真人真事，一個風水佬的經歷: 第二章 四十八樓的尖叫
第二章 四十八樓的尖叫 話說，第二次既經歷同第一次一樣，都係跟住師傅周圍去既時候遇到既，話說有一日，師傅聽完個電話之後，無啦啦好正經又十分嚴肅咁問我：少風，你答我你怕唔怕鬼！誠實既我坦然承認我係淆底獸，隨即換黎師傅一句：無鬼用，鬼都好驚，哈哈。
大佬呀，你問人怕唔怕鬼，同你問人怕唔怕死係無分別架，深層次少少咁講，鬼係比死更可怕架，因為唔死又點會變鬼呀！ 所以話呢，世界上有幾多人真係悍不畏死架？有既，但絕對唔係世界上既大部分囉！
師傅既笑聲何其爽朗，原來頭先有個客人打電話黎，話有個朋友懷疑奶左野，比隻鬼上左身，要搵師傅去幫手救人！
首先講下呢個受害者既簡單背景先，一個有錢後生仔，早年白手興家，有自己既公司，後來成間公司比人呃左，乜都無哂，淨返少少錢，全靠幾個真心朋友做水喉，承諾養佢過世，佢同屋企人既生活先至無乜太大影響。
當我聽完呢個消息之後，緊係同師傅即刻飛的狗沖去案發現場啦，正所謂救人如救火嘛！（生意黎架，仲唔狗沖？）一落的士，受害者（後稱病人）既媽媽已經第一時間同我地相認左，一路帶我地去佢屋企，一路講返病人自從生意失敗後發生既事比我地聽，等我地對病人有個基本既認識。
出於媽媽對兒子既關心，媽媽竟然好詳細又清晰咁講哂所有重點。
原來病人大半年前比人呃左間公司，之後就成日困自己係房，又唔開燈又唔開冷氣，仲要唔開窗，加上佢成日鬼食泥咁既聲，話咩對唔住，以後唔會咁，比返我得唔得，求下你，有次仲過份，成屋人食飯，病人媽媽住左芽菜，病人咬咬下，無啦啦係到勁叫：我唔要食芽菜呀！！！
睇到呢到，相信好多巴絲打都會話：有病睇醫生啦！無錯，我都唔例外，作為一個修讀psychology心理學既學生，佢點睇都係因為生意失敗，受到刺激，焦慮同抑鬱導致出現精神斷層，思覺失調等症狀。
話唒少風都讀過兩年心理學，始終都係周身刀，張張利，哈哈哈。
當部升降機終於去到48層，門都未開已經聽到一把聲音係到大叫，我同師傅好有默契咁對望左一眼，道門慢慢打開，我用一個chok過林瘋既眼神望向聲音既來源。
個種淒厲，恐懼，又帶點憤怒既女性尖叫聲，直接刺入我靈魂深處，頭皮發麻，簡單講，我淆底，同時我好肯定佢係比鬼上身，除非以前佢唱開粵劇仲要係花旦，我知道我既扮哂野模式又要開始啦，所以話演技係幾咁緊要呢，明明嚇到傻，都要拯英雄，等我黎！ 我同師傅首先踏出升降機門...... 去到48層既時候，聽到一把十分之淒厲既女性尖叫聲，明明主角係男人，點解會係女人聲？點解呀？
我一踏出升降機師傅就比左三條符我，叫我有咩事同我燒左佢，保平安用，記住，由符膽開始燒呀！（每條符最底部都有一個符膽，由好多個字寫係同一位置組成）老老實實，我都未見過我師傅咁認真做野，就連佢既好徒弟我差少少碌落山，魂斷百花林都無驚過，師傅既態度令我進一步淆底，因為"佢"好似真係好猛咁。
符係一種充滿道教色彩既工具，施法者可以將法力灌注入符既本身。制造一張符既材料十分之簡單，屋企既小朋友都可以買黎試下。
材料分別有：蛋紙一張，毛筆／秀麗筆一支，朱砂／普通墨水。
製作過程簡單方便，先將蛋紙剪成符狀（長條），再用毛筆沾上朱砂，於蛋紙上寫上學業進步身體健康等祝福語即可。
當然呢個只係一個簡略既描述，唔係完整既步驟，後面有機會再詳細介紹符既原理，而家返去正題先。
