突然做左人地老豆，多左個女: 8
見完啲咁甜既畫面，今日真係好想j一j，所以送走左小貞之後，我打左俾阿南，叫佢搵個女上黎我屋企，我懷住興奮既步伐返到屋企，一打開門，女唔見，得阿南係到。
屌！我唔岩hehe架喎！
「屌！女呢？女呀！！！我要女呀！！！！！」我咆哮著。
「你老味如果俾你家姐知道我帶條女上黎俾你玩，佢殺左我都似呀，你做左人地老豆架啦，檢點下啦！」阿南道。
「咁你上黎做乜撚野呀？」我欲哭無淚。
「嗱，女就無啦。」佢遞左隻碟俾我。「碟就有……」
我即刻從佢手上搶左隻碟，不過兩條麻甩佬係到睇碟打j似乎有啲詫異……點知我一望，屌！「養女育成遊戲」？
「屌！乜撚野黎架？」我怒火中燒，差在未掟爛隻碟。「褲都除埋你搵啲咁既野玩我？」
「你聽我講先啦。」阿南揮一揮手再解釋道：「我咁做係為你好，你記唔記得小貞發燒時你咩都唔識，而家咪玩個遊戲當學下囉。」
屌！玩育成遊戲可以學到野？你當我低能定無腦呀？
唉，算啦，反正都無野好做，就當消磨下時間啦。
一打開隻game，就出現果啲老土到核爆既情節，咩有個魔王生左個女遺留左係凡間，俾個凡人執到仲要收養埋，屌！邊撚到會有咁多魔王呀，仲要生埋個女俾你養，好心啲毒男就FF少陣啦！
一路飛走啲對話，阿南係隔離一路睇一路笑到震哂咁，屌！隻game係你帶俾我玩架！
好啦，終於飛走哂啲對話，可以正式見到我個女啦。
「請輸入你的名字。」
屌！仲要諗名架？諗乜撚野名呀？
我望一望阿南，希望佢會俾到意見我，但佢竟然迴避我眼神！
「仆……街……南」我係個螢幕到輸入左呢三個字。
「屌！」阿南道。
好啦，繼續玩落去。
「請輸入你的女兒的名字。」
仆你個街連個女既名都要諗埋！
「Miss……Cheung。」我繼續輸入。
「屌！」阿南雖然口裡面咒罵緊，但係塊臉就笑左笑。
得啦呱？無名要改啦呱？唔好連老母個名都要改埋呀？
「爸爸！」好耶，終於玩到啦，係螢幕到出現左個好似小貞既細路女，眼大大、面圓圓，唔同既係佢有把亮麗既金色長髮，著住條有喱士花邊既小睡裙。
呢條小睡裙唔錯，下次出街買條俾小貞先得。
「你好！我是你的管家，請為你的女兒Miss Cheung編定一週的行程。」螢幕上出現左個著住黑色西裝既柒頭，一睇就知佢係個毒撚。
毒撚解釋完一輪之後，我就正式開始玩啦，最主要係要編排個女早、午、晚要做啲乜，內容包括返學讀語文、禮儀訓練、學魔法、武術、跳舞、係屋企休息、出街玩、去外國旅行……仲有一項係……打工？屌！你要個細路女咁早出去打工賺錢養你？你有無病呀？仲有……做義工同埋做家務。
毒撚提醒我，細路女體力有限，唔好令佢做得太辛苦，唔係會病。挑！我夠知啦！現實中小貞曾經病過，我係唔會係虛擬世界再犯重複既錯誤既。
「讀語文……禮儀訓練……休息……做家務。」好！搞掂！
「屌！好撚無聊呀你！」阿南又係到勁叫。
「你識啲乜！我係要培養佢成為個淑女！」我沾沾自喜道。
第一日返學，Miss Cheung就已經識到個男同學，唉，Miss Cheung真係水性楊花！
為左唔好令Miss Cheung變成公廁，我決定減少佢返學既日子，多啲留係屋企做家務。就係咁，我地過埋生日、春夏秋冬、聖誕，我將速度調較到去最快，好快我個女已經長大成人、亭亭玉立！去到結局……屌！我個女做左乞丐！仲要同個毒撚管家結埋婚！
阿南笑到成個身都震哂咁話：「你唔俾個女返學，佢乜都唔識，梗係做乞丐啦！仲要成日幫個管家做家務，日久生情呀大佬！」
乜！你唔早啲提我！
「叮噹！」門鐘響起。
邊個會係呢啲時間搵我呢？
「乜！好向左走向右走重呀！快啲幫手啦！」一開門，原來係家姐，佢仲要拎住一袋二袋。
我幫佢拎左幾袋之後問：「你做乜買咁多野？」
「今晚阿媽會上黎煮飯食，佢話小貞病左幾日都係食粥，所以要煮返啲好野俾佢食。」
嗚哇老母對小貞真係好，好葡萄呀。
家姐擺低哂啲餸之後，見到電視螢幕到顯示住個靚女嫁左俾個管家既情節，即刻恥笑我地：「乜！你地玩緊乜撚野？」
「嗱！唔關我事架，係阿南帶上黎叫我玩架。」我道。
「低能仔，唔同你地講啦，阿媽仲買緊餸，我要去幫手。」
「我都夠鐘要接小貞啦。」
「我又要去接小貞！」阿南道。
「你接乜小貞呀！你好明顯就係想見Miss Cheung啦！」我揶揄佢。
「喂！彭浩南！唔准跟埋去呀！你要幫我拎餸！」家姐命令道。
阿南用一副楚楚可憐既眼神向我救命，但傻的嗎我點會幫佢。
