突然做左人地老豆，多左個女: 25
我地截左架的士返去幼稚園，Miss Cheung全程都撓住我隻手，挨住係我膊頭到訓教。
我唔知呢種咁曖昧既行為係代表啲乜，或者佢只係真係太攰姐。
因為佢挨住我，所以啲髮絲就好自然咁搭住我個膊頭，好輕好柔，仲時不時聞到陣陣既香味。
佢著住件鬆鬆地既白色短袖T，係佢挨住我既時候，佢件衫係佢膊頭個位到瀡左落黎，露出少少白滑既肩膀，同埋約隱約現既粉紅色bra帶。
雖然佢胸部唔大，不過佢撓住我隻手時唔多唔少都會撞到我，感受到嗰種微小既弧度同彈性。
「到啦！」
當我仲享受緊啲咁輕柔既時光時，的士大佬一言驚醒洛克人。
唉，點解你要揸得咁快呢。
我輕輕咁拍一拍醒Miss Cheung，佢好似自知啱先自己好失態咁，尷尷尬尬咁整理好件衫，我望住佢笑左笑，佢就紅都面哂。
送到佢去幼稚園門口，佢甜甜咁笑左笑，露出澤尻英龍華既虎牙，然後突然就向我塊臉到錫左啖，再衝左入幼稚園。
我呆左咁企係到，一時三刻我消化唔到啱先發生左咩事，雖然我唔係未食過女，但食女係有目的架嘛，今次完全無心理準備、無目的咁俾人錫左啖，我有啲不知所措。
而且一諗到佢，我就諗起上次係農莊到撞到佢同個肥矮毒一齊，仲有係深水埗到見到佢係藥房買左盒粉紅色盒既藥丸，我就知道呢個女人一定無咁簡單，我唔可以太上心。
我見時候都唔早啦，係附近hea左hea就返去幼稚園到接小貞。我一邊擔心如果見到Miss Cheung既話點算好、講乜好，但一邊又好想見到佢，真係好矛盾。
一入到去，見唔到Miss Cheung，不過就見到小貞企係門口到等我。
小貞一見到我，就即刻衝過黎攬住我，我望一望佢，見到佢雙眼腫哂，應該係因為今朝喊完黎。
「傑哥哥……」小貞輕輕道。
「嗯？」
「唔好唔要我……」佢耷低個頭，攬實我條腿講，似乎係唔敢望住我。
「傻妹……」我踎低攬住小貞講：「係傑哥哥唔好，唔應該咁惡鬧你……」
「我唔會再暪住你架啦……」小貞眼仔水汪汪咁講。
「嗯，咁就乖啦。」我摸摸佢個頭仔回應。
接小貞返屋企之後，我地準備帶隻貓去睇獸醫，一返到黎，就聞到一陣極度厭惡既臭味，就好似你擺左隻雞蛋係室內，但你成日都唔記得左煮黎食，最後隻雞蛋慢慢咁腐爛，傳出陣陣既惡臭味咁。
「好臭……」小貞皺埋雙眉，噤住個鼻講。
我噤住個鼻沿路去望，終於搵到陣惡臭味既來源，原來係隻貓痾左大量既屎同尿，但佢唔識係個貓沙盤到痾，所以搞到成身都係屎屎尿尿。
嗚哇，咁既情況，我點帶佢去睇醫生呀。
「喵喵……」隻貓眼甘甘咁望住我不停係到叫，好似向我求救咁。
大佬呀，你搞成咁，我點救你呀。
「咁點算呀傑哥哥？」小貞噤住個鼻，跟係我後面講。
然後我忍住臭味，將隻貓擺落個寵物手挽袋到，好仆街咁笑左笑，哼，就等個獸醫幫我搞啦。
我左手拖住小貞，右手拎住個手挽袋，屌！無手噤住個鼻添！
小貞就沿途拖住我沿途噤住個鼻，凡係喺我地身邊經過既人都即刻向我地投射一個好似殺左你老母咁既眼神，然後即刻彈開十萬九千里遠咁。
屌！我都唔想架！
去到獸醫診所，係櫃台到既護士聞到陣臭味，又係即刻嗱埋口面，不過佢一估就估到發生咩事。
「你隻貓賴屎呀？」護士道。
「係呀……係呀……」我尷尬咁摸一摸後尾枕。
「黎做左個登記先啦，隻貓叫咩名呀？」個護士眼超超咁望住我講。
