突然做左人地老豆，多左個女: 14
今日係帶小貞去健康院檢查既日子，家姐book左係西九龍既健康院，但因為阿南今日要返工，所以我就同小貞就搭地鐵去深水埗。
朝早既星期六唔算好多人，大家都只係做低頭族，頭耷耷咁玩電話，間中有幾個細路係到喧嘩，不過小貞就好乖咁坐係到。
「油……油麻地……旺角……太子……」小貞腳fing fing咁，係到學緊點讀啲地鐵站名。
「傑哥哥，嗰個點讀呀？」小貞指住上高個行程表問。
「邊個呀？」
「嗰個呀。」小貞繼續指，腳繼續fing，嗲嗲咁問。
「邊個啫？」我哄埋小貞個身到。
小貞驚我會吱佢，所以縮一縮然後係到傻笑。
「傻妹我唔會吱你呀，快啲講邊個啦。」
「嗯……」佢頭側側咁諗一諗，再指住話：「深水步隔離嗰個！」
我笑一笑，「唔係深水步，係深水埗呀。」
「深水……埗！」
「無錯啦，隔離嗰個？左邊定右邊呀？」
「唔係左邊唔係右邊呀，係紅色呀！」
「咩叫唔係左邊唔係右邊，你講緊咩呀小貞？」我故意挑逗佢。
小貞嬲到鼓起泡腮，漲卜卜咁，「紅色嗰條紅色嗰條呀！」
「頭兩個字你應該識讀架喎，唔好呃我過小貞。」我笑笑說。
「長…沙…」小貞雙手掩住塊臉，「唔識！」
「嗰個讀『灣』，長沙灣。」
「長……沙……灣。」小貞逐隻字逐隻字好清晰咁樣讀出黎。
「無錯啦，叻女！」我舉起手指公讚佢，佢笑到格格聲咁。
下一個站開左門，有對公公婆婆走左入黎，小貞見到居然企左起身，主動讓座。
「公公、婆婆，你地坐啦！」
「小妹妹你真係乖啦！」婆婆慈祥地笑笑，於是坐左係我旁邊。
小貞見我唔郁，就氣鼓鼓咁話：「傑哥哥唔乖，唔俾公公坐。」
屌！當眾俾個細路女，真係柒到喊呀！旁邊啲人個個都係到笑緊我囉！
我即刻企左起身，客客氣氣咁叫個公公坐低。
然後我手握住扶手，小貞就攬實左我對腳。
無幾耐，就到左深水埗
小貞未黎過呢個地方，佢好緊張咁捉實我隻手，但又好好奇咁四周圍望。見到攤係地下啲電子產品，佢又會哄埋去望；見到啲古董擺哂出黎，佢又會好八掛咁裝一裝；見到啲阿叔係到扮哂專家咁研究啲貨，佢又會拉埋我過去聽埋一份，但又唔明人地講緊乜，一頭霧水咁。
就係咁行下睇下咁，話咁快就到左健康院啦。
一入到健康院，就見到成班師奶圍埋一齊傾緊湊仔經，啲細路就坐埋一邊玩ipad玩手機。
班師奶一見到有條馬甩佬拖住個細路女，先愕一愕，不過都係擰返轉臉水繼續吹。
我做左登記之後，就同小貞坐左係佢地旁邊，偷聽啲湊仔經。
「我個仔五歲啦！但仲係成日賴尿！」
「嘖！我個女六歲啦，仲成日扭計要飲奶囉！」
「哇！六歲仲飲奶，快啲戒左佢啦！」
「啱先我個仔睇完眼科，醫生話佢有近視呀！唉！咁細個就有近視，大個都唔知點算！」
「係呀！我個仔都係呀！我成日都叫佢玩少陣ipad，但佢又唔聽！」
「唉吔，都係啲爸爸囉，個仔見住個老豆玩，佢又要玩埋一份！」
「我都話左唔好買架啦，當初佢老豆又話要買，唔會俾個仔玩！」
師奶既湊仔經不外乎抱怨，抱怨自己個仔女有幾差，抱怨個老豆唔識教仔，但其實無真正諗下應該點教好啲仔女，應該點同啲仔女相處。
我聽到隻耳都起哂繭，擰返轉頭同小貞玩好過。
「小貞呀，你想唔想過去同啲細路仔玩呀？」
小貞擰擰頭。
「點解唔想呀？」
「佢地都唔望人既……」
聽到小貞咁講，我笑左一笑，班毒孩就咁就錯過左認識小貞女神既機會啦。
「陳素貞小朋友，你可以入黎啦。」健康院護士道。
入到去，醫生幫小貞做左幾項檢查，包括身高體重既發育情況、發音、視力，同埋簡單既傾計會面，完哂所有程序之後，就輪到我同小貞一齊入去聽醫生講野啦。
「你好，陳素貞家長、陳素貞小朋友。」醫生道。
「你好，醫生哥哥。」
「你好。」
「首先講下小貞既發育狀況，小貞既身高比正常發展情況偏矮，不過體重就屬於正常，家長可以留意下小貞飲食既狀況，最緊要均衡飲食、多菜少肉。」
「明白。」
「不過有件事抵讚既係，小貞既視力發展非常好，無散光、無近視，係咪平時好少對電子產品？」
「係呀。」
醫生對小貞笑笑，「小貞真係乖。」
小貞聽到人讚佢，佢面紅紅咁用力點頭講：「多謝醫生！」
「發音同咬字方面小貞都做得幾好。」醫生繼續講：「不過，有樣野想請問下，平時照顧小貞既，係咪得你一個？」
我有少少錯愕，點解醫生會咁問？「係呀。」
「因為同小貞傾計時，我發現佢對父母同男女既概念有啲混亂，或者係呢方面要多啲指導佢。」醫生再講：「另外，小朋友五至六歲既時候就會開始換牙期，佢可能會覺得好痛，到時要多啲陪伴佢同埋多啲注意口腔既護理。」
同醫生傾完之後，我就默默地拖住小貞走左。我心裡面有啲唔好受，由小貞發燒我唔識處理，到而家唔知道小貞對男女既概念唔清晰，係我呢個做老豆既無好好教導佢，到底我係咪真係適合做小貞既老豆？定係一直以黎只係我自私，唔係我照顧緊小貞，而係我想小貞陪住我？
「養兒一百歲，長憂九十九」呢句說話，我忽然有一種好深刻既體會。
小貞望住我好沮喪既樣，就話：「傑哥哥，你踎一踎低先。」
「做咩呀小貞？」雖然疑惑，不過我照踎。
點知小貞好溫柔咁摸一摸我個頭，話：「傑哥哥已經好努力架啦，唔好唔開心啦。」
我無諗過小貞會有咁樣既舉動，我望住小貞，見到佢笑得好燦爛，好幸福咁，原來我既憂慮，小貞會感受到，會安撫我，會唔想我唔開心。
正當我想攬住小貞既時候，我隱隱約約見到對面藥房有個好似Miss Cheung既少女。