「好啦，咁你地慢慢啦，我走先啦，byebye。」我揮一揮衣袖，不帶走片雲彩。
去到幼稚園，我見到肥仔富友坐埋左一邊自己玩玩具車，而小貞身邊就多左另外一個細路仔，個細路仔五官端正、白白淨淨咁，如果富友係技安，小貞係靜香，咁呢個細路就一定係出木杉。技安鬥出木杉，唉，技安，你輸硬啦。
我未走過去，有個肥師奶已經衝左去出木杉到，我認得個師奶，就係上次係公園主持八婆大會嗰個。
佢一手就執起左出木杉個書包，然後喝住出木杉話：「衰仔你仲唔快啲，要趕住去面試班呀。」
哦，原來肥師奶就係出木杉個老母，我諗唔明點解肥師奶可以生到一個靚仔出黎，可能係佢老豆基因特別好啦。
出木杉俾佢老母嚇左一嚇，都慌慌張張咁執埋啲野，而小貞就一臉無奈。
「呀！林太！我想同佢傾下有關林文龍同學既事！」Miss Cheung走左過黎。
「唔啦，我唔得閒呀，下次先傾啦！」肥師奶講完，就一手拖住個仔走左。
Miss Cheung好失落咁嘆左口氣，擰轉身見到我就話：「呀！小貞爸爸，我都有啲事關於小貞既想同你傾下，唔知你方唔方便？」
「好呀，無問題。」
Miss Cheung帶左我去隔離嗰間課室，我坐左係張小童size既凳到，嗚哇真係好耐無坐過呢啲凳，真係好驚自己會跌落黎。
Miss Cheung坐左係我對面，佢遞左本畫冊俾我，上面畫左兩個男人拖住個細路女，我認得，呢本係小貞既週記。
「呢本係我地既週記功課，通常同學仔做完之後，我都會叫佢地交換黎睇，希望增加同學之間既了解同感情。」Miss Cheung頓一頓，繼續講：「今日小貞交呢份功課，我如常叫佢交俾同學睇，點知同學一睇就笑佢，仲叫埋其他同學黎睇，我一睇，原來佢地笑緊小貞無媽媽，畫左兩個爸爸出黎。」
我聽到之後個心好痛，點解而家啲幼稚園細路可以咁仆街，我諗起當日係公園既情景，或者唔多唔少都關啲八婆家長事。
「咁之後點？」我心痛道。
「之後我地都即刻阻止班同學，同教導佢地，而當時企係小貞身邊支持佢，為佢護航既，係林文龍同學，即係你岩先見到坐係小貞隔離嗰個。」
原來係英雄救美。
「嗯，好多謝你講我知呢件事。」我鄭重地說。
「唔好咁講，呢啲係我地份內事黎，但小貞既情況真係好特殊，我都希望監護人可以多啲注意下。」Miss Cheung慎重地講。
「明白。」我頓一頓，再講：「係呢，有無問到吳富友同學關於佢媽媽既事？」
Miss Cheung笑左笑，似乎係笑我點解咁八掛，「我地觀察過富友同學，不過都見唔到有咩問題，但係我地已經將呢件事交左俾社工，所以您可以放心。」Miss Cheung講講下，斜視左去門口嗰邊，我好自然咁跟住佢既視線，望到有個化左濃妝，衣服端莊既女人行過左，然後Miss Cheung即刻變臉，變到好嚴肅咁，「同埋呢啲已經係屬於個別家庭既私隱，我唔能夠向您透露太多，真係好抱歉。」
「哦，唔緊要，係我太八掛姐。」
其實我之所以咁在意，係因為我唔想自己變成嗰啲淨係識得食花生既師奶咁，明知有事發生都唔會伸出援手，最後造成一個又一個既悲劇。不過我感覺到Miss Cheung有難言之隱，作為老師，佢的確有教師守則，我亦無謂留難佢。
出返去，我靜靜咁接走小貞，帶左佢去買朱古力新地，一邊食一邊行返去，差唔多返到屋企，我踎低問小貞：「有無啲咩想同我講？」
小貞眨眨眼，擰擰頭，個嘴痴住左啲朱古力漿。
我用紙巾輕輕幫佢擦一擦，再問：「有無唔開心？」
佢點一點頭。
「因為咩事？」
佢唔出聲，垂低個頭。
「因為同學仔笑你無媽媽？」
小貞依然唔出聲，我唔想逼佢，於是拖返住佢隻手，點知佢細細聲講左句：「唔係……」
我踎返低，等待佢講。
「因為我令你要俾Miss Cheung鬧……」
「我俾Miss Cheung鬧？」
「嗯……佢地話你入左房，俾Miss Cheung鬧……」
「傻妹……」我好感動，我點都諗唔到小貞唔係因為俾人笑而唔開心，居然係因為擔心我，怕連累我，呢個細路女到底係到諗緊啲咩，我已經猜唔透。
我輕輕咁將小貞攬住，將佢個頭哄埋我個身到，然後好溫柔咁摸佢個頭仔。
我無出聲，亦唔知講咩好，我希望用行動黎安慰佢弱小而又善良既心靈。
我好慶幸，我得到既係一個好似天使咁既女，同時亦怨恨，點解佢既父母可以咁狠心唔要佢。
攬左陣，我放開小貞，凝視住佢，小貞好似好怕羞咁，迴避我既眼神，於是我放膽係佢個額頭到輕輕鍚左啖，蜻蜓點水咁。
鍚女無數，但呢個吻，係我呢一生人錫過最甜最甜既吻。