真人真事，一個風水佬的經歷: 第四章 日光日白鬼打牆
呢個故事，一於講下其中一次鬼打牆既經驗，鬼打牆既意思其實就係類似睇戲跑極樓梯都同一層；旺角監獄張家輝咁：我永遠離唔開旺角；搵黎搵去都搵唔到路落山。而今次發生既事，就係同師傅仲有一個客人係上水粉嶺附近遇到既。
話說個次我同師傅就收到order話幫上水粉嶺附近一個原住民，曾經佢屋企都幾風光下，後來唔知咩事愈黎愈衰，咁有緣識到我師傅，就邀請我地去幫手，睇下係咩原因呢？
咁我同師傅都第一時間就去睇左佢祖先既陰宅先，一落車個陰宅已經係正格黎，只需一步路就可以踏上子孫台（即係填墓塊碑對出既空位，風水學上又叫內明堂），其實隻墳本身都幾靚，又夠大夠霸氣，一睇就知發權發貴，師傅一聲令下，我就拎個羅庚出黎拍碑計數，師傅就繼續講下巒頭上有咩缺憾。
其實唔難想像係呢個墳附近，被現代化起馬路前絕對係一個風水福地，來龍靠山有力（墳墓正後方），內外明堂夠大（墳墓對出正前方，而家變左一個農地，有D木屋），巒頭上略為美中不足（其實都幾大影響）既地方就係青龍方唔見左，白虎方比政府起馬路時剷走左一大段。最重要既係墓身正上方已經鋪滿哂攀附植物，而且內臂有缺裂，青龍方直程斷開左。
計埋盤數打開羅庚，係幾十年前岩岩落葬既時候，呢個局應該的確無敵，旺山旺向，加上山聯水合，必出貴子。果然問落客人老豆其實真係幾威，不過唔講太多啦。
簡單睇完之後，叫客人搵人修墳就無事，但跟住落黎去到客人阿爺阿麻個墳就出事啦..............
呢篇比較長，我慢慢寫，盡量寫白d，一情不自禁就寫左好多風水元素入去，無咁快有靈異事件，等下先啦！
風水其實十分之影響到人，由其既是父系先人既陰宅，對上一篇文講到我同師傅仲有客人睇完霸氣丁財兩旺局祖墳，就上車去搵客人阿爺阿麻個墳睇下咩問題！唔睇本身都由自可，一睇就奶哂野啦！
風水其實可以好簡單，例如你眼望過去對面大廈個角對正你屋企張床，訓得唔好呢Ｄ就係風水啦，風水黎講易學難精。
我同師傅一落車就問左句：下，到啦？一望落去，馬路兩邊都係密不透風大樹林。一路綬波上山，幾經辛苦搵左十五分鍾左右，終於搵到客人阿爺阿麻既填墓啦。 首先形容下個兩隻墳，隻墳本身幾靚架，蝠鼠吊金錢，碑又寫得好，但好只係講緊個樣，而唔係塊地。我會用一朵鮮花插在牛糞上黎形容。此地不祥呀，就咁睇巒頭黎講，祖山來龍非真龍，穴非真穴，加上隻墓既附近不出三米範圍比D大樹圍住成個圈咁，簡直三百六十度無死角全方位包圍，隻墳幾靚都無用啦，故步自封比人困住左，明堂無左，龍氣又拎唔到，雖則話右邊叫做有少少白虎砂但都無補於是。
唔講好多人都唔知，原來做葬既過程入面，由打井到立碑，每一個步驟都可以好簡單，但如果講究起上黎連塊碑既中榜字數都要數到清一清。
是咁的，墓碑既中榜即係最大隻最中間打直寫個行字，最好可以係六七個字，再長就唔吉利了。因為根據民間習俗，中榜必須要「合生」或者「合老」，咩意思呢？
用心學野既你就可以背一背呢五個字啦：生，老，苦，病，死。
順次序數，每五字重複再數一次，例如：恩師少風之墓，六個字就等於合生啦，如果變左：恩師靚仔少風之墓，八個字就係合苦，唔吉利啦！
就係咁我同師傅又繼續同個客解釋呢個墳墓點唔好點唔好，又教個客風水最高奧義，就係搬字訣，遷墓。
同個客一路傾落先知，原來落葬既時候，佢成家其實都係英國生活緊，所有野都係佢既阿叔佢地搞既。但佢地一葬既時候，佢老豆既生意突然間好多變卦，停滯不前，身體又差。
我就開始係度諗，唔通真係有人老點佢叔伯兄弟，想害佢全家？
我一個不經意既念頭，沖口而出問左出黎，最恐怖既係，個客表示原來真係有仇家！去到呢到，大家都應該估到個劇情係咁發展既。
係十幾二十年前，客人既爸爸開始做生意，做生意就緊係有拍擋，兩兄弟拍住上架啦，後尾就緊係分錢唔均，各散東西，但兩邊即使分開左做生意，兩邊都愈做愈好，但不如意事就發生啦，有次拍擋個邊要客人爸爸救佢，因為公司周轉有問題，但客人爸爸就無借到，後尾呢個拍擋就消失左，而爸爸都無理到。直到客人第二次出現係爸爸面前，佢同爸爸講：當年你唔救我，搞到我差少少就死，我一定要搞死你！ 咁爸爸緊係理到佢，打發左佢之後就無再理佢啦。聽講當年拍擋周轉有問題既時候其實都好大件事，好似話搞到家破人亡咁既程度既（當年客人仲細唔記得咁多，加上佢老豆又無咩講太多）
咁講完一大輪之後，大家都開始利用高登神探既思路諗，唔通係拍擋搵個風水佬埋叔伯兄弟身，揀個廢地，害佢全家子子孫孫幾十代？
總之唔理咁多，講完遷墓既事之後，我地就諗住行返落山架啦，無錯係諗住。因為當我地開始係個密不透風既半山，開始搵返路落架車到既時候，按照置際慣例我又急尿啦。師傅就話，走左先啦！咁好啦，我忍，死忍爛忍，但愈忍愈唔對路，點解行左成十分鍾都好似未搵到路落山既，行左十分鍾都好似仲係個個高度，個個墓既附近五十米咁。
係呢個momment，少風終於忍唔住，我要爆啦！
話說少風終於忍唔住要爆既時候，佢一支箭標埋去七八米遠既某棵樹後面，進行戰術性遮蔽，再背住師傅方向，師傅同客人都唔再見到我。
係呢個時候，大家應該又再估到...
