突然做左人地老豆，多左個女: 16

話咁快，又到左星期日，小貞成為左我個女都差唔多有兩個禮拜啦，但係呢兩個禮拜就好似發生左好多事咁，我由一個夜夜笙歌，虛耗人生既毒撚，變成一個要有腰骨有膊頭既老豆，呢一切一切，都係因為有小貞既存在。
 
雖然當初唔係咁願意做人老豆，但我無後悔，亦都証明我既決定係正確既。
 
望住小貞挨住我手臂，訓得好冧，個嘴嘟下嘟下個樣，我就好想好好咁照顧佢，令佢可以健康快樂咁長大成人。
 
或者呢啲就係做人老豆既心情。
 
今日係星期日唔洗返幼稚園，所以我唔捨得叫醒小貞，小貞可能係尋日玩得太攰，今日都訓得好晏。
 


我望住小貞訓教個樣，望左好耐好耐，耐到都唔知時間，然後輕輕咁係佢個額頭仔到錫左啖。
 
「嗯……」
 
哎，我又搞醒左佢。
 
小貞用小手擦一擦眼晴，輕輕咁打左個喊露，然後笑眯眯咁同我講：「早晨傑哥哥。」
 
「早晨呀小貞，今日早餐想食啲乜呀？」
 


小貞眼眨眨咁諗左一諗，「傑哥哥食乜我就食乜！」
 
我笑笑，尋日聽醫生講小貞要食多啲有營養既野先會快高長大，我決定今日就自己落廚，煮餐好美味既早餐俾小貞！
 
同完小貞梳洗過之後，我打開雪櫃，發現有蛋、番茄、西蘭花、香腸同幾盒鮮奶，睇黎尋日老母聽左我講見完醫生既情況之後，就靜靜雞叫阿南買左啲野食送上黎我到。
 
我決定今朝就簡簡單單咁煮番茄炒蛋、煎腸仔同埋蒜蓉西蘭花。
 
小貞企係廚房門口，間中伸個頭出黎裝下裝下咁，似乎好好奇我到底係到做緊乜。
 


我揮一揮手叫小貞入黎，小貞問：「傑哥哥係到做緊乜？」
 
「我係到煮緊早餐俾你食呀小貞。」我一邊炒緊隻蛋，一邊回應小貞。
 
小貞聞到陣陣既蛋香味，然後用充滿期待既眼神話：「哇！乜傑哥哥識煮野食架？」
 
「梗係識啦！咁小貞想唔想食先？」
 
「想呀！傑哥哥好叻叻！」小貞笑嘻嘻咁舉起隻手指公。
 
我即刻成個心都甜哂，「好啦，咁小貞過去倒啲牛奶落個杯到，然後坐定定等我啦。」
 
「知道！」
 
小貞好笨拙咁樣用兩隻小手捧住盒1L既牛奶，然後小心翼翼咁將啲奶倒落兩個杯到，再好乖咁坐低左。


 
我好快咁煮好個早餐，就捧出黎一齊食啦。
 
食食下，小貞走左去自己個書包到，拎左張細紙仔遞過黎俾我睇，上面好粗糙咁寫住左個電話號碼。
 
「乜黎架小貞？」我問。
 
「龍龍個電話號碼。」
 
「龍龍？係指林文龍同學？」
 
小貞點點頭。
 
「你想我打俾佢？」
 


小貞再點點頭，「佢……佢叫我今日打俾佢……」
 
「打俾佢做乜？」
 
「佢話一齊去公園。」
 
嗚哇，出木杉你既溝女技巧真係好高明呀，咁細個就已經識得如何約女神！
 
我照住紙上既電話號碼打過去。
 
「嘟……嘟……嘟……」
 
「喂？」等左一陣，有個女人聽左電話，我諗應該係林文龍個老母。
 
「喂，你好呀，請問係咪林太？」


 
「係呀，我係。」
 
「我係陳素貞既家長呀。」
 
「哦，嗰日話醒我嗰個哥哥仔呀嘛，你點會有我電話號碼？」
 
「其實係林文龍同學俾小貞既……」
 
「哦，咁有咩事呢？」
 
「我都唔太清楚，不如你俾你個仔聽下？」
 
「好呀，你等等呀。」林太講完之後就大嗌，「仔呀，聽電話呀！」
 


然後我就俾左部手機俾小貞，小貞小心翼翼地接過，輕輕咁講：「喂……」
 
「嗯……嗯……」
 
屌！我應該學家姐嗰招──開擴音！而家唔向撚知佢地講緊乜啦！
 
小貞「嗯」左幾句之後就收左線，同我講：「龍龍話係學校附近個公園等喎。」
 
屌！條仆街仔咁快就約到小貞！
 
我忽然覺得好有危機感呀！小貞會唔會就咁離開我架？但佢明明得五歲咋喎！仆街仔唔好搞我小貞呀！你毛都未生架！
 
我嬲爆爆咁樣幫小貞執左啲餅乾同水樽，仲有上次係士多舖買既吹氣泡泡都拎埋過去，小貞揹住個鴨屎黃色背囊仔，著住件白色上面印住隻鴨仔既短袖T，下身就著左條紫色泡泡褲，然後著住對有黃色條紋既波鞋仔，另外再帶多件純黃色薄薄地既外套。
 
