突然做左人地老豆，多左個女: 24

到左朝早，天都未光，小貞就已經起左身，伏左係貓籠前面昅住隻貓。
 
「小貞，你咁樣會嚇親佢架。」我道。
 
「佢唔食野……」小貞指住個仲係擺滿左好多貓糧既碗仔講。
 
「可能佢怕羞呢……你咁樣望住佢……」
 
「佢唔餓咩？」小貞依然用一幅好天真既眼神望住隻貓。
 


於是乎，我走埋去小貞身邊，將小貞輕輕咁抱起，我再坐係地下，將小貞擺係我個大脾到坐住。
 
攬住佢同佢講：「小貞，你真係想養佢？」
 
小貞擰轉身，眼甘甘咁望住我點一點頭，「嗯……」
 
「點解咁想養？」我繼續問。
 
「佢好似我……」
 


「好似你？」
 
「無爸爸媽媽……無人要……」小貞講既時候，已經開始眼紅紅咁。
 
我大概知道，點解小貞會咁緊張隻貓啦。
 
「但係，你要養佢一生一世架喎，你肯定你可以做到？」我好誠懇咁望住小貞講，我希望佢知道呢件係一件好重要既事，呢條係一條生命黎，唔可以因為少少既感情用事而收養佢，但又唔負上責任。
 
小貞眼定定咁望住我，然後用力咁點點頭，話：「我會好似傑哥哥照顧我咁，一生一世！」
 


哇屌！佢一講呢句，輪到我紅都面哂，得啦，無得輸啦呢句，係我輸左啦。
 
因為怕啲貓糧擺得耐會變質，所以我換過堆糧，可能因為佢無咩點食過野同飲過水既關係，佢都無痾過屎尿，我輕輕摸一摸隻貓既頭仔，又唔見佢有發熱既跡象，只係依然呆下呆下咁訓係條毛巾到，間中開下眼昅下你係到做緊乜。
 
睇黎今日放學去睇獸醫時，都係要問清楚佢既情況先得。
 
一送小貞去到幼稚園，遠遠就見到有架白車停泊左係幼稚園門口，我擔心會有咩事，所以拖住小貞跑左過去。
 
一望，就見到小海訓左係架白車張抬床到，塊臉紅紅腫腫咁，而且好大力咁係到抖氣，好似呼吸困難咁。
 
Miss Cheung係小海旁邊望到我，就同我講：「佢食物敏感，而家我會跟車去醫院。」講完之後又擰轉後面同班老師講：「記得幫我代堂呀！」
 
隨後佢地就上左白車，小海個印傭都跟埋係後面上左車。
 
件事黎得太快，我消化唔切，我望一望小貞，發現佢都呆左係到。


 
我踎係到攬住小貞，怕件事會嚇親佢，點知我一攬，就感覺到個膊頭濕濕地，原來小貞係到喊緊。
 
由尋日放學開始小貞就悶悶不樂，到而家喊哂口咁，我覺得小貞係有啲野，所以我捉住小貞個膊頭問：「你係咪知道啲野？」
 
小貞唔答我，繼續係到喊。
 
「小貞你唔可以瞞住傑哥哥架！」我稍為有啲大聲咁喝小貞。
 
終於，小貞都望一望我，再開口講：「小海……小海……話要食蛋……咁樣爸爸媽媽就會……就會過黎……」
 
我唔係好明小貞既意思，再問：「你話咩小海食蛋？」
 
「雞……雞蛋……」小貞依然喊住咁講。
 


我係個腦到組織左下，然後再問小貞：「你既意思係，尋日放學小海同你講，佢今日會食雞蛋，因為佢對蛋有過敏，食左之後入醫院，佢爸爸媽媽就會黎睇佢？」
 
小貞點點頭回應。
 
我唔敢相信，尋日小貞一直悶悶不樂既原因，竟然係瞞左我一件咁大件事！
 
我忍唔住啦，我企返起身，然後鬧小貞：「你點可以瞞住我咁大件事？」
 
小貞聽到我咁樣一喝，更加係喊到收唔到聲。
 
「你知唔知道咁樣佢隨時會無命架？」我唔知點解自己會咁激動，係因為真係擔心小海會有事？定係因為接受唔到小貞有野瞞住我？
 
望住小貞喊到收唔到聲既樣，我好心痛，今次，係我第一次鬧小貞。
 
打在兒身、痛在娘心。


 
忽爾間我個心好痛好痛，痛既感覺大概令我知道，我之所以咁激動，係因為小貞選擇瞞住我呢件事，我好失落。
 
最後我都係踎返低，攬返住小貞同佢講：「對唔住……傑哥哥大聲左啲……」
 
「嗚……」小貞依然係到喊緊。
 
隨後，有幾個幼稚園老師過左黎，佢地安慰左小貞幾句之後，就帶小貞入左課室。
 
「小海情況點?」我拎左部手機出黎，whatsapp Miss Cheung。
「去緊醫院, 不過打唔通佢父母既電話?」Miss Cheung回覆。
「小貞話今日小海食過雞蛋…」
「我知道, 小海個印傭同我講, 小海今朝偷偷食左雞蛋, 我知小海對雞蛋有過敏?」
「知唔知點解小海要咁做?」
「唔太清楚, 不過我估係佢想引起佢父母既注意, 佢父母呢幾日都返左大陸做野…?」


「好啦, 唔傾住, 到左醫院?」Miss Cheung再send黎。
「邊間醫院?」
「廣華」
 
我決定跟埋過去，了解下小海既情況，免得小貞擔心。
 
我搭的士去到醫院，一落車就落雨，不過今次我有帶遮。
 
我唔知小海係邊間病房，又唔想好似tbb咁貿貿然衝去櫃台到問邊個邊個細路係邊到咁，唯有擔住把遮，企係門口到等Miss Cheung出黎。
 
等左無幾耐，終於見到Miss Cheung既倩影。
 
我見到佢無拎遮就咁出左醫院門口，於是我擔住把遮走過去遮埋佢，「Miss Cheung。」
 
佢一抬頭望到我，就眼紅紅咁。
 
Miss Cheung眼紅紅咁，加上雨粉灑落嗰陣迷迷濛濛既感覺，令Miss Cheung更添吸引。
 
「小海既家長黎左？」我問。
 
Miss Cheung點點頭。
 
「佢地鬧你？」
 
Miss Cheung擰擰頭再講：「唔係，佢地好好，佢地話係佢地疏忽左……」
 
「咁小海既情況點？」
 
「穩定左好多啦，好彩佢只係食左少少蛋……」
 
望住Miss Cheung咁唔開心既樣，我都唔知講咩說話安慰佢好，唯有默默咁為佢撐傘。
 
「我同小海父母講，小海係呢個歲數，最需要既係父母既陪伴同關愛，佢想父母多啲陪自己，所以先故意咁做引起佢地既注意……」Miss Cheung續道。
 
「咁佢地點講？」
 
「佢地只係點頭回應，不過我見到佢地望住小海訓係病床既眼神，我諗佢地唔多唔少都明白既……」
 
我點點頭。
 
然後，Miss Cheung好似好攰咁，個頭挨左埋去我個膊頭到。
 
「好彩有你係到咋……」Miss Cheung合埋雙眼講。
 
睇黎佢真係好攰……
 
「好彩小海無事……」Miss Cheung繼續輕輕咁挨係我到講。
 
我摸一摸Miss Cheung個頭，安慰佢話：「無事啦，唔洗擔心。」
 
Miss Cheung笑一笑，然後勾住我擔遮隻手講：「送我返去幼稚園。」
 
「好呀！」我用笑容去回報佢既笑容。