突然做左人地老豆，多左個女: 21

然後佢繼續係個書包到拎左幾盒吉既飲品盒、兩支筆刷同埋紅、黃、藍、白、黑五種唔同顏色既壓克力顏料出黎，上面都貼住左張印有號碼既貼紙，似乎係喺幼稚園到借返黎既。
 
屌！親子功課！我記得細個嗰陣時有親子功課時，我係同我家姐兩個人求鳩其做既，而家竟然輪到我要同個女一齊做，對於一個毫無藝術細胞既人黎講，我諗起都覺得頭痛！
 
我係書房到拎左幾張紙、膠水同較剪出黎，唉，幾咁唔想做都要做架啦。
 
我靈機一觸，啲咁痛苦既事梗係要搵埋家姐同阿南一齊做啦，於是就whatsapp叫佢地過黎。
 
佢地一黎到，見到地下攤哂啲材料係到，阿南想拔足就走，但家姐就扯住左佢件衫，唔俾佢走。
 


家姐睥住阿南，我知，我知家姐想講乜，佢想講：「屌你個仆街仔想走？」
 
阿南用返一個求情既眼神望住家姐，佢心裡面應該講緊：「屌！我藝術細胞係零架，你放過我啦！」
 
問我點解識讀心？屌你咩，由細玩到大，我會唔知佢地啲眼神代表乜咩？
 
家姐無理到阿南，扯住阿南坐低左。
 
阿南眼超超咁望住我，應該係講緊：「屌你又唔講清楚係做勞作！」
 


我鬆一鬆膊頭，再用眼神話佢知：「屌你如果我講左你仲會黎？」
 
阿南好無奈咁嘆左口氣。
 
家姐走埋去小貞到，問：「小貞，今日剝牙痛唔痛呀？」
 
小貞擰擰頭。
 
「佢啲血未止，仲咬緊棉花。」我答。
 


「嗯。」家姐摸摸小貞個頭再講：「小貞換牙大個女啦。」
 
小貞微笑回應，然後走返埋我身邊。
 
「好啦，咁我地開工啦！」我道。
 
就係咁，家姐就負責溝色，阿南就負責剪剪貼貼，小貞同我就負責畫同度橋。最後小貞係啲紙到畫滿左不同顏色既花花，阿南貼哂係啲紙盒到，我同家姐就剪剪貼貼咁整左個城堡出黎。
 
小貞好滿意，佢笑左笑，差啲跌埋啲棉花球出黎。
 
阿南就攰到伏左係地下，家姐走埋去踢左佢兩腳，話：「做少少野都咁攰。」
 
阿南依然係一pat爛泥咁攤係地下，答：「大佬，你唔係唔知我最憎就係做勞作架啦。」
 
家姐再踢多兩腳，「小貞呢個歲數最需要既係同屋企人相處多啲呀，你要珍惜先係。」


 
「呢啲野你同阿傑講啦。」阿南講完之後就係地下碌下碌下咁。
 
小貞見到阿南碌下碌下，佢覺得好得意，於是格格聲咁笑。
 
佢一笑，就唔記得左自己咬住舊棉花，兩舊棉花就咁跌左出黎。
 
「呀！！！都係你衰！！！」家姐見到小貞跌左兩舊棉花，就發左癲咁拉左阿南去暗角打獲。
 
我幫小貞執返起兩舊棉花，再望一望小貞隻牙仔，似乎無再滲血出黎，就同小貞講：「好啦，你可以講野啦。」
 
「好耶！」小貞開心到舉起雙手係咁紮紮跳。
 
家姐同阿南係暗角走返出黎，家姐一見到小貞無左上面隻門牙，就忍唔住係到大笑。
 


結果，我同阿南都忍唔住笑左。
 
小貞即刻紅都面哂咁合返埋把口。
 
後來送走左家姐同阿南，臨訓前，我拎返小貞兩隻剝左既牙仔出黎，連埋個細膠袋擺係枕頭底。
 
「點解會變十蚊既？」小貞眼仔碌碌咁問。
 
仆街！我唔撚識答！
 
我即刻叫小貞等一等我，我上網查左啲資料，於是就係床到一邊氹小貞訓教，一邊講故仔啦。
 
「其實係呢個世界係有『牙仙』既，牙仙佢係個好好既神仙黎，當啲細路甩左牙，只要將啲牙擺係枕頭底，佢就會換個金幣俾你，証明你真係大個仔或者大個女啦，所以小貞啲牙仔都要擺係枕頭底，第二日就會變成錢，証明小貞你大個女啦。」
 
講講下，原來小貞已經訓著左，我輕輕咁錫一錫小貞既額頭仔，就同佢一齊入睡啦。