小貞雖然見到我嬲爆爆咁，但因為佢太興奮啦，所以選擇左無視我。
 
林文龍你好耶！今次你贏左！
 
踩住單車帶小貞去到公園，林文龍同林太就迎面而來。
 
「小貞！」林文龍高高興興咁揮手。
 
「你好呀小貞，小貞老豆！」林太笑笑道。
 
「你好呀，林文龍今日唔洗上興趣班既？」我問。
 
「唉吔！我俾你話醒左架啦！返到屋企老公都話過我，話我太緊張啦，咁樣對個仔唔好！」林太再講：「阿仔話今日想去公園玩，我咪帶佢黎囉！」
 
「哈哈，咁咪好囉。」
 
係我地吹緊水既時候，小貞同林文龍已經手拉住拉咁樣走左去公園玩！
 
係手拉住手呀仆街！！！
 
仆街如果你唔係個細路，你睇下我打唔打柒你！！！
 
正仆街仔黎！！！
 
小貞同林文龍玩緊瀡滑梯，我就去搵張長凳坐低左，唉，望住小貞同林文龍咁有活力咁樣玩緊，我就覺得自己忽然變得好老，成個阿伯咁。
 
公園到除左小貞同林文龍之外，仲有好多細路同埋其他師奶，林太就走過去同佢地吹水，我諗啲師奶都係林太既朋友黎，師奶既吹雞能力真係唔可以睇少。
 
「小貞同林文龍去左公園玩?」、「小貞同佢既同學仔去左公園玩?」。
 
無聊既時候就梗係要搵部手機出黎玩啦，我分別將呢兩個訊息前前後後咁樣whatsapp俾Miss Cheung、阿南同家姐，再影埋張公園毒照，獨毒毒不如眾毒毒。
 
「佢地感情真係好好呀 
btw林太竟然肯帶龍仔去公園玩  」Miss Cheung又秒回。
 
「梗係啦, 嗰日我幫你鬧醒左佢啦!  」我回覆。
 
「你真係好西利呀  」
 
嗚哇又係心心！
 
其後阿南同家姐都whatsapp左過黎，話好想同小貞玩，所以等陣會一齊過黎。
 
我望住小貞，佢地似乎係到玩緊「家家酒」遊戲，即係扮人老豆老母嗰種呢，每個細路都會玩過啲咁無聊既遊戲。
 
小貞似乎係扮緊老母，唔知邊個拎左盒「煮飯仔」出黎，小貞就拎住把玩具刀係到扮切紅蘿蔔，唔知佢到底係到扮緊我老母定係扮緊我呢？
 
「老婆，我好肚餓啦。」個仆街仔林文龍好厚顏無恥咁講。
 
屌！真係好想兜巴兜巴咁星過去條仆街仔到！老婆呀嗱！老婆呀嗱！老你條jj呀老婆！
 
小貞只係笑笑，無回應佢。
 
小貞做得好！咪撚理呢條仆街啫！
 
「嗚……」另一邊，突然有個細路仔係到喊緊，眼大大，將來應該會係個靚仔，不過喊成咁，真係乜撚野霸氣都無撚哂。
 
聽到個細路喊，有個妙齡少女就走左過黎，目測應該係二十歲出頭，紥住條馬尾，波唔大不過有瓜子臉，高高瘦瘦咁，有啲似北川景子，跑過黎嗰陣時好有青春好有活力。
 
「做咩事呀瑜仔？」北川景子踎低好溫柔咁問。
 
「佢地……佢地唔俾我玩波……波波……」叫瑜仔既喊包邊喊邊講，喊到連鼻涕都流埋。
 
