突然做左人地老豆，多左個女: 12
今翅仆街鳥！
遲到了！
琴日玩得太攰，今朝完全唔知醒，家姐以為我已經習慣左早起身，所以又無打黎叫醒我，我一起身，望一望小貞發開口夢個樣，再懵盛盛咁樣望下個鐘。
屌！八點三啦！
我即刻抱起小貞去廁所，佢仲係睡眼惺忪咁，一邊用超慢既動作刷牙，啲牙膏一滴一滴咁跌落地下，個頭又一邊鐘下鐘下咁，我飛快咁兩、三下整整個頭，再拎埋幾片麵包同支奶，換好衫之後行返入去廁所，屌！原來小貞企係原地到恰著左！
我即刻幫佢抹下塊臉仔，又幫佢換埋校服，佢全程都係合埋眼，但係啲動作就配合住我，喂！小貞！醒啦喂！
搞掂哂，我抱住小貞揹埋書包，狗衝出門口。
屌！唔記得左仲有圍裙！
即刻衝返屋企拎返條圍裙走人！
踩住單車急速咁樣衝到學校，八點四十分！屌！遲大到！見唔到Miss Cheung啦！！！
我沮喪咁拖住小貞入學校，同小貞做左遲到既登記手續之後，眼尾望入去課室，咦？唔見Miss Cheung既？
小貞打開課室門，我再扮哂野咁望入去，咦？得見到兩個妹妹仔老師係到，望勻成間課室都唔見Miss Cheung。
「咦？唔見佢班主任既？」我問校務處職員。
「哦，Miss Cheung佢今日請左病假，你係咪有事搵佢？」其中一個嬸嬸答。
「哦，無事啦，唔該。」
原來佢病左！
轉個身，我即刻拎部手機出黎whatsapp Miss Cheung。
「聽講你病左喎? 無事呀嘛?」
「有少少燒?」Miss Cheung秒回。
「陰公豬囉, 要休息多啲啦」
「知道啦, 多謝你❤」
嗚哇，個心心好sweet。
「你老母打黎你老母打黎！」
我繼續回覆Miss Cheung，但偏偏老母係呢個時候打黎！
「喂……」我頹廢地應佢。
「喂！仆街仔！做咩把聲咁頹呀？」
屌！又係家姐！又拎老母部電話打俾我！
「做咩呀？」
「你唔係屋企咩？你唔好同我講你今日遲到，而家係仲幼稚園呀？」
嗚哇，家姐真係好有偵探頭腦，去做警犬一定可以破到好多案！
「唔……唔係，未返到屋企姐……」我心虛道。
「講返正經野先，我唔記得提你，我book左小貞聽日去健康院做身體檢查呀。」
「吓？咁突然？」
「有幾突然呀？你記得要帶小貞過去！」
「吓？唔係你帶過去咩？」
「屌你！而家你先係小貞老豆呀！」
「吓……但我唔識架喎……」
「屌你！你唔識唔通我識呀？唔識咪學囉！係咁啦！」
屌，又收左我線。
隨後家姐send埋啲資料過黎，仲諗住聽日係週末可以休息下……
慢慢行返屋企既時候，經過左間望落去好殘舊既士多舖。記得細個嗰陣時，老母好興接我放學之後帶我去士多舖到買野食，如果測驗成績好又或者有幫手做家務既話，就獎我可以玩一次扭蛋。嗰陣時快樂係好簡單，一聽到有得玩有得扭蛋，就會開心到跳起。
細細支淨係可以吹到幾次既空氣球泡泡膠、噤到訓哂身都噤唔到個圈入去既水中套圈圈遊戲機、打開個出奇蛋就會見到唔同類型既玩具車、恐龍，仲有拎住條橡筋仔周圍去射人等等，呢啲都係我童年時既玩意。
家姐見我射人就會走黎鬧爆我，鬧完我又會轉身同班細路玩摺紙仔，摺左個「東南西北」出黎，東嗰面寫住「你鐘意我」、南嗰面寫住「你唔鐘意我」、西嗰面寫住「表白」、北嗰面寫住「做朋友」，或者呢個就係最初既占卜術。
班女仔咁樣摺下摺下就可以玩足成日，通常阿南同我見悶悶地，就會走過去佢地到搶走佢地啲紙，然後用黎摺飛機。家姐發現我地咁樣蝦女仔，就會追住我地黎打，打到咁上下，個天漸漸咁暗，飯香味慢慢咁從樓上傳落黎，個個細路既肚都開始咕咕咁叫，然後樓上啲老母就會逐家逐戶咁大嗌：「食飯啦！」，呼喊聲此起彼落。
一聽到老母把聲，我地就會狗衝返去食飯，咁就玩完左一日。簡簡單單咁。