隻貓叫咩名？係喎，我地都未幫佢改名！
「小貞，隻貓叫咩名好？」我踎低問小貞。
小貞眼仔碌碌咁諗左諗，但係都無回應我。
「佢成身都係黑色，不如叫『烏卒卒』好唔好？」我諗起8、90年代「閃電傳真機」陳松伶唱既「烏卒卒」。
但係小貞竟然擰擰頭，我諗小貞都未知道「烏卒卒」係乜野黎。
「咁你想叫乜？」我問。
「叫『喵喵』……」小貞道。
「好啦，就叫『喵喵』。」
做好登記，我地坐左陣就可以入去睇獸醫啦。獸醫一聞到陣味，又係皺一皺眉，不過佢戴住口罩，我睇唔到佢有無嗱埋口臉。
獸醫一邊戴住個透明膠手套，一邊講：「放隻貓係張枱到啦。」
佢口中嗰張枱，係一張銀色既、有兩層既四方形大枱，我叫小貞幫我拎一拎住個手挽袋，然後小心翼翼咁攞「喵喵」出黎。
「喵喵……」喵喵見到我，又係咁「喵喵」叫。
我輕輕咁將喵喵放係張枱到，小貞就係一邊好緊張咁望住。
喵喵好乖，係張枱到唔會周圍跑，淨係喺到用鼻哥聞下張枱。
獸醫走左過黎，因為佢戴哂口罩同手套，所以佢都唔怕，佢好溫柔咁摸一摸喵喵，同佢講：「喵喵唔洗驚架，我幫你做個檢查下。」
然後獸醫好熟手咁檢查喵喵雙眼、耳仔、牙齒、皮膚、手仔腳仔同埋粉紅色肉枕，最後仲係喵喵個屎忽到探左個熱。
「隻貓執返黎架？」獸醫問。
「係呀。」我答。
「你未教識佢係貓沙盤到大小二便？」
「未呀……」其實我都係養左佢一日咁大把姐……
「你返去，將佢啲屎擺係貓沙盤到，擺多幾次佢就識架啦，呢個係最簡單既方法。」
「係既係既！」
「另外佢有少少貓蚤呀，我會開個杜蚤藥同杜蟲藥俾佢，朝頭早係佢食野前半個鐘餵佢，連續兩日就得架啦，另外如果可以既話今晚同佢沖一沖涼啦。」獸醫繼續講：「我檢查過各方面都無咩問題啦，佢係仔黎既，出世四個月左右啦，而且佢無發熱既情況出現，我等陣會幫佢打第一支針，打完之後你唔好咁快幫佢滴杜蚤藥呀，過多一、兩日先啦，記得滴係佢頸呢個位，我等陣打針都係打呢個位。」
獸醫講完之後就輕輕攇一攇喵喵條頸中間既位置，然後準備好支針，一邊打落去一邊安撫喵喵道：「唔洗驚架，好快無事架。」然後好快就將支針抆返出黎。
只見喵喵好似依然係呆下呆下咁，應該係獸醫既技術太好，喵喵完全感覺唔到痛楚。
成個過程，小貞都眼定定咁望到實，似乎好似好仰慕個獸醫咁。
「但係佢好似成日都呆下呆下咁。」我道。
「佢可能未係點適應到新環境，又或者係之前俾人傷害過，對人類無好感或者有戒心。」獸醫再望住小貞講：「小妹妹，你要俾多啲愛心、耐性同關懷佢，令佢可以改變對人既睇法，重新同人做返好朋友。」
小貞好用力咁點點頭。
返到屋企，小貞同我就要開工幫喵喵沖涼啦。我將喵喵擺係廁所個洗手盤到，喵喵好似有啲驚咁，雙手捉左個水喉頭，我開著個花灑，調較到去適中既溫度，然後慢慢由喵喵個屎忽淋到佢條頸到。
「小貞，你搓啲喵喵既皂液落喵喵到啦。」
「知道！」小貞用自己既小手搓左好多泡泡出黎，多到有啲痴左係自己個鼻哥到。
然後佢好輕柔咁幫喵喵搓個身，可能喵喵覺得舒服啦，佢已經無咁驚，不過小貞見到喵喵成身都濕哂既樣，就覺得好得意，笑到格格聲咁。
幫喵喵沖完涼，我用風筒較到最細既風量，幫喵喵吹乾個身，話咁快，喵喵又臭又污糟既身即刻變到靚一靚咁。
「喵喵，以後你有屋企啦，有屋企人錫你啦。」小貞凝視住喵喵講。
我總係覺得，呢句說話其實係小貞同緊自己講咁。