「你有無好好咁問過佢地呀？」
 
「有……嗚……」
 
「瑜仔，我講過，就算你好有禮貌咁樣問人地可唔可以分享啲野俾你，人地都可以唔分享俾你架喎。」北川景子再講：「因為啲野係人地架喎，人地有權唔俾你，你亦都唔可以怨人地架，你要學識接受，得唔到呢樣野，你可以去玩其他野，唔分享既小朋友並唔係唔啱架。」
 
聽君一席話，勝讀十年書。
 
呢個女仔既思想真係好特別，我從來無諗過有人會去教導細路仔唔好去怨唔識分享既人，反而要佢學識接受。
 
細個嗰時成日同家姐爭玩具玩、爭野食，當我爭唔過家姐時，老母總係會話家姐要識分享，要錫細佬，但從來無講過我要學識接受，或者係啲咁既思想教育下，大個左就會覺得有好野就一定要分享俾人，如果你唔分享，人地憎你係正常咁。
 
聽到北川景子咁講，我頓時覺得豁然開朗咁，我好想認識佢。
 
於是我走左埋去，同佢講：「你既思想真係好特別，點解你會咁樣教細路？」
 
佢見我咁突然走過去，佢有少少愕然，「吓？好特別咩？」
 
「係呀，一般家長都應該會走過去對方既家長到，話佢地唔識教仔，教到個仔唔識同人分享，但你唔同，你竟然要個仔學識去接受。」
 
「其實我覺得而家啲細路太脆弱啦，少少野唔合心意或者受到少少既挫折，就要生要死咁，就係因為佢地唔識去接受失敗，唔識去接受挫折，更加唔識去面對一個咁唔完美既自己，可能就係因為細個嗰陣時大家都教佢要分享，但都忘記左教佢要接受他人既拒絕。」佢頓一頓，再講：「就好似學業或者愛情咁，如果遇到挫敗或者係俾人拒絕之後，淨係識得怨人地、恨人地，而唔識得諗下自己有邊到要改進，咁人係永遠唔會成長。」
 
佢望一望喊緊既嗰個細路，溫柔地摸一摸細路既頭，再講：「瑜仔係一個好眼淺既細路，我想佢學識堅強。」
 
「你真係好特別。」
 
聽到我咁讚佢，佢笑笑咁講左句多謝。
 
「不過點解我係呢區從來未見過你既？你睇落去好後生，咁快生左個仔？」我再問。
 
「佢唔係我個仔黎架，佢係我細佬。」佢笑笑答。
 
「細佬？你兩個既年齡差距都好大喎。」
 
「正確啲黎講佢係我後母同我爸爸生既細路……」
 
「哦，原來係咁。」
 
「其實我地將會搬過黎呢區，所以走過黎視察下環境既。」
 
「哦……但唔見佢老豆老母既？」
 
「我媽媽早死，爸爸臨老既時候娶左個大陸女人，諗住佢會照顧爸爸，最後佢生左瑜仔無耐，爸爸就過左身，個大陸女人就丟低左瑜仔跟佬走，所以而家由我黎照顧瑜仔。」
 
又係一個無人性既故事。
 
「哦……真係唔好意思……」
 
「哈哈，唔緊要，打好未來鄰里既關係都好重要既，係呢咁你……？」
 
「我有個女架，佢係……」
 
正當我想指住小貞既時候，我先發現唔見左小貞同林文龍既蹤影！！！