突然做左人地老豆，多左個女: 20

翌日，我好心急咁接左小貞放學，要同佢狗衝去睇牙醫。
 
去到診所，啲護士一見到小貞，就即刻走埋話小貞好可愛，差在未係咁搓小貞塊面珠墩。
 
護士幫小貞量左體溫，我同小貞就坐係到等護士叫名啦。
 
小貞有啲緊張，用小手捉實左我隻手，但同時又有少少興奮，對腳仔fing下fing下咁，或者係覺得，就黎可以擺脫牙痛啦，所以又緊張又興奮。
 
小貞用另一隻手噤住把小嘴巴，我問小貞：「係咪仲痛緊呀？」
 


小貞頭擰擰，然後露齒咁笑一笑，望住佢隻門牙，搞到我又好有衝動咁要幫佢剝左隻牙。
 
「叮噹！」
 
係呢個時候，診所又黎左兩個人，第一個映入眼簾既，係個印傭。
 
「行快啲啦！」未見人先聽聲，呢把咁尖銳既聲線打死我我都認得，係巴渣雙馬尾。
 
佢拖住印傭黎行，直衝左去櫃台，目中無人，更加唔好講話見到我地。
 


護士幫佢量一量體溫，就叫佢坐係到等一等，佢同印傭一擰轉身，先發現到我地。
 
「小海！」小貞笑眯眯咁向住雙馬尾嗌。
 
雙馬尾粗粗魯魯，好大動作咁走埋去小貞身邊，條雙馬尾fing下fing下咁，「叫我Yvonne，唔好叫我小海！」
 
哦，原來雙馬尾叫「小海」。
 
當我好期待小海會同我打招呼時，佢竟然無視左我，就咁坐左係小貞旁邊。
 


你好耶！
 
小海既印傭都靜靜咁坐左係小海身旁。
 
「你係到做乜？」小海問小貞。
 
屌！係到就梗係睇牙醫啦！問黎都傻的嗎。
 
小貞張開左嘴巴，指住左隻門牙仔。
 
然後小海又張開左嘴巴，指住左下面右邊隻門牙仔。
 
之後兩個就好傻的嗎係到勁笑。
 
原來呢啲就係細路仔既溝通方式，唔需要用語言，都知道對方想講啲咩。


 
雖然係好傻的嗎。
 
小海見到我望住佢地，佢就睥一睥我，我自覺無癮，就擰埋另一邊。
 
呢個時候，有位婆婆睇完牙醫走左出黎，見到小貞同小海就好慈祥咁笑住走埋黎。
 
「小朋友，黎睇牙醫呀？」又係好傻的嗎既開場白。
 
小貞同小海都點點頭回應。
 
「我個孫好似你地咁細個既時候都係差唔多換牙啦，佢差唔到甩哂啲牙變成無牙仔。」婆婆笑笑講。
 
小海一聽到「無牙仔」呢三個字就嚇到面都青埋。
 


婆婆發現左，又笑笑講：「唔洗驚喎，好快會生返出黎，到時又靚靚架啦。」
 
小海先笑返講：「媽咪話，換牙係大個女啦！」
 
我而家先醒起，小海係有老母既，個印傭唔係佢老母。
 
婆婆再笑笑講：「係呀，你地返到去記得，要將隻牙仔擺係枕頭底，第二日起身就會變左十蚊架啦。」
 
小海聽到有十蚊，即刻雙眼發光咁回應：「十蚊？係咪真架？」
 
「係呀係呀！」婆婆講完自己都係到笑。
 
又係呢啲大人呃細路仔既故仔，不過婆婆一講完，小貞就即刻擰向我嗰邊，用一幅好期待既眼神望住我，似乎係問緊我係咪真既。
 
我笑住咁點點頭，即係我今晚要準備定十蚊啦。


 
「陳素貞小朋友，你可以入黎啦。」護士道。
 
我拖住小貞入到去，小貞見到啲大型既牙科器材好似嚇左嚇，縮左係我身後。
 
「小貞妹妹，唔洗驚架，過黎俾哥哥睇下你隻牙仔咩事。」牙醫道。
 
