突然做左人地老豆，多左個女: 6
望住小貞好辛苦，個頭仔出哂汗咁既樣，我真係好心痛，但呢個時候我絕對唔可以慌張！我即刻打電話俾我老母，通知聲佢，然後抱住小貞衝左落樓下截的士。不過夜已深，真係好少的士會經過，個仆街阿南又訓著左，我唯有打去的士台叫架的士過黎。
我一邊等一邊望住小貞，佢依然好用力咁樣呼吸，啲汗愈出愈多，身體好似愈黎愈熱咁，我好驚，我係咁幫小貞抹汗，同佢講：「無事架小貞，好快去到醫院就會無事架啦。」
唔洗幾耐，的士就到左，我雞咁腳咁樣上左的士，同個的士佬講：「最近既醫院，細路女發燒，趕住救命呀！」
個的士佬見到咁既情況，就即刻開車出發，去到個紅燈位，佢唔知係邊到搵到塊小林退熱貼出黎，叫我即刻貼上小貞個頭到，又遞左卷紙巾過黎，叫我抹走小貞啲汗。
綠燈，的士佬一邊繼續揸車一邊同我講：「你第一次做人老豆呀？見你個樣驚驚青青咁。」
「係呀……」其實我唔係幾想應佢，我個心完全係小貞到，我好擔心小貞。
「我第一次做人老豆都係咁，個仔發燒，老婆又返緊工，乜都唔識，好似你咁唔識用退熱貼，唔識拎條毛巾就咁就衝左去截的士。」的士佬繼續講。
「見到個仔熱到好似就黎會燒著咁，而自己咩都做唔到，嗰種肉赤既感覺真係好難受。」的士佬完全浸醉係自己既回憶到。
我真係無乜心情理個的士佬講啲乜，但我望住小貞，見到貼左退熱貼既小貞好似真係好左啲，呼吸順返，無咁用力既時候，嗰一刻，我唔多唔少係感激的士佬既。
話咁快，的士佬就車到我地去醫院，當我想俾錢既時候，的士佬話唔洗，叫我快啲落車帶個細路女入醫院，如果唔係趕時間，我實會攬一攬的士佬。
落左車，我攬實小貞一支箭咁衝入醫院，然後氣喘喘咁同櫃台既護士講：「救命呀……我個女發燒呀……」講講下，我自己都無意識到，原來我啲馬尿係咁標緊出黎，有少少滴左落去小貞紅過蘋果既臉到。
唔知係咪我激動得濟，醫院到個個都望住我，呢到大大話話都有成幾十人。屌！我咁大個仔都未試過係人地面前喊，仲要係咁多人面前！
護士見我咁慌張，佢都放輕左語氣同我講：「先生你唔好咁緊張住，我幫你同個女量下體溫先，然後再入去見醫生。」
係護士幫緊小貞量體溫期間，有唔少阿公阿婆走埋黎，同我講：「後生仔唔洗咁緊張，如果等陣要拎籌排隊既話，我俾我個籌你啦。」
我唔知咁做得唔得，但我無諗過人間有愛，平日成日有事無事都霸住個急症室既公公婆婆，居然咁好心讓個佢排左好耐既籌俾我，我唯有喊住口咁同佢地講多謝。
「先生，你個女發燒三十九度，你過黎做個登記然後入去見醫生啦。」護士量完體溫之後同我講。
我抱住小貞，佢開始有返啲反應，係到叫傑哥哥……傑哥哥……我好熱咁，我就一邊做登記一邊安慰佢，叫佢唔洗擔心，傑哥哥係你身邊。
「好啦先生，你可以入去見醫生啦。」做完登記，護士講。
一入到去，醫師先幫小貞打左個退燒針先，然後安排左間兒童病房俾我，佢話因為而家係流感高峰期，所以今晚小貞要留係到做觀察，如果無事既話，聽朝就走得。
然後佢問我，小貞今日去左邊黎，我一五一十咁講俾醫生知，醫生話呢啲天氣對大人黎講可能適中，但對小朋友黎講係忽冷忽熱，尤其係去郊外地區，就更加要著件外套仔，而且掂完小動物就應該要即刻做消毒，但我呢啲都無做到。
望住係病床上熟睡中既小貞，雖然打完針之後佢好左好多，汗都出少左，但我依然好內疚，如果唔係我疏忽，小貞就唔會咁辛苦……
諗諗下，我啲馬淚又黎了。就係呢個時候，我老母出現左，佢拍一拍我背後，見到我咁大個男人係到喊緊，佢嚇左嚇，於是摸一摸我肩頭，安慰我話：「傻仔，無事既無事既。」
見到老母出現，就好似真神降臨咁，佢身後就好似有道光芒圍繞住佢，老母呀，我真係乜都唔識架……
老母無理到我，走左去摸一摸小貞個頭，話好似都退左少少燒，無咁熱啦，於是係佢個師奶環保袋到拎左幾條毛巾出黎，話細路仔發燒，要定時拎條暖毛巾幫佢抹下汗，佢話我嗰陣時發高燒佢都係咁做，無幾耐我就退左燒啦，仲話細路仔發燒好閒架姐，唔燒邊有得高，唔洗咁緊張咁……
老母一邊講一邊徘徊係對面洗手盤到扭毛巾同埋幫小貞抹汗，我望住老母個背影，就忽然諗起中學時期讀過一篇文──朱自清既《背影》。
嗰陣時朱自清要返去北京讀書，佢個老豆話唔送佢，但會幫佢安排好一齊，不過最後都係忍唔住要送個仔，仲要臨走前好辛苦咁跨過個欄，就係為左買袋桔俾個仔食。
我記起，我老豆係我十幾歲既時候已經去左賣咸鴨蛋，得返我老母照顧住我同我家姐，佢一日打幾份工，放假又去搵兼職做，洗碗、清潔佢咩都做，我地兩姐弟可以話係老母啲血汗錢養大既，做到臉殘手殘，終於等到家姐同我都出黎做野，但家姐唔生性，惡屎能登無人要，而我做野份人工只夠我養自己，俾家用都係得嗰幾百蚊，好無出色，只係好負碌咁中左六合彩，生活先好過啲，定時定候可以俾豐富啲家用佢，但而家又唔知點解無啦啦要養個孫，個仔又乜都唔識咁，最後都係要佢出馬個心先定返……
諗到呢到，我望住老母唏噓而又忙碌既背影，我忍唔住走埋去攬住佢，佢嚇一嚇，即刻擰返塊臉過黎，我咁大個仔第一次咁近距離望住我老母，成塊臉有好多條皺紋，黑眼圈又好大咁，我又忍唔住眼濕濕咁啦。
老母見我眼濕濕咁，又講：「傻仔呀都話無事囉，你仲喊乜野呀。」
「多謝你……多謝你……」我唔知要講啲咩好，個腦只係諗到呢三個字。
「多謝你。」