突然做左人地老豆，多左個女: 15

我拖住小貞走左過去，好清晰咁見到嗰個真係Miss Cheung黎。
 
「Hi, Miss Cheung!」我係佢面前揚一揚手。
 
佢見到我，佢好驚慌，驚驚青青咁樣將一盒包裝係粉紅色既藥收埋係個袋到。
 
「呀！小貞！小貞爸爸！」
 
「買感冒藥呀？」我笑笑問。
 


「係呀係呀。」佢尷尷尬尬咁答。
 
屌你咩！乜有感冒藥個盒係粉紅色架咩？你唔撚係真係當我睇唔到呀嘛？
 
「你地行街呀？」Miss Cheung摸摸小貞個頭，扯開話題。
 
「係呀，啱先去完健康院，而家諗緊去邊到食野好。」
 
「不如一齊啦？我都好肚餓啦！」Miss Cheung摸摸自己個肚道。
 


「好呀，咁你想食咩？」澤勁英龍華叫到我又唔驅既。
 
「嗯……對面就係明將啦喎！不如去試下囉！」Miss Cheung興奮地道。
 
屌！唔撚係呀嘛？你知唔知明將最出名係咩？最出名係好撚難食呀！揚威國際嗰種難食呀！你竟然話食明將？仲要帶埋個細路女？
 
「其實……我未食過明將架……啲人成日講，所以我好好奇……」Miss Cheung用左一個含情默默既眼神望住我，就好似同緊我講：「我很想要。」咁。
 
「食明將唔係唔好……但你知唔知明將點解會咁出名？同埋你啱啱先病好，食壽司會唔會唔太好？」
 


「我ok架！已經好返好多！」佢笑笑，再問小貞：「小貞你想唔想食壽司呀？」
 
只見小貞一臉疑惑，「乜野係壽司呀？」
 
「呀！原來小貞未食過壽司架！咁更加要去食啦！」Miss Cheung一臉興奮。
 
我未回應，佢就已經拖住小貞隻手，「好啦！我地行啦！」
 
我好希望小貞食完之後唔會從此討厭壽司。
 
講到明將，要打大佬就梗係要入去西九龍裡面嗰間，不過最近佢轉左規模，轉行做韓日燒自助餐廳，天真咁以為改左個名就可以改變劣食既命運，其實裡面個涵係一好樣，不過Miss Cheung似乎係想近近地去左西九對出嗰間明將。
 
