自修室，學界既蘭桂坊: 74

之不過，Shirley嗰番說話提醒咗我。
自從上咗大學之後，因為讀書上莊嘅關係，我根本無時間搵Jojo。
由頭到尾，我最鍾意嘅唔係嗰啲所謂嘅莊務，嗰班所謂一齊奮鬥嘅莊友，而係Jojo。

今日上堂嘅時候，我忍唔住，打開Facebook搵下Jojo。
Jojo嘅propic已經唔再係卡通公仔，佢著住件hall tee，好開心咁企喺棟hall側邊，露出佢招牌嘅笑容。

「hey，long time no chat!」

等咗半粒鍾，佢終於應我。




「喂!!!點呀!!!」
「無，見咁耐無傾過計，搵下你姐。」
「哈哈哈，我忙到痴咗線呀。」
「我都忙，但我開始發覺，係自己搵嚟忙。」
「好威喎，咁快看透世事。」

我望住個Chat，唔知係咪太耐無同佢傾計，我唔知打咩好。
「點呀?仲有冇嘢吹，無我要去做嘢啦，要收線啦。」

我唔想咁快同佢收線。




「你知唔知…我同Shirley散咗。」
「我知。」
「你…點睇呢件事?」
「我覺得…我唔應該評論，只係覺得…好可惜。」

我同佢散係因為你呀!!!之不過，呢句說話我打唔落手。

望住部電話，我唔知可以講咩好。
「哈哈，唔好唔開心啦，你嗰邊咁多囡囡，好易搵到個新架姐。」奸奸樣。
「唔會囉，原來你咁睇我。」




「Hehe，講下笑姐，喂，真係唔講得啦，我再唔做今晚唔洗瞓，遲下再吹過啦!拜拜!」
「拜拜..,」

就係咁，我同Jojo嘅對話就完咗。呢一刻我覺得好空虛。我同佢，自從上咗大學之後，大家各自有咗自己嘅圈子，好似都去唔返以前嘅溝通…

自從同Shirley分咗手之後，我徹徹底底咁變返做一個毒撚，每日上堂，做莊務，喺hall打LOL。上莊的確係會接觸到好多女仔，之不過我全部都無興趣。

因為我個心，一直都屬於遠在Kong u嘅Jojo。

每個啱啱上大學嘅大學生，一開始嘅時候都會迷失，迷失在這場偽熱血嘅群體遊戲裡。
好快，我就看透世事，由一個本身chur到仆街嘅莊友，groupmate，變成一個終極hea友。

Hea下hea下又一day，咁辛苦搞活動，做project做咩，做完無回報，無人會睇到你嘅努力，呢啲嘢你唔做，自然會有人幫你執手尾，最多俾個屎忽人地屌幾嘢。

hea hea下就過咗個幾月，今日係十二月廿四號，平安夜，無女嘅我就同一班都係無女嘅hall友喺度打邊爐。





「屌你，雞子呢?」毒撚一號道。
「我都無買，雞子咁核突就咪食啦。」我道。
「你識條春咩，以形補形呀。」
「補嚟托咩，你都唔會有機會用到架啦。」毒撚二號道。
「屌你…唔好講個事實出嚟啦。」毒撚三號道。

個爐開始滾。
「喂飲杯!!!單身萬歲!!!」我大叫。
「飲杯!!!!」眾毒撚大叫。
「不如我地幾個一陣十二點一齊大聲向住出面唱Lonely Christmas啦，個畫面一定好撚壯觀。」毒撚三號道。
「你都痴撚線嘅，咁毒嘅嘢我先唔會做。」我道。
「喂，阿楠，點解你會同我地一齊喺呢度架，聽講你以前都幾多女架喎。」毒撚二號道。
「挑，講呢啲，毒撚嘅嘢幾時都可以做架啦。」
「我記得呀!!!之前Ocamp嗰陣時玩Ture or dare聽佢講，佢話佢以前中六嗰陣落自修室識咗兩條女，一個似麻倉憂，一個似麻美架。」毒撚一號道。




「嘩屌，麻倉優同麻美…3P?圖呢屌你?」
「係囉無圖就咪學人開Post啦。」

見到班毒撚成班餓狗搶屎咁，我毒咗咁耐，我都好想喺佢地面前Show off下，於是我打開我部notebook，開咗Shirley同Jojo個fb俾佢地睇。

「嗱，呢個就係麻倉憂，呢個就係麻美。」我道。

佢地幾個一望到，啲口水流撚哂出嚟。
「痴撚線…真係似到咁…」毒撚一號一路咬住塊肥牛一路道。
「仆你個街陳榐楠，你答我，你有冇同佢地3P過，答我呀!!!!!!!!」毒撚二號對住我吼叫。

「無呀，你都痴撚線，邊有可能3P…咪FF。」
「我認得啦…個麻倉憂好似係你以前Long D嗰個女朋友嚟架喎，即係你食咗麻倉憂啦?」毒撚三號道。

「係…」




「仆街!!!我要麻倉憂呀!!!我由細到大都J開佢架!!!!，喂，個Shirley粒lin係咪都係好似麻倉憂咁，怪怪地咁架?」毒撚二號道。

聽到啲咁變態嘅問題，我都廢撚事睬佢，行返去爐邊食肥牛。

「咁你同咗麻倉憂一齊，咁麻美咪好慘?」毒撚三號道。
「佢係一個遺憾…」我好黯然地道。

「屌你，有麻美唔要益我吖嘛，你都知我好大波多啲架啦。」
「但係麻倉憂個樣靚啲喎。」
「我要麻美!!」
「我要麻倉憂!!」
毒撚一號同二號拗到面紅耳赤，真係得啖笑。

「咦!!!麻美搵你喎!!!」毒撚三號望住部Notebook道。
「吓!?」我即刻放得個碗，衝返埋去。




「嗱你睇下，佢Inbox你呀。」

「喂，聽日得唔得閒呀?」Jojo道。

成個幾月無同佢傾過計，突然之間咁樣搵我，我一時之間俾唔到反應。
「嘩!!!女仔主動約你呀，仲唔狗衝?」毒撚一號道。
「痴撚線，聽日仲要係聖誕節呀…這些機會…」
「我正式宣佈，我要驅逐你出呢度，呢個係一個屬於毒撚嘅聚會，你唔配同我地一齊打邊爐!!!!!!!!!」
「Lonely Lonely Christmas…Merry merry Christmas…」

佢地幾條毒撚一齊喺度發毒瘟，我已經唔得閒理佢地，我個心已經飛咗去個inbox度。

「得閒呀，做咩呀?」
「竟然得閒!!!仲以為你會有約添!!!」
「無啦，我依家係一條毒撚嚟…」
「哈哈哈哈，聽日同我出街吖好唔好?」
「好呀!!!!!!!!!」
「Hehe，咁聽日晏就三點銅鑼灣見啦。」
「搞錯呀銅鑼灣，你知唔知我幾遠呀。」
「咁…旺角?」
「講下笑姐，緊係就你啦，我都好耐無落過銅鑼灣啦。」
「hehe，咁好啦，約實你啦。」

毒撚一二三號都一直望住我同Jojo傾計。
「我屌你老母…點解一樣咁難嘅事，係你身上會變到好似咁易咁架…」毒撚一號喊住口道。
「對面嗰個仲要真係成個麻美咁…公平咩!!!」毒撚二號道。

我無理佢地，仰天長嘯咗一聲，然後指住佢地。
「哈哈哈，我話俾你地知，聽日，我就要脫毒啦!!!!!!!!」