突然做左人地老豆，多左個女: 22

今朝一早，小貞即刻拎起個枕頭，望下個枕頭底有無十蚊銀，佢見到有十蚊就好開心咁係到講：「我大個女啦！我大個女啦！」一邊講，一邊拎住個十蚊走左入廁所。
 
哼，梗係啦，我晨早流流就已經將枕頭底既牙仔換成十蚊，你班仆街咪撚告我虐兒呀！
 
我行到去廁所，發現小貞關左廁所道門。
 
「小貞，你痾『嗯嗯』呀？」我問。
 
「係呀。」係廁所到既小貞回應。
 


既然係咁，我唯有開住部收音機，淋下花、掃下地，打發下時間咁啦。一個字、兩個字、三個字，等等下，原來唔經唔覺已經等左成半個鐘，我覺得唔對路，就大嗌問小貞：「小貞！你咁耐既？」
 
「我……痾唔出！」小貞回應。
 
「你便秘呀？」
 
小貞無回應，我估佢係廁所到點左頭，以為我會睇到。
 
我諗要塞小貞食多啲菜先得啦。
 


突然，我感覺到屁股到轉黎一陣暖流，小貞便秘但我就好想痾，咁而家點算好呢，同時間，個電台DJ竟然播左首叫「外面的世界」既歌，係由隊唔知叫乜青年理髮廳既組合唱既……
 
「為何每次我極度肚痛想去厠所，個厠所總會迫爆左
時間的滴噠過  個肚越不妥
點解啲厠格永遠得果幾個
其實老友你去完厠所咪再係裡面齋坐
曾經你都急過 你應該很清楚 在厠格外面的痛楚
 
痛　我個肚一直痛
難以承受扭曲了面容


連呼吸 也停頓」
 
https://youtu.be/rYFa1EPKKXY
 
屌你老母，好播唔播，偏偏晨早流流播啲咁既歌，我好撚想走過去熄撚左部收音機，但我怕我一郁，屁股到陣暖流就會洶湧而出。
 
好，我忍，諗下其他野轉移下視線先，諗下諗下……以前一個人住既時候唔需要等廁所，想痾就痾既感覺真係好爽，但係小貞出現左之後，就多左個人同我爭廁所用，我記得細個嗰時家姐都成日同我爭廁所用，諗唔到而家大個左要同個女爭廁所用……唔得，愈諗愈想痾……
 
「小貞你得未呀？」我再次大嗌。
 
「未呀，睇螞蟻……」
 
咩話？睇螞蟻？
 
細個嗰時係好鐘意係去廁所時觀察啲行過既螞蟻，有時會好仆街咁特登搵啲水滴落去啲螞蟻到，又或者故意隊隻腳指公埋去，等佢地改變航道。


 
「小貞呀，你唔好睇螞蟻住先啦，傑哥哥肚痛呀！」
 
「哦！」
 
無幾耐小貞就出左黎，我即刻狗衝入廁所，我見到地下無濕，啲螞蟻又照舊行緊，睇黎小貞真係好乖咁觀察佢地，無去搞佢地。
 
「小貞呀，你換定校服等我啦！」
 
「知道！」
 
最後都好彩趕得切返幼稚園，小海一見到小貞無左兩隻牙就係到開懷大笑，但佢唔記得左自己都無左隻門牙，所以我又笑鳩佢。
 
佢嬲爆爆咁鼓埋泡腮唔理我。
 


「小貞、小海，你地兩個都大個女啦喎！」Miss Cheung走左過黎講。
 
小貞同小海都笑笑回應。
 
「係呀小貞爸爸，聽日放左學之後我地會有個簡單既親子勞作作品展，到時你可以黎一齊睇架。」Miss Cheung道。
 
「好呀！」我笑笑說。
 
話咁快又放學接左小貞返屋企，老母煮左啲飯餸擺低左俾我地，臨食飯之前，小貞拉左我入廁所。
 
「今日學左洗手歌。」小貞道。
 
「你係咪想唱俾我聽？」我笑笑問小貞。
 
小貞點點頭，「一齊洗！」


 
「洗啊洗洗手 拍啊拍拍手 大家一起來
洗啊洗洗手 濕啊濕濕手 肥皂抹抹手
洗啊洗洗手 搓啊搓搓手 手背搓完搓手心
洗啊洗洗手 沖啊沖沖水 細菌病毒說bye bye
洗啊洗洗手 捧啊捧捧手 淋淋水龍頭
洗啊洗洗手 擦啊擦擦手 大家笑哈哈」

https://youtu.be/Z12y1loAAQY
 
小貞一邊用比加超聲線唱住首洗手歌，一邊跟住洗手歌既步驟洗手，我又跟埋一齊洗，最後唱到「笑哈哈」時，佢就笑到見牙唔見眼咁。
 
「小貞真係好乖好叻！」
 
小貞聽到我讚佢，又紅都面哂咁走左去食飯。


 
老母今次煮左苦瓜炒蛋，我夾左舊苦瓜落小貞個碗到，小貞望左望，於是擺左入口，一秒，佢即刻吐返出黎，嗱埋口臉望住我。
 
我忍住笑，同佢講：「小貞，苦瓜好有益架，唔可以唔食。」
 
小貞依然嗱埋口臉。
 
「係咪唔聽傑哥哥既說話呀？」
 
小貞一聽到呢句，就好似聽到皇帝宣佈聖旨咁，不從不得。佢唯有死死地氣咁將舊苦瓜重新擺入口，然後一吞，面容扭曲。
 
我笑笑講：「咁就乖啦小貞！」
 
食完飯之後我拎左個豬仔錢罌出黎，係今日老母俾我既，佢話本來係買俾我細個嗰陣時儲錢用，但點知我最後都無用到，拎哂啲錢黎買四驅車同爆旋陀螺，所以最後都係幫我留起左，等我第時啲仔仔女女可以用，因為知道我俾左個十蚊銀俾小貞，所以就拎埋個豬仔錢罌過黎俾我。
 
我一拎個豬仔錢罌出黎，小貞就好好奇咁望住，似乎係對隻眼咁大，全身粉紅色又肥肥地既豬仔好有興趣。
 
「小貞，今朝嗰十蚊呢？」我問。
 
小貞乖乖咁係褲袋仔到拎左個十蚊銀出黎。
 
「嗱，小貞，呢個係豬仔錢罌，佢既責任係幫你儲錢，而你既責任就係將你拎到啲錢擺入佢個身到，等佢幫你儲錢。」
 
「儲黎做乜？」小貞眼眨眨咁問。
 
「儲黎……如果你將來想用錢買野，咁咪可以打爛佢黎拎錢囉！」
 
「打爛佢？」小貞皺起雙眉，「咁佢咪好痛喔？」
 
「呀……唔會架！佢會好開心！因為佢幫到小貞你完成任務呀！」我好誇張咁樣笑一笑。
 
小貞終於相信我，將個十蚊擺左落去豬仔錢罌到，再摸摸豬仔錢罌個頭講：「辛苦你啦豬豬！」
 
哇屌！真係甜到好似舊朱古力溶化係口到！