一陣風吹埋黎，我果斷打左個懶震，尿都未屙就震，唔通我虧左？個刻我心諗：拿，今次無人拍我膊頭我就當無事架啦，咁我就用9秒9既速度拉開褲鍊拎出小少風準備比前面棵樹見識下大蛇屙尿....
“快d！”
無錯，又係有把聲貼住我耳仔邊講野，唔再係飛鵝山阿叔，點解我咁肯定？因為今次把聲，係女人黎，把聲仲要幾好聽幾甜........
我都唔理三七二十一，阻我屙尿就勢係假，咁我就聽佢講“快d”屙，屙完拉拉鍊另轉身行返出去既時候，我就見到樣好奇怪既事，終於明“快d”係點解啦。
放眼望去師傅同客人個邊，佢地同我距離七八米左右，但佢地身後面十幾廿米企滿左“人”，成個山頭滿怖住唔同年代服飾既衫，係我仲掙扎緊返唔返師傅個邊既時候，個把十分性感又甜美既女聲又貼住我耳邊講野啦“呢邊走！”。
哦！我明啦，你係忠既，個班“人”係奸，你想救我地！（如果佢把聲係男人我應該唔會咁諗）
我都唔理咁多，事關少風我本身係個淆底獸，一聽到有得走仲唔果斷走咩，我大叫：師傅呢邊，我搵到路啦，快d！我都一路行一路叫（唔好問我點解信把聲，可能因為佢把聲好聽所以信左。）師傅同客人都跑住過黎。
我一路帶路，師傅同客就緊隨我後（其實係性感聲音帶路，我見唔到，只係感覺到佢既位置）。好快唔洗五分鐘就落到山見到車，終於我同師傅仲有客人都安全啦。 後尾我緊係問返師傅：喂，師傅你比人圍，其實你淆唔淆底，怕唔怕出事？
師傅好霸氣咁講左句：老子什麼鬼都不怕 （真實對白唔係我亂講）
原來我離開左師傅佢地，去左小便之後，佢地都覺得突然間好凍，比人監視住咁。一聽到我嗌搵到路就果斷第一時間沖埋黎啦。
個客落左山就淆淆地咁問師傅：無事架啦可？
師傅淨係講左句：唔洗驚，鄰居黎打個招呼既姐，無惡意既。
但我就絕對感覺到惡意濃到爆，我對師傅再用一個眼神同佢講：吹水唔抹嘴既你！
佢都回應我一個眼神：唔好嚇親人呀嘛！
其實有時做風水師傅就係咁搞笑，明知到有事又唔講得，全因為一句唔好嚇親人，師傅教識我做人，亦教識我做一個有良心既師傅。
作為一個有良心既師傅，你要記住一樣野就係「你係幫人，唔係害人」，風水師傅，算命師傅既一句說話可能可以影響一個人既一生，如果你為左做生意，見到咩就講咩，我覺得情有可原，但如果你為左做生意，咩都見唔到都要屈到人地婚姻差到一定離兩次婚，比鬼跟左十幾年，未來廿年行衰運，你叫人地仲點生活落去。
有時你見到一個已經衰到貼左地既人，再講一番打擊佢既說話，無疑係等於推佢上絕路，如果佢真係受唔住壓力跳左落樓，燒左炭自殺你就係殺人兇手了。
我明白好多師傅都會為左証明自己既「實力」，一五一十講哂出黎，但如果你無一個方法幫到佢，不如隱瞞少少，比個希望人，比番條生路一個已經衰到貼地既人啦。
不過，正常黎講衰到貼地既人應該都唔會遇到有良心既師傅，有運行就更加唔洗搵師傅啦，哈哈。