突然做左人地老豆，多左個女: 29
自從嗰日之後，我每次送小貞返幼稚園，撞到Miss Cheung都會尷尷尬尬咁，不過我地既話題都只限於hi, bye同小貞係幼稚園既情況，我無覆過佢篇千字文whatsapp，佢亦都無搵過我，我估佢都無再做援交，一心一意做好幼稚園老師呢份工作啦。
不過有一點比較稀奇既係，除左我對住Miss Cheung會尷尬之外，自從嗰晚阿南醉到貓左之後，阿南對住家姐都會好尷尬，無左以前嗰種親到好似親人既感覺，我問過阿南，又問過家姐，但兩個都唔肯講到底發生咩事，淨係話我唔好理咁多。
至於小海，佢留院左幾日之後又健健康康咁出返黎啦，我成日都笑鳩佢做埋啲低能野引父母注意，佢就會嬲爆爆咁喱係小貞身後唔想見我，小貞就會摸摸佢個頭仔安慰佢。
喵喵同小貞既感情愈黎愈好，小貞一起身，喵喵就會攞個頭撞埋去小貞到，要佢餵野食，小貞擺完貓糧，喵喵食到好滿足咁，就會用脷仔清潔自己既肉枕同臉仔，然後拍拍個羅柚就走貓，我正式宣佈，我同小貞就咁成為左貓奴啦。
話咁快，個零月過去，就到左暑假既時間。暑假最開心係乜？咁就梗係唔洗晨早流流送小貞返學啦！
呢一日我地都訓得好晏，起身之後就兩父女係到睇電視同刨西瓜，夏天既西瓜又爽又甜，一啖咬落去，啲西瓜汁標哂出黎，個嘴仲浪住浪住左啲西瓜甜甜既香味。
電視擋緊套Keroro軍曹大電影，小貞一邊睇，一邊笑到格格聲，然後啲西瓜汁又唔小心咁流哂出黎，小貞食到成塊臉都係西瓜粒，我幫佢擦嘴，佢又笑到格格聲咁，成個傻婆咁。
「叮噹！」
係我地享受緊父女溫馨既時光時，邊個搵我地呢？
我一開門，原來係家姐。
「喂！幫小貞報游泳班啦！」佢將張印住暑期幼童游泳班既宣傳單張塞左俾我。
「吓？無啦啦做乜要報游泳班？」我一頭霧水。
「你暑假都無野做架啦，倒不如帶小貞去學多樣野，學游水幾好呀！」家姐一路講，一路自己行入間屋，仲係到吱小貞，「小貞，你話好唔好呀？」
「哈哈……」小貞笑到標哂眼淚，根本答唔到家姐。
「但係我想留係屋企hea喎……」我答家姐。
家姐啤一啤我，再講：「咪『撚』咁懶啦！」佢個「撚」字做左口形，無發到音。
「好啦好啦……」我好無奈咁答應左家姐，帶貞去左報游泳班啦。
今日，就係上游泳班既第一日。
因為係幼童班，所以家長可以陪同，阿南就因為無聊無野做就跟左我過黎，兩個爸爸既情況又出現左，個個在場既師奶都向我地投射一個好奇異既目光，不過小貞就好開心咁，左手拖住阿南，右手拖住我，跳下跳下咁。
小貞著左件深藍色既連身泳衣，因為件泳衣有啲緊身，所以突出左小貞微小既bb肚腩仔，顯得小貞特別可愛。
教練黎左，係一個身形幾健碩既後生仔。佢簡單咁講解係泳池要遵守既規則，然後帶住四個細路做熱身，三女一男，包括小貞在內。
小貞手仔fing下，腳仔fing下咁，間中望到我望住佢，佢就會甜甜一笑。
「Sorry呀！我地遲左！」迎面而黎既，居然係北川景子！呀！唔係！係Yan！
Yan拖住喊包瑜仔，喘哂氣咁走到教練面前，係咁講sorry。
佢安頓好瑜仔之後，一擰轉身就見到我地，佢著住條黑仔牛仔褲，襯一件白色緊身背心同埋一對深藍色new balance，黑白相襯，顯得佢身材非常高挑。
「Hi, 原來小貞都報左游泳班！」佢笑住咁走左過黎，坐響我身邊。
近距離望住Yan，發現佢皮膚白晢，手臂上一啲拜拜肉都無。
「係呀！又會咁啱瑜仔都報游泳班！」我笑笑回答。
「咁咪好囉！瑜仔有個伴啦！」
「係呢，你今日又會咁得閒唔洗返工？」阿南加把嘴埋黎。
「係呀，逢星期一我都day off，所以先同瑜仔報星期一呢班！」Yan紮住條馬尾，有啲髮絲跌左落黎，佢就好自然咁將啲髮絲撓左係耳後。
「你幾時正式搬過黎？」我問。
「我其實已經搬左架啦！仲幫瑜仔報埋附近既幼稚園！」
「邊一間？」阿南問。
「聖心潔幼稚園。」
「咦！咁咪同小貞同一間？」阿南驚訝道。
「太好啦！咁小貞同瑜仔又可以做同學啦！」Yan開心道。
我笑笑回應。
然後我地又望住班細路學游水，佢地個個都戴哂眼罩，教練開始教佢地水中呼氣，教練指導佢地先係水到吹氣泡，小貞學得好快，好快已經掌握到點樣吹氣泡，仲時不時用腳仔踢啲水，玩得好開心。
相反，瑜仔就顯得好笨拙，經常要教練埋去親身指導，但係瑜仔始終掌握唔到，眼紅紅想喊想喊咁，小貞見到咁既情況，就主動走過去安慰瑜仔：「瑜仔唔洗怕，吹下吹下就得架啦！」
瑜仔點點頭，再嘗試多次，終於都成功左。
教練叫佢地繼續練習，想佢地熟習啲先再教新野。
瑜仔係小貞既陪伴下，兩個都進步神速，小貞玩水玩到格格聲咁笑。
「有彩有小貞係到！」Yan笑笑講。
話咁快，一個鐘既課程已經完結，小貞笑瞇瞇咁撲向我到，啲水珠潑到我成條褲都濕哂，然後小貞又係到傻傻咁笑。
「小貞今日好叻！辛苦哂啦！」我踎低摸摸小貞個頭仔道。
小貞笑到好甜咁，「唔辛苦！好開心！」
「好啦！小貞！我地去換衫啦！」阿南講完，就拖住小貞去換衫。
我擰轉頭望一望Yan，咁啱佢又望住我，然後對我笑笑講：「下個星期見啦，拜拜。」跟住瑜仔都同我講拜拜，兩個人就走左啦。
唔知點解，我好期待下個星期一既游泳班。