不過唔緊要啦，都係劣食，一樣架姐。
 
因為我地早去，所以無咩人，唔洗排隊就已經入到去，以前三十蚊都唔洗既放題，而家已經去到五十幾，屌！劣食都咁撚貴！


 
我地搵左個近迴轉位既四人位坐低左，右手邊既四人位就坐住左四個著左校服既學生哥，目測係中學雞黎。
 
「屌！就黎考dse咁撚緊張都仲要走過黎食明將！」其中一個比較瘦既學生哥講。
 
「唔食明將補充下體力等陣點去自修室溫書呀！」另一個比較肥既學生哥講答。
 
「屌！溫乜撚野書呀你！溝女咋呱！」有一個條頸比較長，好似長頸鹿咁既學生哥一邊大大力拍住肥嗰個既背脊講。
 
「屌你！一樣姐！」
 
「快啲嗌野食啦！好撚肚餓啦已經！」最後一個塊臉好似火山爆發咁既學生哥講。
 
Miss Cheung望一望我，再講：「佢地講咁多粗口，我地洗唔洗調位？」
 


「唔洗啦。」我揮一揮手，心裡面嗰句係，我仲爛口過佢地啦。
 
「但係會唔會怕小貞聽到……」Miss Cheung好擔憂咁望住小貞。
 
「唔緊要架，我覺得唔需要太過刻意去迴避呢啲野，我做老豆既就話要做榜樣唔講得姐，不過佢地係街外人，唔多唔少都要接觸下世界，小貞先會成長。」
 
其實我係鳩up架姐，我真正目的係想透過呢四個人睇下以前既自己有幾撚傻的嗎。
 
「你都講得幾有道理。」Miss Cheung笑笑，「咁我地都嗌野食啦。」
 
「小貞想食啲咩呀？」Miss Cheung好溫柔咁樣問小貞。
 
Miss Cheung一問，隔離嗰四個學生哥就望左過黎，仲眼甘甘咁望住Miss Cheung。
 
我知佢地心裡面諗緊乜，諗緊澤勁英龍華呀嘛！


 
「我想食蟹柳！」小貞用住比卡超聲線講。
 
小貞一出聲，嗰四個毒撚就轉移視線望住小貞，講左句：「哇好可愛呀！」
 
「好想搣佢塊面珠墩！」
「屌！又澤勁英龍華又蘿莉，條好樣就正啦！」
「真係好想佢走過黎同我講句加油呀……」
 
屌！你地班仆街仔，唔係以為細細聲講我就聽唔到呀嘛？
 
「小貞！」我叫一叫小貞。
 
小貞疑惑地望住我。
 


然後我哄個身埋去小貞到，細細聲同佢講：「你過去隔離啲哥哥到，同佢地講：『考dse要加油呀！』咁啦！」
 
之後小貞就好聽話咁走左去隔離，同班學生哥講：「哥哥，你地考dse要加油呀！」講完就走返過黎啦。
 
班學生哥一聽到，即刻紅都面哂，應該係覺得自己柒左，但又覺得小貞好可愛咁啦，佢地唔敢再亂講野，只係好乖咁係到討論食啲乜。
 
Miss Cheung都忍笑忍到塊臉紅哂，淨係喺到講：「快啲諗下食咩啦。」
 
最後我地拎到成枱都係壽司，小貞試左一啖壽司之後即刻嗱埋哂口臉，Miss Cheung唔信邪，大大舊咁樣塞入去自己把口到，結果差啲吐埋出黎。
 
我笑勁佢地，但其實自己都食緊。
 
「唔得呀小貞，我地要珍惜食物，點都要食埋落去架。」Miss Cheung意志好堅定咁講。
 
老師果然係老師，連食劣食都可以作為教材。
 
Miss Cheung見我笑緊佢，佢就話：「都係你衰！做咩唔一早話俾人地知喎！」
 
「我見你咁興奮，就無謂打擊你啦。」
 
Miss Cheung嬲一嬲，就挾起塊壽司，成舊塞左入我個口到，「你都要食呀！」
 
仆街仲要嗌到成枱都係，點撚食呀。
 
我見小貞已經投哂降，伏左係枱到慢慢梅舊飯。
 
突然靈機一觸，諗起中學時候既仆街野，就係將啲飯痴埋係另一隻碟既碟底到，再層層疊疊高佢，收碟既人成棟咁樣拎走就唔會發覺。
 
但係當Miss Cheung見我咁樣做之後就即刻喝住左我：「喂！你唔可以咁樣浪費食物架！」
 
「唉，Miss Cheung，你真係一個好老師。」
 
「我邊係好，校長都唔覺得我好。」Miss Cheung嘆息道。
 
「咦，你似乎有啲野想講喎？」
 
「做好老師真係好難架……」
 
「唔係呀，尋日林文龍個老母係到發哂爛渣，幼稚園啲老師個個都唔敢出聲，我嗰陣時都不知幾想你係到，你係到既話一定解決到件事。」
 
Miss Cheung笑笑，「佢地仲後生，好多野都未識點去處理，不過就算我係到，都未必做到啲咩。」
 
「唔係呢，你係我心目中真係一個好老師黎！」
 
「最衰校長唔係咁諗呢……」
 
「點解咁講？佢同你講過啲咩？」
 
「佢話我唔應該理咁多事，要學識明哲保身，總之咩都要讚學生、讚家長，如果唔係人地投訴起上黎，毀既係我地學校既聲譽。」
 
「哈，呢個校長真係仆街黎。」
 
「而家香港既教育方針就係咁，最緊要賺錢，其他野最好交哂俾社工處理，一層推一層，每個人都變得好不負責任。」
 
「睇黎你做到好灰咁喎。」
 
「哈，都幾架。」
 
我挾左舊壽司擺係Miss Cheung隻碟到，「賞你一舊壽司，唔好唔開心啦。」
 
「哇，真係好多謝你喎。」Miss Cheung戚一戚眉恥笑道。
 
幾經辛苦終於食完餐飯，簡直就好似打左十萬回LOL咁，連迴腸盪氣既時間都無，死過返生咁。
 
真係好驚今日返到去會痾到好似一劈爛泥咁。
 
「傑哥哥，我肚痛……」小貞話。
 
死啦，出事啦，食明將食出事啦！
 
「咁點算呀小貞？」我慌張咁踎低問小貞。
 
「我想去廁所……」小貞摸住自己個肚子，左扭右扭咁，好似好唔舒服咁。
 
但係，呢到係街黎，我點同你去女廁呀？
 
「小貞，我同你去廁所啦。」Miss Cheung就好似天使一樣出現，拯救左充滿困惑既我。
 
「拜託你啦Miss Cheung！」
 
「傻既，你係到等我地啦。」
 
見到Miss Cheung拖住小貞去廁所既倩影，我忽然覺得，其實小貞有個老母係身邊都係件好事，最起碼有好多女仔野我唔識，將來小貞大個左，流第一滴M時，我都唔知點同佢講好。
 
