突然做左人地老豆，多左個女: 19
「Hi, 阿傑！」
眼前，出現左北川景子，呀，唔係，係Yan。
「Hi, 乜咁啱既？」好老土既對白。
「係呀，個地產經紀話呢到有個唔錯既樓盤放租，所以我過黎睇下。」Yan笑笑回答。
望住佢嗰把有少少嘟起既嘴唇，嗚哇真係好似北川景子。
「你唔好同我講係嗰棟大廈呀？」其實我都係求其指住林太住既地方架姐。
「係呀！你點知架？」Yan好驚訝咁拍左下手掌。
屌！我亂鳩估架咋！
「哈哈……我求其估架咋……」我尷尬咁摸摸後尾枕，再問：「但你同你細佬兩個人住呀？負擔得起咩？」
「哦，都ok既，我畢左業出黎做緊會計。」
哦，原來係會計師。
「做會計唔係好忙架咩？你點照顧到瑜仔？」我問。
「都ok既，因為老闆知道我既情況，而且佢都好信得過我，所以都俾我拎返啲野返屋企做。」
呢個老闆真係香港社會難得既清泉黎。
「咁你地幾時會正式搬過黎？」
「都未定，要睇埋先，不過暫定過埋個暑假先。」Yan笑笑答。
「好啦，咁我唔阻你去睇樓啦，byebye。」我揮揮手講。
「嗯，byebye。」佢揮揮手回應。
同一區將會多個靚女，好事黎既。
話咁快又到左小貞既放學時間，我過左去幼稚園接小貞，見到小貞同巴渣雙馬尾已經手拉住手咁樣玩緊芭芘。
細路仔既友誼真係黎得好快，但同時我又擔心會去得好快，擔心小貞會俾呢個巴渣雙馬尾恰，不過諗返Yan講既說話，細路仔總係要遇到啲挫折，俾人拒絕下先會學識接受自己，雖然小貞所遇到既挫折已經有好多。
有時候自己都好矛盾下，想佢自己學習點去處理，但又擔心會對佢做成心靈創傷。
「傑哥哥！」小貞一見到我，就好興奮咁撲埋我個身到，睇黎佢今日心情唔錯。
我望一望雙馬尾，佢又做左個鬼臉俾我睇，我笑笑回應，唔多唔少都係多得雙馬尾陪住小貞。
雙馬尾見我笑，自覺無癮就行開左。
「Hello, 小貞爸爸！」Miss Cheung笑笑咁走左過黎。
「Hi, 你無事嘛？」我關心問。
「無事喎！放心啦！」Miss Cheung笑得好燦爛，又露左兩粒虎牙出黎，好可愛。
希望佢唔係勉強緊自己啦。
同Miss Cheung道過別之後，我就同小貞行返屋企，中途，我忍唔住俾左林文龍幅畫俾小貞。
小貞望左望，然後笑左笑。
「小貞，有無唔開心？」我踎低問。
「無呀。」小貞笑得好燦爛咁答。
「但林文龍佢走左喎……」我擔憂咁講。
「佢都無走到。」小貞答。
「嗯？」
小貞用自己既小手噤住左自己既心口，好天真咁笑住講：「佢係我呢到。」
嗚哇！！！小貞你幾時係邊到學埋啲咁煽情既動作架！！！
攬左陣小貞，去左老母到拎左啲飯餸，因為老母今晚要去飲，家姐同阿南都要返工，所以唔同我地食啦，我拎左啲飯餸返去整熱同小貞兩父女撐枱腳。
食食下，小貞好似無咩胃口咁，個嘴嘟下嘟下咁。
「小貞，啲野唔啱食呀？」我問。
小貞擰擰頭。
我走埋去小貞身邊，踎低問：「咁做乜食咁少？」
小貞扭扭擰擰咁，好似有難言之隱。
「因為唔開心？」我再問。
小貞又擰擰頭，然後打開個嘴巴，用手指擢住前面左邊隻門牙，講：「痛……」
我用手輕輕掂一掂隻門牙仔，佢搖搖欲墜。
係喎！小貞係時候要換牙啦！
見到隻搖搖欲墜既牙齒同埋小貞扭扭擰擰既樣，我真係好想幫小貞剝左隻門牙佢，不過係呢個時候，梗係call左老母問左先啦。
「嘟……嘟……嘟……」
「屌你呀！我返緊工架！」聽電話既，居然又係家姐！
「屌！點解係你架？」
「屌！咪撚係小貞面前講粗口呀！」
屌！你係電話到就可以講！好唔公平呀！
「係係……對唔住……」
「打黎做乜呀？」
「你都未講你做乜拎左老母部電話。」
「我部iphone壞左呀，拎左去整，咪拎住老母部電話先囉。」
「哦哦……」
「咁你講得你乜事未呀？」
「係咁既，小貞佢好似換牙呀，佢隻門牙郁下郁下咁。」
「你咪撚諗住好似阿媽以前咁，用條線綁住我地隻牙，另一邊綁住道門，一開門就整甩我地隻牙呀，痛到叫哂老母架！」
哎……其實我的確有咁諗過……
「唔……唔係……」
「你咪撚搞小貞隻牙呀，你聽日帶佢去睇牙醫啦！」講完，又收左線。
好啦，既然家姐咁講，我唯有忍住手先啦。
不過真係好難忍呀，就好似你望住粒就爆就爆既暗瘡咁，你真係好想用手去搣佢，等佢可以火山爆發，雖然你明知咁樣搣會留疤，但係你真係好想去搣佢呀……
望住小貞依然悶悶不樂咁既樣，我又怕會整痛佢，所以都係算啦。
我走左過去，拎左小貞隻叉，吉左舊西蘭花，擺左係佢左邊嘴角。
「小貞，我餵你食啦。」我笑笑說。
小貞點點頭，然後張開左嘴巴，「呀！」
我將舊西蘭花放入小貞既嘴角邊，希望唔好掂到佢隻門牙，咁佢就無咁痛啦。
小貞好聽話咁食左舊西蘭花，一啖一啖咁慢慢咬，食完之後笑左笑，又張開左嘴巴，等待我餵第二舊。
睇黎呢個方法幾好。
慢慢餵下餵下咁，小貞終於好順利、好開心咁食哂成餐飯。