突然做左人地老豆，多左個女: 18

話咁快又過左個週末，又到左返幼稚園既日子，今日小貞有體育堂，所以換左套體育服，黃色既上衣同黃色既褲仔，手臂位同埋褲腳位都有條綠色既條紋點綴著，加埋小貞笑到眯埋雙眼既笑容，真係好似成朵太陽花一樣燦爛。
 
小貞換褲仔時，褲腳位有少少唔夠長，我即刻抱起小貞埋去度高，一度，果然真係高左1cm！小貞開心到彈下彈下咁！
 
去到幼稚園，唔見Miss Cheung，不過聽到有一、兩個師奶係到竊竊私語。
 
「聽講吳富友個爸爸尋日打佢老婆打得好勁，要call埋白車添。」
「係呀，我住係佢地對面大廈，買餸既時候見到有白車咪走埋去八掛下囉，先知佢地嘈到啲鄰居都出哂黎睇咩事。」
「後來呢？後來點嘛？」
「後來好似話個老婆住院，個爸爸就俾警察拉左，吳富友就暫托左俾啲社福機構，所以今日唔會返學架啦。」


「打女人已經唔啱架啦，最陰公係個細路呀。」
「嘖，你都唔識個大陸女人，話唔定係個大陸女人去勾佬，俾綠帽俾個男既戴呢。」
「分分鐘吳富友都唔係個男既親生。」
 
呢班八婆，人地屋企發生啲咁既事，仲好意思係到講人壞話？
 
「我今朝一黎到，就見到校長惡巴巴咁叫個Miss Cheung入去校長房啦。」班八婆繼續講。
「梗係啦，Miss Cheung係吳富友班主任黎架嘛，發生咁大件事，佢肯定俾人照肺啦！」
「但成件事關Miss Cheung咩事？」
「你又唔好咁講呀，佢身為班主任但佢監管不力先會發生啲咁既事。」


 
仆你個街！Miss Cheung都已經將呢件事交左俾社工處理，你仲想佢點？人地要家暴佢都控制唔到，唔通你想人地埋去擋呀？
 
呢班不負責任既花生友真係死淨把口！無得救架啦佢地！
 
「呀係喎，點解唔見林太既？」其中一個師奶繼續講。
 
的確，呢啲師奶吹水團居然無林太係到。
 
「乜佢無同你講咩？佢今朝返黎遞左信退學啦。」


「吓？退學？」
「係呀，佢話今朝收到通知，佢個仔之前見嗰間名牌幼稚園收左佢個仔，所以今日就去做註冊啦。」
「哇佢就好啦！生到個咁叻既仔！」
 
乜話？佢又話反省左既？無啦啦又突然要個仔去讀名牌學校？佢反省左係邊？
 
我望一望小貞，難得小貞開始可以同其他細路混熟，但而家竟然一次過失去左技安同出木杉，小貞又要重歸寂寞……
 
但係小貞好似無乜野咁，笑住咁同我講byebye就入左去幼稚園，到底佢係習慣左分離，定係未意識到兩位朋友已經唔係身邊？
 
「喂！怪叔叔！我條鞋帶鬆左呀！但係我個工人走左呀！你幫我整啦！」
 
我低頭一望，屌！又係嗰個巴渣雙馬尾！
 
「我又唔係你工人，我做乜要幫你？」我嗟之以鼻。


 
「我唔識呀！！！」佢咆哮著。
 
「唔識咪學囉！！！」我學佢咁咆哮著。
 
「無人教我點學呀！！！」佢再咆哮。
 
好啦好啦，無人教你咁我教你囉。
 
教左佢點綁鞋帶之後，諗唔到佢又好好禮貌咁同我講左句多謝。
 
「吳富友同林文龍今日都唔會返黎。」
佢無啦啦彈左呢句野出黎，我俾唔切反應。
 
「你個女一定好悶架啦，等我幫你陪住佢啦。」佢講完之後就走左過去拍一拍小貞，拖住小貞隻手一齊行，然後突然又擰返轉頭同我做左個鬼臉。


 
屌！原來係個咁向左走向右走早熟既小傲嬌黎！
 
但係望住佢地手拖住手咁樣入去課室，我忽然又唔想放棄，我想為小貞做返啲野。
 
我走埋去班師奶到，問：「你地知唔知林太住係邊？」
 
班師奶聽見我咁樣問有啲錯愕，我就同佢地解釋，話因為小貞同林文龍好好朋友，我想佢地可以好好咁道別，於是啲師奶都心軟肯講個地址俾我知。
 
根據班師奶俾既地址，去到林太屋企樓下，一望，就見到林太成家人都係搬搬抬抬，當然林文龍都係到。
 
「Hi, 林太。」我走埋去同林太講。
 
林太見到我先係驚訝，然後簡單咁向佢老公介紹左我，再問：「你點解會係到既？」
 


「係咁既，我聽聞你個仔退左學，所以過黎關心下。」
 
「哦，有心啦有心啦。」林太笑笑講，「其實唔止退學，我地仲要搬啦。」
 
「點解咁突然？」我其實好想鬧佢唔係反省左啦咩，不過我忍住先。
 
「我地都覺得好突然，不過個仔之前見嗰間幼稚園肯收佢，咁我地梗係去嗰間啦！」林太續講：「我地一向決定左，如果間名校收左個仔，我地就搬去嗰到附近，所以其實係咩都睇定哂架啦。」
 
「你唔係話，唔會再逼林文龍架啦咩？你知唔知咁樣突然轉校，細路仔既心理壓力會好大？」我忍唔住爆發啦。
 
「唉吔，咁而家有名牌幼稚園收左我個仔，唔通我唔去咩？你都傻既！」講完之後，佢就繼續去幫手搬野，無理過我。
 
反省？你反撚省左去邊？
 
到頭來，原來我乜都做唔到，乜都改變唔到。


 
林文龍見到我，就走過黎我到，遞左幅畫俾我，上面好粗糙咁畫左個細路仔拖住個細路女。
 
「呢個係週末功課黎，你可唔可以幫我交俾小貞？」
 
仆街仔！要交你自己交！
 
「我唔會幫你，你自己交俾佢啦。」我冷冷地道。
 
「唔交就無機會架啦……我要走啦……」林文龍眼紅紅咁講。
 
我望一望林太嗰邊，佢同佢老公的確好落力咁搬緊野，似乎心意已決。
 
我唯有慨嘆，即使口裡面話自己有幾咁錫個仔、為自己個仔好，但其實最自私，最忽視個仔既感受既，依然係佢地。
 
我接過林文龍手上幅畫，同佢講：「唔好忘記小貞。」
 
林文龍係紅眼中強行擠出一點微笑，「一定唔會。」
 
最後我咁大個人就同左個細路仔打勾勾
 
既然我改變唔到啲乜野，我唯有係whatsapp安慰Miss Cheung。
 
「聽講你俾校長照肺」
「係呀」Miss Cheung秒回。
「唔洗上堂咩?」
「我空堂」
「對唔住…… ?」
「點解要講對唔住? ?」
「諗住幫你關心下吳富友個家庭, 但最後乜都做唔到」
「傻啦, 係我個責任黎?」
「唔係, 你已經做得好好」
「ok喎, 我真係無事, 我已經慣左☺」
「慣左d乜?」
「慣左人係一種既無助又無用既生物」
 
突然間，我唔知點回覆好，佢講得好有道理，我竟然無力反駁。