我拖住小貞隻小手，踎低同佢講：「小貞唔洗驚架，剝完就唔痛架啦。」
 
小貞見到牙醫戴住口罩個樣，都係淆淆地底，縮下縮下咁。
 
我笑住拍拍心口咁講：「而且有傑哥哥係到架嘛！」
 
小貞聽到我講呢句，就笑逐顏開，好乖咁走過去牙醫到。
 


護士叫小貞訓係張牙科床到，牙醫就開始幫小貞檢查牙齒。
 
牙醫叫小貞張開把口，小貞望一望我，就好乖咁張開左。
 
檢查完一輪之後，牙醫話小貞下顎都有隻蛀牙，所以會一次過剝左上面隻門牙同下面隻蛀牙。
 
小貞好緊張，握實左自己件校服。
 
「小貞妹妹唔洗咁緊張，放鬆啲得架啦。」牙醫又講。
 
我笑住咁望望小貞，小貞隻手先鬆開返少少。
 
「好啦，咁我而家先幫你打少少麻醉藥先，咁樣就唔痛架啦。」牙醫續道。
 
「小貞，好快無事架啦，傑哥哥係到。」
 
小貞點點頭，又好乖咁樣張開把口。
 
牙醫三兩下手勢，好快就幫小貞剝左兩隻牙啦，然後塞左兩塊棉花係小貞剝牙既位置，叫小貞咬住唔好鬆開。
 
小貞小心翼翼咁咬住兩舊棉花，好怕佢地會跌出黎咁，然後有少量口水又不受控咁流左出黎，應該係因為啲麻醉藥效力未過。
 
我幫佢抹左抹啲口水，小海見到小貞唔敢開口講野個樣，就係到笑勁小貞。
 
小貞尷尷尬尬咁樣摸自己個後尾枕。
 
咦喂，小貞幾時學左我個小動作架？
 
我望一望小海，俾左個「笑什麼下一個就輪到你」既眼神俾小海，小海先眼超超咁收聲。
 
護士叫我地坐係到等一等先，無幾耐，就輪到小海入去啦。
 
「陳素貞小朋友你可以過黎啦。」係櫃位既護士道。
 
我同小貞走左過去，護士就話：「呢到有啲止痛藥同棉花，隔半個鐘至一個鐘頭你可以換一次棉花，如果覺得痛既話你可以食粒止痛藥。」
 
我接過左包藥同棉花球，護士道講：「之後小貞會繼續甩牙同出新牙仔既，出新牙仔既時候可能會有啲痕，同埋小貞好易有蛀牙，爸爸要記得同佢好好咁刷牙呀。」
 
我點點頭回應，睇黎今晚要同小貞好好咁學下點樣刷牙先得。
 
俾完錢，我就同小貞講：「小貞走啦，返屋企啦。」
 
小貞開唔到口講野，唯有擰擰頭。
 
「想等埋小海？」我踎低問小貞。
 
小貞點點頭。
 
於是，我地就繼續坐係到等埋小海。
 
無幾耐，小海都出埋黎，佢好似小貞咁，含住舊棉花，塊臉漲卜卜咁講唔到野，不過佢見到小貞係到等埋佢，好似好開心咁嘴角揚一揚起左，而佢既印傭就係另一邊幫佢抹乾啲口水。
 
雖然我知咁樣好仆街，但我都係照樣咁笑勁小海。
 
小海嬲爆爆咁無視左我，坐係小貞旁邊等護士嗌名。
 
無幾耐，小海都搞掂哂所有野，佢個印傭俾完錢之後，小海就拖住小貞一齊走啦。
 
我同個印傭跟係後面，個情景好似有啲尷尬。
 
後來小貞同小海分道揚鑣，我就同小貞返屋企啦。
 
過左一個鐘之後，我叫小貞張開口俾我睇下，我拎走左舊棉花，發現仲有少少血滲出黎，所以我幫佢換左舊棉花，叫佢繼續咬住。
 
小貞好似咬到好攰咁，悶悶不樂。
 
「咬多陣就無事架啦，小貞乖。」我摸摸小貞個頭仔講。
 
小貞點點頭，然後係書包到拎左本手冊出黎，我望一望，上面寫住今日既功課係親子勞作──紙盒。