突然做左人地老豆，多左個女: 5
阿南講完之後，就頭也不回地走左，佢叫我諗下去邊，然後話個時間地點俾佢知，佢到時車我地過去，係呀，雖然我中左六合彩，但我無買車，因為我覺得要養架車好麻煩，反正阿南係金融才俊，唔洗中六合彩都有車有樓有女攬，所以有啲咩我都會搵佢架車，我就只係得架單車。
但大佬呀，平時食女都係屋企食，邊會走去行街拍拖姐，而且今次對象仲要係個細路女，我點撚去邊好咩！早知我今日就問Miss Cheung拎電話，有咩都可以請教下佢！
係呢個咁迷茫既時候，梗係要用電話出動老母啦！
「阿媽！」
「喂，阿仔咩事呀？唔係小貞有咩事呀麻？」
嗚哇老母個心都係小貞到，完全無諗過係個仔有事。
「是咁的，小貞想去公園玩，但我唔知應該帶佢去邊到。」
「你咪帶佢去海洋公園、迪士尼果啲囉。」
「我唔想帶佢去呢啲，同啲大陸人逼。」
「你老味你係咪連去邊都唔撚識呀？」嗯，二十秒，我家姐終於出現，比平時遲左少少。
「係呀家姐，所以而家打黎求救囉。」我用一把近乎跪係你面前既聲線向我家姐求救。
「四、五歲既細路最好就係去啲動物農莊，又有得玩又學到野，你自己上網查下啦！」講完，又收左我線。
咁好啦，我唯有自己上網查下啦，唔查唔知，原來香港都有幾多農場架喎，有大棠荔枝山莊啦、假日農場啦、大埔林村有機農場啦等等等等，咁多選擇，一時三刻都唔知揀邊個好。
小貞見我好努力咁搵緊資料，佢就特登走過黎挨住我，咁啱我睇到假日農場有兔仔睇，於是我就問佢：「小貞想唔想睇兔仔？」
「好呀！好想睇！」小貞表現得更加興奮，對眼又眯埋一線。
「好啦！咁一於去睇兔仔啦！」講完之後我兩手撐住小貞小小既格拿底，然後撐到佢好高好高，高過我個頭，好似飛機咁飛黎飛去，小貞就笑到格格聲咁。
細路仔既世界真係單純，明明今日發生左咁多唔高興既事，但只要有一件事令佢覺得興奮，佢就可以忘記哂上一秒所發生既不幸既事，有時作為大人真係好葡萄。
「好啦，聽日要早起身，今晚要早啲訓呀，我地快啲一齊去沖涼啦！」我慢慢咁放低左小貞再講。
「好呀！一齊沖涼！」
「一齊沖涼lu！！！」然後再拖住小貞。
雖然家姐話可以幫小貞沖左先我自己再沖，但我都係鐘意同小貞一齊沖涼多啲！
「傑哥哥！！！！！！！！！起身啦！！！！！！！！」今朝叫醒我既並唔係「你老母打黎你老母打黎！」既鈴聲，而係小貞一野坐左上我個肚腩到，雖然佢好輕，但果下衝力都係有啲痛既。
我抱起左小貞，然後一齊去刷牙。諗唔到平日訓到日上三竿都唔醒既我，會為左個細路女連續兩日都咁早起身。
「叮噹！」刷刷下牙，又有人搵我。
「仔呀，你今日同小貞去玩，我拎左啲三文治同水果俾你地當午餐食呀。」一打開門，原來係老母，不過好在唔見個港女家姐。
「家姐呢？」我拎住左老母盒三文治同水果問。
「佢今日要返工，如果唔係都想跟埋你地去。」
屌！好在佢要返工咋，佢跟埋黎仲得了既！
「姨姨！」小貞剛好都刷完牙，跳下跳下咁走左過黎。
「乖啦小貞！」老母俾小貞哄到笑笑口咁，「好啦，見你地相處得咁好我就放心啦，我唔阻你地去玩，我返去先啦。」
「姨姨byebye！」小貞揮一揮佢既小手。
「byebye小貞！」
老母走左之後，我又急不及待咁同小貞換衫，換完衫食完早餐，阿南就剛好到左我地樓下啦。
「小貞你認唔認得我呀？」阿南一見到小貞就踎低左，展示出佢男神式笑容，完全無視左係小貞旁邊既我。
「南哥哥！」小貞用佢肥嘟嘟既小食指指住阿南。
「嗚哇好開心！你叫我做南哥哥！」阿南興奮到一手抱起小貞。
挑！
「唔係講笑，你個女真係好鬼趣緻！」阿南笑到見牙唔見眼。
「咁梗係啦，佢係我個女黎架，仲講咁多做咩，嗱嗱臨出發啦！」
坐上左阿南架寶馬之後，話咁快就到左上水假日農場啦。眼前係一片片綠油油既田園，一望無際，小貞落左車見到咁美麗既景色，興奮都跳下跳下咁，但都好乖咁等埋我地。
「香蕉……番茄……粟米……」小貞每見到一啲自己識既農作物，都會係到喃喃自語，講出佢地既名，睇黎小貞上堂真係好乖，學識左唔少野。
「喂，小貞，兔仔係到呀！」遠處既阿南大叫。
