，而且老豆早死，我唔想睇住我老母繼續一個人撐住頭家，我決定出黎做野，第一份工作，就係洗頭妹。
途中我同阿南都分別拍左好多次散拖，但每一次我都好潔身自愛，而每一次分手既原因，都係因為我唔肯俾隻豬俾我男朋友。
亦都可能因為咁，我性格愈黎愈惡，亦愈黎愈爛口，即使我係人人口中既長腿高妹，但都無人再鐘意我。
我再一次為阿南抹汗，慢慢咁，阿南有返知覺，佢醒左。
「Katie……」
佢終於可以正正常常咁叫我一聲Katie啦。
「點嘛？今次又係為左邊個？」我冷冷地問。
「屌！唔好再提啦！」阿南燥燥地講。
「好啦，既然你醒左，咁我走啦。」
當我轉身準備走既時候，阿南捉住左我隻手。
「點解你會帶我黎酒店？」
我紅都面哂，點解呢個人可以咁撚厚臉皮就咁就問出口架？
「你想……」阿南繼續講。
「你咪誤會呀！阿傑唔肯接收你我先帶你黎呢到咋！」我慌慌張張咁回應。
阿南笑左笑，然後輕輕講左句：「傻瓜。」
點解，點解你今日要咁溫柔。
佢坐左起身，拍拍自己身邊既位置，再對住我講：「坐啦，既然俾左錢，無理由就咁走左去咁戇鳩架嘛。」
我遲疑著。
「放心啦，我唔會食左你架喎，你咪當陪下我囉，就好似當年係公園到咁。」
我笑左笑，然後坐左係佢身邊。
「乜你仲記得自己當年有幾咁戇鳩咩？」我笑笑問。
「記得。」佢笑笑答：「好彩有你係到咋，如果唔係我可能中酒毒死撚左啦。」
「我恨不得你快撚啲中酒毒死撚左。」我笑笑道。
「其實……」阿南繼續講：「如果你唔係咁惡既話，我或者都會鐘意左你。」
嗰一刻，我面都紅哂。
咁既環境、咁既氣氛、咁既說話，我唔識得點回應好。
「如果你唔介意，我想問你一個問題。」阿南望住我道。
「乜野？」我紅住面答。
「你到而家為止……係咪仲係處？」
呀！！！！！！！！！條仆街仔點解可以咁撚厚臉皮就咁就問埋人地啲咁既問題架！！！！！！！！
我點點頭回應，然後垂低頭，唔敢直視佢。
佢笑一笑，然後挨住我個膊頭，我一個唔為意，擰一擰個頭，就咁，錫到佢個鼻。
佢坐返直個身，然後一野就咀埋落我個嘴唇到。
阿南個嘴唇好軟好柔，我俾唔切反應，淨係識得合埋對眼。
然後，阿南隻手開始唔規舉，隔住我件衫係到輕撫我個胸部。
我心跳加速，喘哂氣咁。
跟住，阿南再拉開我件衫，將隻手放係我個胸到，用手指尖係我個乳頭到打圈。
我受唔住，我推開左佢。
阿南有啲錯愕，佢定左定神之後，講左句：「對唔住……我飲多左……」
係呀，你只係飲多左你先咁對我……
我整理好件衫，然後同佢講：「我都係走先啦，你慢慢休息啦。」
我走啦，佢無挽留我，就咁俾我走左。
踏出門口之前，我回頭望一望阿南，佢只係靜靜咁望緊窗，我唯有默默地離開。
「姐姐？」小貞望住我，眼仔碌碌咁。
今日，我拎左張游泳班既宣傳單張俾細佬，順便探下小貞。
「你唔開心呀？」小貞問。
我點點頭回應。
「你踎一踎低啦。」小貞道。
我踎低左，然後小貞用佢隻小手係我個額頭到一邊打圈圈一邊話：「唔開心唔開心全部飛走哂！」
「係咪開心返啦？」小貞甜甜咁笑住問。
我點點頭，然後攬實左小貞。我好想喊，但我怕嚇親小貞，所以我忍住左，只係靜靜咁攬住佢。