自修室，學界既蘭桂坊: 73

Shirley走咗之後，我亦都正正式式咁成為一個大學生，做大學生嘅第一件事，就緊係玩Ocamp。
人一世物一世，點都要試下。

見到好多新嘅同學，本身讀男校嘅我，多得一年喺自修室同Shirley佢地嘅相處，我喺Ocamp入面表現得正正常常，埋到堆，識到一班新嘅朋友，有男有女咁。
仲多到對老豆老母。

和盡天地風雲之聲…我入咗和聲書院。

去完Ocamp，仲要玩Hall Ocamp，我以為以前自己同肥鈞由朝早九點打LOL打到凌晨三點已經夠癲架啦，原來呢啲嘢對於大學生嚟講，只係小兒科。





大學生呢個身份真係好奇妙，短短一個月嘅時間，本身我個Fackbook只有100張被tag嘅相，入咗大學兩個星期都唔洗就瞬間上升到有成400幾張相。喺呢300幾張相入面，入面有幾多人係識，有幾多人係唔識，我已經懶得去理。

無聊打開Fb，我無乜興趣睇自己嘅相，反而我會留意Jojo肥鈞Venus佢地。佢地嘅生活同我一樣都係咁多姿多采，肥鈞同Venus永遠喺相入面都係一對糖痴豆咁，真係好羨慕佢地。

Jojo就同我一樣，佢個fb嘅相再唔係我地幾個，再唔係中學同學，而係一大堆陌生嘅面孔。
佢每一張post嘅相我都會like，希望藉著呢個小小嘅like，等佢仲記得我嘅存在。

而Shirley去到英國，都識到一班新嘅朋友，起初我以為佢嘅新朋友都係鬼仔鬼妹，原來唔係，全部都係華人嚟，仲要好多都係大陸人。

同Shirley long D咁相處，我可以話你知比起玩十次Hall O仲要辛苦，因為我每一日都只係瞓得四個鐘。





為咗要同Shirley玩Skype，我經常要去到四五點先瞓。

一開始都無乜嘢，但當真正嘅大學生活開始，我要上堂，要REU，要上莊嘅時候，我發現一日廿四個鐘係唔夠我用，朝早要上堂，上完堂就要搞上莊嘅嘢，一搞就搞到深夜，然後我就要去見Shirley…日復日咁樣，我真係人都癲。

我個電話鬧鐘set咗喺傍晚六點，我個hallmate成日問我做乜鳩，我就話佢知，我要叫我女朋友起身。

記得有一次，我啱啱先俾人con完，心入面百鳩幾句粗口，凌晨三點返到hall部電腦就響，係Shirley。

「喂…」我對眼已經合埋咗。




「喂，你知唔知呢，我同幾個新識嘅朋友，過幾日諗住去旅行呀?」
「去旅行?你唔係去讀書架咩，點解會變咗去旅行嘅?」
「咁…同啲朋友聯誼下吖嘛。」
「你嗲哋媽咪俾咁多錢你去外國讀書，你就俾啲心機讀啦。」
「車，我有讀囉，咁依家有時間先同朋友去下見識下姐，我夠見你fb堆相成班人一齊啦，你地唔係玩咩?」
「我地係做嘢架，啱啱先做完返嚟hall咋。」
「係咩，但我見你地又打邊爐又開party咁，係咁樣做嘢架咩?」
「大佬…大學係咁架啦…我都係跟人地做姐。」
「得啦得啦，係我問題，我唔係讀緊大學，我唔明白你，我去下旅行就係玩，你日日喺度打邊爐就係做嘢，Fine!收線囉咁，唔阻住你瞓教。」
「喂喂喂，唔係呀…Sor呀我啱啱俾人屌完一肚火…喂?」

對面已經收咗線。
呢啲咁嘅交，我地呢兩個月嚟都唔知嗌過幾多次。

我地可以因為睇到大家嘅相有異性而嗌交，我地可以因為對方唔記得準時on skype而嗌交，我地可以因為對方唔明自己講咩而嗌交，我地可以因為…總之就係要嗌交。





Long d就係咁，即使你可以見到佢個樣，聽到佢把聲，但佢唔喺你側邊就係唔喺你側邊，大家嘅文化同思考方式都隨住空間而相距十萬八千里，莫講話維繫，就連同步都難。

結果，十一月九日，今日係我地一齊嘅一年零兩個月，最唔開心嘅事情發生咗。
「哈哈，你都唔明我講咩嘅。」Shirley道。
「我又唔係喺英國，我又點會明喎。」
「我覺得我地依家好唔同。」
「唔明。」
「嗱，你又講唔明，唔明根本係個藉口嚟嘅。」
「不如…我地分開下…」Shirley續道。
「吓?」
「我覺得…我地已經去唔返我地以前嘅溝通…」呢句說話，Jojo都講過。
「以前你會就我，氹我，依家，你就只會鬧我，話我。」

我知道出事啦，我要氹返佢。




「唔係呀…我依排超忙…瞓得好少，個人好易躁，我以後唔會咁架啦…」
「藉口嚟嘅，如果你依家對住嗰個係Jojo，你就唔會咁躁。」
「吓，你講咗去邊呀。」我呆一呆。
「由頭到尾你都係鍾意Jojo，我有冇講錯吖?」
「我同佢一直都係好朋友嚟咋，你唔好亂諗啦，同埋自從我地上咗大學之後，我地都少聯絡咗好多，點解你會扯埋我地一齊。」
「因為其實我由一開始見到你地識嘅時候，我已經知道你地係鍾意對方。」
「以前每日喺自修室溫書，食飯，咁多時間見到你地兩個相處，你唔好以為我真係傻架啦，我一眼就睇得出，每當你地兩個一齊嘅時候，你地嘅笑容先係最真摰。」Shirley續道。

「當Jojo離開我地自己溫書嗰陣，我就知道你地有事發生咗，我曾經有開心過，但係我後來好內疚，因為我知道Jojo係為咗我地而離開，自己去承受痛苦。」

「依家到我離開啦，我覺得我要還俾Jojo，我依家嚟到英國，係一個好好嘅機會，我好想試下知道Jojo嘅感受，你成全我啦，我覺得，我同你需要分開下，或者我地做返朋友會開心啲…」

我望住電腦裡面嘅Shirley，我呆坐咗喺度，唔知講咩好…
「唔係咁架…你一直都係我….」
「唔好再講大話呃自己啦，我明架啦，你…快啲去搵返Jojo啦，我喺英國呢度會過得好開心，唔洗理我。」




「記住…你俾唔到幸福我，但你要去俾幸福Jojo，得唔得?」
「…」
「答我，得定唔得?」
「嗯…」
「哈哈，咁好啦。」
「拜拜啦，車厘龜。」

個Skype咁就收咗線。我到呢一刻我都仲未知發生緊咩事。

第二日，當我見到自己個facebook個relationship status由同Shirley Lee in a relationship 變成single，我先真真正正知道，我同佢分咗手。

始終，無幾多對情侶能夠敵得過Long D。