突然做左人地老豆，多左個女: 7
第二日，小貞係我老母無微不至既照顧下好快就退左燒，醫生都話小貞已經無事可以出院啦。經過今次之後，我決定要更加俾心機照顧小貞，呢個係我對小貞一生一世既承諾。
小貞請病假係屋企抖左幾日之後已經好得七七八八，又恢復返精神飽滿既樣，圓碌碌、眼大大，笑到見牙唔見眼。btw今日又係要返學既日子啦。
因為小貞，我而家習慣左早起身，已經唔再需要港女家姐既奪命追魂call啦。係我醒左既時候，小貞仲係我身旁訓緊，佢訓到露左個肚臍仔出黎，本來諗住幫佢冚返張被，不過歪念一起，我決定要同小貞玩個遊戲。
我成個頭哄埋去小貞個肚臍到，然後係咁啜住小貞個肚臍仔，小貞即刻醒左，忍唔住痕係咁笑，笑得走哂音都仲係勁笑緊，我玩得好過癮，於是用埋手去吱佢條細腰仔，佢已經笑到標哂眼淚水，終於忍唔住係咁話：「唔好呀傑哥哥……唔好呀……哈哈……」
見佢笑得咁辛苦我就停左，不過我係唔會咁輕易放過佢既，我邪笑住咁同佢講：「要我停都得，你學比加超咁叫：『比加~~超』咁啦。」早幾日佢放假休息時，我係屋企播左套寵物小精靈俾佢睇，所以佢已經知道比加超係咩野黎。
因為標哂眼淚既關係，佢成對眼都水汪汪咁，塊臉又紅過蘋果，超級可愛。
佢扁一扁嘴，好似唔多願意，仲想用扮可憐既戰術搏我同情，我先唔會咁易中計，於是我又係咁吱佢，終於，佢都係忍唔住，細細聲咁講左句：「比加~~超。」
我當然唔會咁容易就滿足啦，我扮聽唔到，叫佢大聲啲，唔係就繼續吱佢，佢最後都投降啦，大大聲走哂音咁再叫左聲：「比加~~超！！！！！！！！！！」
我滿足啦，就笑笑口咁樣抱住佢去刷牙啦，點知佢勁嬲爆咁鼓埋泡腮，仲係咁用手打我同用腳踢我，但細路女邊有力架，佢對我完全造成唔到傷害，我仲係咁恥笑佢，佢見我完全無事就放棄啦，只係係到鼓埋泡腮，見到個女咁嬲我唯有氹下佢啦，我話放左學之後就帶佢去食朱古力新地，佢一聽到有得食朱古力新地，當堂就即刻笑返，嗚哇細路女真係易氹！
踩單車返到幼稚園，Miss Cheung一見到幾日無見既小貞，就即刻狗衝過黎，佢又係著住件緊身運動套裝，微波約隱約現咁彈下彈下，晨早流流就見到啲咁向左走向右走醒神既野，嗚哇真係少啲理性都會把持不住。
「小貞……你終於無事啦……」佢氣喘喘咁講。
「嗯！」小貞見到Miss Cheung咁緊張自己，佢都開心到眯埋隻眼。
「休息左幾日，佢已經好返哂啦。」我笑笑口咁回應Miss Cheung，我今日特登整左個頭，唔知佢有無留意到呢。
「係呀，咁就太好啦……」佢可能仲係好介意果日係假日農場撞到佢同埋個肥矮毒一齊，所以佢應我嗰時都閃閃縮縮咁，逃避緊同我有眼神接觸。
不過因為八掛既心理同埋阿南又對佢有興趣，我梗係打蛇隨棍上啦，「其實我第一次做人老豆，小貞發燒嗰陣時我咩都唔識做，如果有人可以指教下我咁就好啦。」
Miss Cheung似乎get唔到我意思，我唯有繼續講：「即係咁，你係幼稚園老師，又係小貞既班主任，如果有咩事我可以打電話問你意見會好好多，畢竟我都係個單親爸爸，好多事都唔識。」
終於佢都明我意思，露出左兩顆虎牙笑住咁講：「其實平時我地係唔會俾自己個私人電話號碼俾家長既，不過小貞既個案的確係需要特別關心，所以我就破例一次俾你啦。」
太好啦！終於拎到澤勁英龍華既電話號碼啦！
正當我記低Miss Cheung既電話號碼時，突然身後有個人撞左埋黎，但佢似乎唔夠我健碩，我一野就撞到佢跌左落地下。
我擰返轉身一望，原來係嗰個闊太，肥仔吳富友個老母。
佢跌左落地下，本身著緊條長裙飛起左，佢露左底，但係好奇怪既係，我見到佢兩條腿都充滿住傷痕，似係俾人用藤條炆豬肉咁，淺色既似係舊傷，深色既似係新傷，但舊傷未完全埋口，已經有新傷搭係前面，新舊傷痕互相交錯，簡單啲黎講即係成隻腳都花哂。
再望上去，佢本身戴住副黑超，但因為俾我撞飛左，副黑超無左，就見到佢右眼瘀左一舊，而且而家既天氣唔係凍，但佢都著住件長衫，呢個人真係相當有嫌疑！
闊太見到我地眼甘甘咁望住佢，佢就即刻彈返起身，拖返個仔話：「你們是傻的嗎？怎麼站在這兒不動！」
屌！好彩佢唔係話我撞傷佢姐！
「對不起啊吳太！你沒有事吧？」Miss Cheung慌慌張張咁道歉。
「沒事了！沒事了！」闊太講完之後就拿拿臨送左個仔入幼稚園，然後坐返上架寶馬到走左。
正當Miss Cheung想拖小貞入去嗰時，我叫停左佢：「等等呀Miss Cheung，你想問下你一樣野！」
「咩野？」Miss Cheung道。
「肥仔，呀唔係！吳富友同學佢平時身上有無啲咩傷痕？」
「哦，我知你想講咩，不過男仔套夏季校服係短衫短褲，如果佢身上係有傷痕既話我地會留意到，但我地真係未見過有。」
「但你唔覺得好古怪架咩？我相信你岩先都見到吳太佢成隻腳都傷哂……」
「老實講我都係第一次見到，平時佢都係包到自己好實，我地以為係佢性格奇特先會咁……」
「咁……」
「你放心啦，我地見到咁既情況會同社工講聲，並且會留意多啲富友同學既狀況。」
「唔該你，你唔厭我麻煩就得啦。」
「唔會！點會呢！如果有多啲好似你咁熱心既家長就好啦！」Miss Cheung笑得好燦爛好甜，甜到粒糖好似溶左係口到咁。