真人真事，一個風水佬的經歷: 第三章 升降凶間?
第三個寫出黎既經歷就無頭個兩次咁直接見到"佢地"啦，相對上無咁恐怖同咁刺激，而且短好多。我都唔係好記得事件既先後次序啦，因為你要明白一個日日都見鬼，見到係人係鬼都差Ｄ分唔到既人，係好難記得遇過Ｄ咩事，就好似我問你上個月食過咩，你都未必可以順序排出黎啦。
話說今次其實唔係跟住師傅周圍去而撞野，而係有一晚我係中環蒲完返屋企既時候出事既。
話說我屋企係一層四十戶，中間一條長走廊，貫穿成層，你可以想象為一個大長方形，中間再有兩條線（走廊）分成兩個幼D既長方形，長度一樣，寬度差唔多，長既一半即係每層既正中間位置就係升降機口位。
咁有日去完街，後生仔夜晚無野做，緊係同朋友飲下酒，吹下水架啦，傾下夢想架啦！咁個日我飲度醉醉地，中環飛的返到屋企樓下按完密碼鎖，按左幾次都開唔到，跟住看更叔叔見到我就開門比我，都認得樣啦，住左咁耐。但其實我覺得好其怪，雖則我醉醉地，但都無理由會按錯幾次，而且我媽媽都無同我講過話改密碼呢回事架喎，算啦呢件都唔算係咩大不了既事，就當我真係醉到死左按錯啦。
咁我一路行入電梯大堂，看更阿叔一路問我飲酒黎呀，吹兩句我又一路行去等升降機啦，等左陣有升降機到，開門我就同看更阿叔講再見入去，準備回家大覺訓。一入到去，好啦我認我係醉醉地，我一入去部升降機就自己山左門（平時要佢自己關門我諗要起碼五六秒無人行），就好似有人幫我禁山門制咁，當時既我其實仲未知出事，人醉反應慢已經是常識了吧。 你可能會學Iron Man-Tony Stark咁話我一句:機械既野你識條鐵咩!
咁我入左部升降機之後好自然係挨住最後面幅牆合埋眼抖下架啦，成日飲醉既人應該明我個動作係點，部升降機都開始慢慢上，我就諗住閉目到屋企個層啦。但我由感覺到部升降機開始向上行，到開門只係不出十秒既事，我就覺得奇怪啦：邊有咁快呀！我幾經辛苦睜開眼睛，唔係掛，四樓黎既？（我住十八樓）咁我行過去禁關門制啦，禁完又合埋眼繼續挨牆，部升降機又再次開始向上開動。 眼都未合埋"叮"，又開門，今次係六樓。
大佬呀，唔好玩啦，我禁十八樓你層層停！個時已經好煩，又要飲左酒。
最大問題係，我好急尿呀！我諗飲過酒既你都試過入到升降機先至突然好急尿（定其實得我係咁，要睇醫生？）。但突然間我醒一醒，我由入升降機到合埋眼，根本都無禁過升降機既按鈕！咁我就好奇怪望住升降機制個塊控制板，最恐怖既事發生啦。
Ｇ，四樓，六樓既燈都熄左，但八樓，十樓，十二樓既燈逐粒逐粒順序亮起，我就知道：今鋪實忍唔到返去屋企屙尿啦！講真個時真係唔覺驚，淨係想快Ｄ返到家，唔洗係部升降機入面賴尿咁羞家。 咁我都算，我行埋塊板到，你一開門我就關門，務求用最短既時間返屋企小解。終於比我成功忍到去十八樓...... "叮～"
其他層又唔見你開咁慢，開快少少啦度門！作為一個尿急既人，真係唔會理三七二十一，第一時間搵廁所。於是升降機門一開我，我第一時間跑出去，但一跑出去我就突然覺得毛管棟，好凍。我嘗試用科學角度解釋，因為我同朋友飲完成支伏特加，仲要山長水又遠咁搭車返屋企，累得滯，再加上酒精令毛孔擴張，搞到少少風都沾寒沾凍姐，但事實話比我知，我錯啦。
話說當我一感覺到凍我就企左係度，點解？因為我本來拎住條鎖匙準備跑返屋企第一時間開門，但係，條鎖匙比我好唔小心咁整跌左，唔好問我點樣唔小心整跌法，唔通我感覺到有人同我鬥力搶左我條鎖匙又話你知咩。
同時我望過去力既方向，兩條鎖匙一個圈，浮係半空。係個刻我已經唔記得左急尿，唔記得左自己好眼訓，腎上腺素會令人產生抗奮，我諗左陣究竟應該點面對呢個情況。
"嘩，今日天氣都幾好喎，等我食支煙先，唉都係唔食啦，拎返條鎖匙先！＂
無錯，又係個招，黎黎去去都係個招，扮無野加低姿態逃跑，點完支煙放低左係牆角，我就繼續用史坦尼斯拉夫斯基既方法演技，慢慢行過去個兩條浮係半空既鎖匙到，扮無野咁順手拎走繼續行個條無限長走廊返屋企。
本來我都諗住無事架啦，又感覺唔到有咩古怪野跟住黎，咁我咪鬆口氣囉，個條長走廊起碼要行廿秒，我行到一半既時候，突然間聽到.............
嘭嘭嘭嘭嘭嘭嘭！
個下真係嚇到我傻，電錶房個度紅色鐵門係咁發出比人用力打既啪啪聲！我知道，佢真的憤怒了。但大佬呀，我都係想返屋企姐，又無得罪過你，仲請你食煙，你放過我啦好嗎？
嘭嘭嘭嘭嘭嘭嘭！
啪啪聲繼續發出，我一於扮聽唔到，吹住口哨扮無野，插匙開門，臨入屋之前我眼角望一望去升降機口方向.......
依舊係乜都無，咁我就果斷拉埋鐵閘關門，打算用九秒九既速度跑左入廁所屙尿，之後除哂衫就上床訓覺啦。
但就係我入左屋，轉身拉埋鐵閘既時候，一個面無表情既男人企係我屋企門外，雙眼失焦咁望住我，大家不妨估下我會點做？無錯，就係當無事，順手關埋木門沖去廁所做正經事。
唔好問我點解會嘭嘭嘭，唔好問我係咪識超能力識令抽鎖匙浮係半空，一定要我比個解釋既話，可能係因為酒精令到我既身體發出磁通量改變引發既現象啦，哈哈。