突然做左人地老豆，多左個女: 13

行行下，我地去到間士多舖。
 
「小貞，我地入去買餅乾囉。」我話。
 
小貞眼甘甘咁望住士多舖，似乎係俾間舖頭既古舊味道吸引住。
 
我拖住小貞，入到去，見到一位老伯伯係到看舖，伯伯見到小貞，就笑逐顏開：「小妹妹，想食啲咩呀？」
 
「伯伯你好。」小貞好有禮貌咁講。
 


「哈哈，小妹妹你真係乖啦，我賞你食粒煻啦。」伯伯向小貞遞左粒印住牛奶妹個樣既牛奶糖。
 
小貞笑笑，接過佢手上粒糖，「多謝。」
 
「哈哈，真係乖啦。」伯伯摸摸小貞既頭。
 
「好啦，小貞。」我踎低同小貞講：「你去睇下有咩想食想買。」
 
小貞點點頭就行開左。
 


「你一個人湊女呀？」伯伯問。
 
「係呀。」我笑笑答。
 
「一個人湊好辛苦架。」
 
「都ok既。」
 
「我個孫細個既時候都係我同佢阿嫲一齊湊住既。」
 


我笑笑回應。
 
「而家個個都大哂，無人理我呢個老人家架啦。」
 
「咁你老婆呢？」
 
「佢早幾年已經去左賣咸鴨蛋啦。」
 
「哦……唔好意思。」
 
「哈哈，唔緊要。」伯伯繼續講：「不過而家真係好少細路會黎呢到買野啦。」
 
「你係呢到做左好耐？」
 
「係呀，間舖頭我阿爸既，我好似你個女咁大嗰時已經成日留係到做功課、同啲同學仔玩架啦。」


 
「舊陣時好多細路仔架，一放學就過黎呢到買野食然後一齊玩，不過而家無啦，個個放學都係返屋企打機，再唔係就係拎住部電話擢擢擢，無人會留意到呢間咁舊既士多舖。」
 
「慢慢啲人愈黎愈少，個孫仔亦愈黎愈少搵我地啦，個個都好忙，咁我地兩公婆咪唯有係到打發下時間，過下日晨囉。」
 
「點知我老婆早幾年就早我一步走左……」
 
伯伯嘆左口氣，再講：「我做埋呢個月都唔會再做啦。」
 
「點解？」
 
「政府話要重建，要收左呢到。」
 
「咁你之後打算點？」
 


「呵呵，無咩點既，咪有時行下公園過世囉，我都老啦，好似呢間舖咁，無人要架啦。」伯伯唏噓道。
 
「伯伯唔會無人要！」小貞唔知幾時行左過黎，左手攞住左支吹泡膠，右手就揸住舊戒指糖。
 
「呵呵呵，多謝你呀小妹妹！」小貞氹到伯伯笑到見牙唔見眼。
 
「小貞係咪想要呢兩樣野呀？」我問。
 
「係呀！」小貞點點頭。
 
「好啦，咁我要埋盒餅乾然後俾錢走啦。」
 
「係呀伯伯！」小貞道：「啱啱有個婆婆坐左係嗰到，佢叫我同你講，伯伯唔係無人要，佢一直都係到陪住你。」
 
小貞指住左一張空既藤椅，伯伯同我都一臉驚訝。


 
「小妹妹，你所講既婆婆，係咪有隻貓陪住？」伯伯好緊張咁問。
 
「係呀，隻貓坐左係婆婆既大脾到，白雪雪，好得意架！」
 
「係呀係呀！」伯伯感動到流哂眼淚，「佢係白雪呀！係我地養既貓呀！」
 
「咁而家呢？婆婆去左邊？」伯伯再問。
 
小貞側一側頭，充滿疑惑咁講：「奇怪啦，啱啱明明仲係到架喎……」
 
「呵呵呵，唔緊要啦，多謝你呀小妹妹，多謝你呀老婆……」伯伯流哂馬尿咁，連鼻涕都流埋出黎。
 
我個心雖然寒左一寒，但老伯伯能夠係臨收舖之前見到呢一幕，總算係窩心既。