嗰陣時家姐鐘意左個人，嗰個人係學校既風頭躉，本身已經冧死唔少女，家姐咁鬼惡一定無行啦，阿南成日笑佢唔會嫁得出。最抵死既係，阿南有次居然膽粗粗咁幫家姐表白，同個風頭躉講家姐鐘意佢，不過原來家姐係嗰日晏就又表白多次。
結果？結果男神拒絕左家姐，家姐喱係屋企喊足三日，後來家姐聽班姐妹講，阿南係朝早幫過佢表白，家姐覺得阿南應該係唔知同男神講左啲乜野，所以男神先會拒絕佢。
於是家姐即刻嬲到走去阿南屋企，係咁搵野掟阿南，鉛筆呀、擦子膠呀、枕頭呀，總之拎到乜就掟乜，好彩我及時走左過去阻止，唔係真係分分鐘鐘搞出人命。
嗰次之後，家姐足足嬲左阿南成個月，對阿南唔秋唔睬，後尾聽講係阿南屌染左個風頭躉，話佢唔識欣賞家姐，家姐先至落左啖氣，原諒左阿南。
呢啲回憶，真係好清澀。
今時今日，我身份已經唔同左，做左人地老豆啦，我想將呢啲可貴既童年回憶都送俾小貞，所以我決定今日放學時帶小貞過黎呢到，幫襯下間士多舖。
返屋企淋下花、執下屋、訓下教，過下師奶生活，話咁快又夠鐘接小貞啦。
去到幼稚園，尋日個巴渣孖辮妹即刻衝左出黎，裝下左裝下右，裝下前又裝下後，我知佢想裝咩。
「唔洗裝啦，靚仔哥哥唔係到。」
孖辮妹一聽到我咁講，即刻啤一啤我：「我唔要怪叔叔。」
屌！你送俾我我都唔會要你呀！
無視左孖辮妹，我走左入去搵小貞，只見小貞好安靜咁樣坐左係到，枱上面放左一幅畫，幅畫色彩繽紛，畫上印有好多個手掌紋，小小的，五顏六色，好不可愛。
小貞一見到我，就笑眯眯咁樣拎幅畫俾我，「傑哥哥，我隻手黎架！」
「係喎！好靚喎！」
聽到我讚佢，小貞好開心咁樣拎住幅畫圍住我轉圈。
「衰仔！你做乜整到件校服咁污糟呀！」忽爾，有人咆哮著。
小貞嚇到即刻攬實我隻腳。
我抬頭一望，原來係肥師奶鬧緊佢個仔林文龍。
林文龍件校服印左好多顏料係到，相信係佢今日唔記得左帶圍裙返黎，所以搞到成身都污糟哂。
不過其實我覺得幾好呀，幾靚呀，幾有特色，係洗會麻煩左啲啫。
啲老師聽到個家長咆哮，當然都走哂過黎啦。
「唔好意思呀林太，因為佢地今日上畫畫堂……」
「上畫畫堂又點？我知唔知我個仔等陣要去面試班考試架？搞成咁仲點考試呀？」林太怒氣沖沖。
「但係我地已經提左你地要拎圍裙……」其中一個比較後生既老師道。
哈，呢位老師一定係啱啱入行，唔知道怪獸家長既厲害，居然夠膽死駁嘴。
「而家你地學校無圍裙架咩？咩都要我地家長帶！我地無俾錢你架？」林太爆得一發不可收拾。
所有老師都唔敢再出聲，默默咁俾佢鬧，怕會講錯說話。
如果呢個時候Miss Cheung係到就好，佢一定有辦法解決件事。
「林太，你冷靜啲先。」我好八掛咁走左過去。
「又關你乜事呢？」
「即係咁，你就唔好怪我多事，之但係你咁樣係到嘈都無用架喎。」
「而家我個仔咁樣，你叫佢點去考試呀？」林太愈講愈燥。
「其實我覺得佢咁著都幾好睇呀，而且只係面試班姐，唔洗咁緊張喎。」
「唔緊張？你知唔知咁樣會影響到佢將來架？」
「我唔知佢將來會點，但而家就一定唔好受。」我眼神望住林文龍。
林太跟住我望住林文龍，佢先發現自己個仔頭都耷哂咁。
「林文龍，你不如講下你自己既感受俾你媽媽知啦。」我道。
林文龍望一望我，再望一望小貞，小貞俾左個好肯定既眼神俾佢，林文龍接收左之後就點一點頭，對住自己老母講：「媽媽，我有信心可以靠自己升到一間好既小學，唔洗去面試班。」
林文龍講野好成熟，完全唔似係一個K2學生講既野，可能係上得太多乜班乜班，搞到個人好早熟，無左嗰份細路應該有既純真。
林太聽到之後呆左呆，唔識俾反應，我就補多句：「你都唔想將來佢係你面前撕爛張成績表架，俾啲自由佢啦。」
林太眼紅紅咁望住我，然後點點頭，靜靜咁拖住個仔走左。
我覺得，我好似做左件好事。
我笑嘻嘻咁望住小貞，等待佢既讚賞。
佢笑笑，然後拖住我隻手走。