病人媽媽一推開門，左手拎符右手拎住報紙檔兩蚊個火機既我，係零點五秒之內已經頂唔順果斷燒左第一條符，由鎖匙扭轉，推門一刻我已經頂唔順，個一刻其實我有諗過呢條風水佬之路仲應唔應該行落去，究竟仲適唔適合我行落去，到我第時自己做野，遇到咁既情況點算好！
一入屋，見到病人比佢呀哥同佢哥個朋友分別用十字固鎖技同大石擲死蟹禁住係地下，師傅二話不說，即刻狗沖過去手掐法訣，按落病人個頭頂百會穴，默念幾句連我都聽唔明既咒語，過左十秒左右，病人突然無再掙扎大叫，但同時，有陣黑氣由病人身上移走到病人間"黑房"！
啪～
第二條符係我見到黑氣開始出現既時候已經比我點著，原諒我其實有時真係好細膽，當符開始燃燒，我個心都定d，講真，其實我成日凝住我唔燒符，黑氣就會狗沖我到，我都唔知點解。
符好快就燒完，病人阿哥同佢朋友同媽媽都鬆左口氣，佢地都見到黑氣已經離開左病人，我同師傅就扶起病人去梳化坐，其他人都自己搵位坐低休息，我好記得個時佢阿哥成身出哂汗，一睇就知佢地搏鬥左好耐！
見情況穩定少少，病人又訓著左，我地就問佢阿哥頭先究竟發生過咩事啦！
原來病人個日朝早一訓醒就係咁係度喊，又係到猛話對唔住對唔住，求下你比返我咁，阿哥本來就諗住又發作姐，媽媽就覺得好似唔係幾對路，就打比師傅原本個客，同佢講發生既事，由於個客本身同師傅都熟就即刻打比師傅啦。點知，病人媽媽岩岩cut完線，就聽到嘭嘭聲，佢就覺得古怪，佢一望入去間房，見到病人係咁用力撼頭埋牆，咪即刻叫阿哥幫手禁住佢，點知呀哥唔夠佢大力就叫左格黎屋陳生幫手，媽媽又再打比師傅原來個客講，個客就叫病人媽媽落樓下接我地啦。
講到一舊舊，好啦廢話都唔再多講，因為緊接住就係戲肉了。 聽完哥哥一番既描述之後，師傅霸氣盡現地講左句：得，明白，我而家就入去收鬼左佢，少風，跟我黎！ 師傅你咪玩啦，佢咁兇狠，用乜易上我身架！雖然我真係好驚其實，但礙於面子問題，我最後竟然沖口而出回應左句：師傅，等我黎，你地三個留係度唔好行入房！
就係咁，一次注定失敗既拯英雄事件就係咁無端端發生左係我身上啦......
話說少風哥我一時沖動講左句英雄式既對白，終於搞到自己拿屎上身，係病人哥哥媽媽同格黎屋陳生，三個人既目光中，兩個高大而昂揚既背影，一步一步慢慢行入去最後決戰既地點"病人的房間"。 係個刻，我感覺到三個係廳坐住既人心入面既諗法：呢個後生仔真係夠薑！
好記得，好記得，好記得，當時師傅係用鄭子誠式既口氣同我講左句：少風有前途喎，師傅係門口back up你，你入去同佢deal啦！（師傅係大學畢業，曾經既報社高層，英文水平十分好，有唔少外國學生特登黎香港搵佢學野架。）
我都估到，呢個師傅絕對係個懶到死，懶到出汁，有咩事叫我做既師傅，同我一擔擔！有咩事淨係識叫細既去做，老老實實，雖然當時跟住師傅已經好一段日子，又見慣古靈精怪姐，但係我專攻風水命理，好少接觸鬼神之說，我當時可以話係完全無貨係手，連保護自己既方法都無！
呀唔係，我仲有最後一道符，我再一次用眼神交流術同師傅講左句：你好野，我而家就去死比你睇！佢都用眼神回應左我一句：好行唔送啦，好徒弟！
硬住頭皮我入到房見到，有團黑色朦朦朧朧既氣係牆角，我再一次用我親切既態度，誠懇既笑容對住團黑氣講：你好呀小姐，我無惡意架，其實點解你要搞佢呀，你搞死佢都無用架，咁樣你無著數架喎，你想要咩不如你話我知，等我我盡量滿足你啦！
根據我多年睇警匪片既經驗，警察既談判專家都會用呢段對白同綁匪做開場白。
一秒，兩秒，三秒.......