聽到「兔仔」呢兩個字，小貞終究都係受唔住誘惑，鬆開左我隻手狗衝左過去阿南到。
算啦，佢都係想睇兔仔姐。
「小貞，有得餵佢地食野架，不如你試下啦。」然後阿南將手上既紅蘿蔔遞左俾小貞。
小貞笨笨拙拙咁接過支紅蘿蔔，好緊張咁走到啲兔仔面前。不過啲兔仔見到小貞無遞支蘿蔔過黎，所以都唔多騷小貞，繼續渾渾噩噩咁坐左係到。
呢啲兔仔隻隻都咁肥，睇黎都係平時俾人餵得多，你唔主動啲佢都唔會騷你果種啦。
「小貞唔洗驚架，你慢慢咁遞過去，佢地就會食架啦。」阿南繼續循循善誘。
小貞點左點頭，但佢已經緊張到紅都臉哂，然後好慢好慢咁向住兔仔伸左支蘿蔔出去。
啲兔仔先用鼻哥聞一聞支蘿蔔，覺得無問題啦就一啖咬左落去。
小貞見到兔仔開始食啦，佢就笑到眯埋左隻眼，但佢唔敢郁，可能係怕一郁啲兔仔就會走開啦。
唉，我都好想咁樣俾小貞餵。
餵到咁上下，我就叫小貞過黎飲啖水先啦，小貞用小嘴巴一下一下咁啜住水樽支飲筒，但又成日用眼尾望住啲兔仔，塊漲鼓鼓既臉又跟住佢把嘴郁而彈下彈下咁，呢種畫面真係睇成世都唔會覺得厭。
「呀……Miss Cheung……」小貞飲飲下，突然指住遠處講。
我一望，咦係喎，果個係Miss Cheung黎，不過佢身邊就有個肥矮毒既中坑攬住左佢條腰。
「邊個黎？」阿南又跟住我地望。
「小貞既班主任Miss Cheung。」
「好似清純版澤勁英龍華果個？」
哇，你遠距離都見到佢似澤勁英龍華，抵你食咁多女既。
「係呀。」
「屌！J得過喎！」阿南已經一副淫相出左黎。
「屌！同你講過唔好係小貞面前講粗口架嘛！」
「屌你自己都講左啦！」
「屌！咪向左走向右走搞人地啦，你睇唔到佢隔離有個男人架咩？」
「屌！嗰個咁既肥矮毒點襯得起澤勁英龍華呀！」講完，阿南就向住Miss Cheung既方向走過去。
屌！而家唔想走過去都唔得啦！
「Hi, Miss Cheung。」我拖住小貞尷尷尬尬咁同佢打招呼。
「Miss Cheung。」小貞好有禮貌咁揮一揮小手。
Miss Cheung望一望我，又望下望小貞，好勉強咁笑左笑，個笑容就好似同你講緊：「屌，我走到咁老遠拍拖都會撞到你兩條仆街」咁。
「你好呀Miss Cheung，我叫阿南，係小貞老豆既好朋友。」阿南等唔到Miss Cheung回應，就一支箭咁係到自我介紹，完全無理會過現場氣氛有幾咁尷尬。
「你好……乜咁岩你地又行假日農場呀？」Miss Cheung尷尷尬尬咁回應，似笑非笑咁。
「係呀，多啲接觸大自然身體都好啲呀嘛！」阿南條傻仔又繼續發功。
「好啦，咁我唔阻你地啦，byebye，byebye小貞。」講完，佢就同埋肥矮毒走左啦。
吓？完左架啦？我地諗住佢會介紹下佢隔離果件肥矮毒架喎？真係完左架啦？
我見阿南都呆左，似乎同我諗緊同一樣野，成件事好古怪，如果係老公或者係男朋友，佢禮貌上都好應該同我地介紹下啦，唔會咁尷尬架喎。
「上次唔係呢個叔叔……」小貞係到喃喃自語。
「小貞，你講咩上次唔係呢個叔叔？」我踎低問小貞。
「無野啦，我想睇兔仔！」小貞用小手拖住我走返去兔仔到。
最後我地食埋老母俾我地份三文治午餐，帶小貞去左農場裡面既兒童遊樂場玩左陣就返去啦，之後亦都再無撞到Miss Cheung。
小貞玩左成日已經好攰，一坐左上車就挨住我訓，訓到流哂口水係我身到。
「睇黎搵日我要同你一齊送小貞返學先得。」阿南一邊揸車一邊講。
睇黎佢都係唔會放棄溝澤勁英龍華架啦。
返到屋企沖埋涼之後，小貞就係到畫畫，佢話係假期功課黎，係週末日記，要畫低呢個週末發生咩事。
畫完之後，小貞遞左俾我睇，只見有三個人係到，兩條麻甩佬一左一右拖住中間有個細路女，然後背景係好簡單既花花草草，屌，成個感覺好hehe。
不過見小貞畫得咁可愛，我個心都甜一甜既。正當我想拎轉身讚下小貞既時候，小貞已經依偎住我身旁，不過我摸一摸小貞，發現佢個身同頭都好熱，我輕輕咁叫一叫小貞，但佢唔應我，只係好用力咁係到呼吸，好似好辛苦咁。
屌！唔撚係發燒呀嘛！！？？？