好似扯遠左，總之見到Miss Cheung拖住小貞個背影，我就覺得好溫馨，但點解我會有咁既諗法呢，我自己都唔知道。
 
話咁快，小貞就解決左出返黎，佢嘻嘻哈哈咁跳下跳下，似乎成身都鬆哂咁。
 
「好啦，咁我地之後去邊？」Miss Cheung笑笑問。
 
嗯……其實我真係無諗，本身打算同小貞去完健康院之後就返屋企訓教，但估唔到會撞到Miss Cheung，仲一齊食明將添。
 
Miss Cheung見我揸唔定主意，於是就話：「我知附近有間柴犬寵物店，我想去睇下呀。」
 
「小貞，想唔想去睇狗狗呀？」我問小貞。
 
「好呀！」小貞興奮咁舉起雙手答。
 
然後我拖住小貞既左手，Miss Cheung拖住小貞既右手，一人一邊咁行去寵物店。
 
「哎呀，咁好一家人黎睇狗呀？」寵物店既老闆娘講。
 
我尷尷尬尬咁樣摸自己後尾枕，而Miss Cheung就只係笑笑回應。
 
小貞一臉好奇咁凝視住櫥窗到既柴犬，眼都唔貶下。
 
「小妹妹，你想唔想抱佢呀？」
 
小貞點點頭，用充滿期待既眼神望住老闆娘。
 
老闆娘打開櫥窗，拎左隻棕黃色既柴犬仔出黎，柴犬仔好得意，一見到小貞就好興奮咁擺哂尾，仲想撲埋去小貞到。
 
不過小貞完全唔驚，仲向柴犬伸出手，迎接佢既到來。
 
老闆娘小心翼翼咁將柴犬捧到小貞身上，小貞唔係好敢用力去抱，好似怕會整傷隻柴犬咁。
 
「小妹妹唔洗怕架，你抱實佢啦，唔係佢會跌架。」老闆娘笑笑講。
 
小貞點一點頭，然後抱實左柴犬，唔知係隻柴犬本身好乖，定係小貞抱得好好，柴犬好舒服好安心咁樣攤左係小貞既懷抱到。
 
兩樣咁得意既野痴埋一齊，成個畫面真係好治癒。
 
「咔嚓！」我拎左部手機出黎，忍唔住影左呢幕。
 
小貞笑得好開懷，柴犬亦都好舒服。
 
Miss Cheung見到都忍唔住係咁影相。
 
「小妹妹，你咁鐘意佢，佢又咁鐘意你，有無諗過帶佢返屋企呢？」
 
黎了黎了，老闆娘黎了。
 
只見小貞眼甘甘咁望住柴犬，唔知佢諗緊啲咩。
 
「小貞。」Miss Cheung踎低左，好慎重咁對住小貞講：「養狗狗係一生一世既承諾，你有無信心自己可以照顧佢一生一世？」
 
小貞依然眼甘甘咁望住柴犬，或者佢仲細，根本唔明白咩係一生一世既承諾。
 
我諗Miss Cheung都無諗過小貞既反應會咁大。
 
正當我想拖返住小貞，同小貞講你再大個啲時先養既時候，小貞就講：「狗狗唔洗怕，一定會有人錫你架，拜拜啦。」
 
最後小貞俾返隻柴犬俾老闆娘，捉返住我隻手，微笑住講：「傑哥哥可？」
 
「係呀。」我摸摸小貞個頭回應：「一定會有人好錫佢，就好似小貞你咁。」
 
小貞聽到之後格格聲咁笑，好開心咁拉住我同Miss Cheung離開左間寵物店。
 
「好啦，我都要返屋企啦。」Miss Cheung笑笑講。
 
歡樂既時光過得真係快，認真好唔捨得，雖然過多一、兩日我地又會係幼稚園見面。
 
「小貞，同我goodbye kiss啦。」Miss Cheung將自己隻手放係嘴唇邊，然後再放開，做左個goodbye kiss既動作。
 
嗚哇，我都好想同Miss Cheung goodbye kiss！
 
然後小貞就跟住Miss Cheung做左相同既動作，「啜！Byebye Miss Cheung！」
 
嗚哇，我更加想同小貞goodbye kiss！
 
「多謝你陪左我地成日。」我笑笑口咁同Miss Cheung講。
 
「你陪左我就真！我地返去再whatsapp講啦！Bye Bye！」Miss Cheung揮一揮手就走左。
 
望住天色逐漸昏黃既我，真係好唔捨得。