十秒過左去，綁匪未有回應。
我決定採用高強度心理壓力，令佢出現心理缺口，再從旁攻破佢既心理關口！
你同我聽住，我係中區刑事副指揮官黃啟發，你而家已經比我一個人重重包圍住，你精精地就而家投降，唔好逼我打散你呀下！
一秒，兩秒，三秒........
嗯，呢團黑氣繼續無反應，係個刻我個心係咁諗既：比d反應我好無，我已經聽到師傅既笑聲啦。當我仲諗緊下一步應該點做既時候，一把女人既尖叫聲，係真係好尖好尖既尖叫聲直接係我腦裡面響起，個一刻我呆左，個腦一片空白。好痛，真係好痛，我唔識點形容個種痛，總之真係好痛。 痛，係我最後既一個感覺，因為之後我暈低左，醒返已經訓左係廳既正中間，五個人係到有傾有講，又話咩多謝哂，唔該哂，又聽到師傅扮哂野講大恩不言謝，總之就一堆場面話。我就知道師傅已經襯我暈左搞掂哂所有問題，而我，都已經好成功咁做左烈士，起返身我就話係咪走得啦，走啦！佢地三個人送我同師傅仲有呀陳生出門口。講真，其實我真係覺得自己好樣衰，唔想再留係個間屋入面。
後來我問師傅你點解決，佢淨係話：佢搞我個客，我派你同佢講數，佢搞我條靚，咁我就有理由做低佢啦嘛，呢招叫出師有名。
妙呀，高呀，絕呀，推自己個靚仔徒弟出去換一個殺人放火既理由，萬一我有咩三長兩短又點算，女鬼呀女鬼，係我唔岩害左你，係我對你唔住呀！
咁究竟隻女鬼點解會死纏爛打呢個病人呢？
原來，早係幾年前，呢個單位有個女戶主，佢又係比人呃唒成副身家，基本上同病人遭遇差唔多，但唔同既係女戶主無病人咁多朋友照顧，終於有一晚，女戶主頂唔住壓力，帶住好重既怨念做左空中飛人跳樓死左，飛緊既時候就係到尖叫，全棟大廈既人都毛骨悚然。
當病人住左入去之後，女戶主化身成鬼，帶住好重既怨念接觸左病人，就將病人既抑鬱，引發左出黎，令病人經常覺得自己好可憐，恐怕再過多一排都未解決既話，病人遲早都會跟住變做空中飛人，你話做呢行係幾咁偉大呢，不過可惜無乜人欣賞，成日都係一句神棍話我地，咁叻出事既時候唔好搵我地啦笨！ 人就係咁得意，用你唔著既時候就比面色你睇，要你幫手既時候就笑口騎騎扮死狗。好啦作為一個師傅，揀客都唔係一件太過份既事情吧，話哂你求我唔係我求你，搵任何一位師傅幫手時都唔該客氣少少，俗話講得好，令得罪古惑仔都，都莫得罪風水佬，由其是好似我呢隻心胸極窄既風水師傅。 你可以認為呢個係一個赤裸裸既威脅，你可以覺得我呢個風水師傅人品好差，但請你地記住，我地既責任係救人，但唔代表我地應該見人就救，我地唔係救世主，我地都要食飯，世界上無免費既午餐。 其實我地既角色同醫生好類似，要救一個人可以，要殺一個人更加係易如反掌，各式各樣既醫療事故，幫你祖仙揀個山地做陰宅既時候一唔小心點錯穴位，你懂的。