自修室，學界既蘭桂坊: 70
當我收線嘅時候，我見到肥鈞啱啱都講完電話，我諗佢應該係啱啱打完俾Venus。
「點呀?Venus點呀?」我問。
「佢都好唔開心…我問咗佢成績，其實唔係差，一定入到大學，但係就應該入唔到佢一直想入嗰一科…唉…」
「唉…」我都跟住肥鈞一齊嘆氣。
屌…呢個世界可唔可以取消咗公開試，放榜呢兩樣咁殘酷嘅嘢，搞到咁多人因為佢地而喊，真係好黑人憎…
好快，的士就去到佢地間學校，我再打俾Jojo，佢話我知佢地喺附近一個公園裡面。
離遠見到佢地三個，已經見到Jojo同Venus搭住Shirley膊頭，安慰緊佢，Shirley喊得好犀利…
我同肥鈞走到埋去佢地面前，Shirley應該已經喊咗好耐，已經喊到無哂聲…
「Shirley…」我叫一叫佢。
Shirley聽到我把聲，又喊多次。
「車厘龜...」佢撲向我，攬住我又喺度喊。
呢個時候，我都唔忍心問佢嘅成績點，只係輕輕咁掃下佢背脊。
「車厘龜…我點算呀…………..」Shirley今次喊得比我上次整喊佢嗰次勁好多好多倍。
「唔好咁啦…你同咗你嗲哋媽咪講未呀?」
「我唔敢同佢地講呀…」
「乖啦…點都要講咗先，快啲去打電話…我地去同你報咗asso嗰啲先啦。」
「你…你考成點呀?」Shirley昂高頭問。
「我…我ok啦，應該入到…」
Shirley聽到我咁講，又再捉住我喺度喊。
「你入到…我入唔到…以後點算呀，我地以後就無得成日見啦…嗚…」
「唔好咁啦，就算我入咗大學，你都依舊係我女朋友，我永遠都會喺你身邊架。」我安慰佢道。
「唔好再喊啦，振作，以後再努力啲，一定可以入返大學架，唔準咁樣。」我抹走佢面上嘅眼淚道。
雖然我講嚟講去都係嗰幾句，但講真我真係唔知仲可以講咩好，Shirley佢都仲係一路喺度喊，我地幾個都唔知點搞…
見到佢一直喺度喊但乜都唔做，我忽然之間嬲嬲地。我用力捉住佢膊頭，好似老媽子捉住我講嘢咁嘅模樣捉住佢。
「唔準再喊!!!」我都唔知自己點解無啦啦咁大聲。
「繼續喊都係無補於事，快啲，打電話俾你嗲哋媽咪，同佢地講，睇下佢地有咩意見，然後我地依家去報Asso。」我命令Shirley。
突然間我咁嘅樣，嚇到Shirley唔敢再喊，佢抹抹雙眼，點點頭，終於無再喊落去。
「咁你依家俾你嘅資料我地，我地幫你去排其他asso啦。」肥鈞道。
然後我地幾個就分頭去咗唔同嘅Asso幫Shirley報名，報名嘅時候我終於知道佢嘅成績，佢中英文都有5，之不過數學同Econ就分別1同2咗，無辦法，DSE就係咁，一兩科勁係無用，炒主科就永不翻身。
我一直陪喺Shirley身邊，四圍奔波好攰，過咗一陣佢嘅心情已經平伏返，之但係佢嘅平伏唔係代表佢無事，而係佢開始變到木無表情。
搞完一大輪嘢之後，可以報嘅嘢都報哂，我就送佢返屋企。
喺佢樓下，我攬住佢。
「對唔住呀，我嗰陣唔係有心鬧你架。」
「嗯…」
「你嬲我呀?」
「唔係…只係就嚟返到屋企，我無面目見我嗲哋媽咪…」
「放心啦…佢地咁錫你，佢地唔會鬧你嘅。」
「我唔知佢地會點處置我…」
「唔好諗咁多啦，佢地就算做啲咩，都係為你好嘅，乖啦，上去啦。」我摸摸佢塊面，錫咗佢一啖。
Shirley扁住咀，慢慢咁行入大廈，佢行得好慢，仲回咗兩次頭，我一直望住佢，直到佢走入大廈大堂。
送完佢返屋企，我自己就返屋企，老媽子無同我講啲乜嘢，都係煲咗碗湯放喺我枱面，我飲嘅時候，佢剩係走入房摸摸我個頭，放低一本聯招嘅書，同我講聲叻仔。
我自己考得好，當然開心，不過今日嘅我心情好複雜，見到身邊咁多人因為放榜又喊又唔開心，我真係唔知自己應唔應該高興好。
所以我好早就上咗床瞓，疊高枕頭，不停喺度思考。
要嚟嘅始終要嚟，真係俾肥鈞講中，Shirley入唔到U，第日我地嘅感情一定會受到好大挑戰，本身要維繫已經唔係易，第日我地兩個仲有好大可能喺唔同嘅地方讀書，一定會好多波折…
諗諗下，我就瞓著咗。
第二日，一早起身，我就打開電腦，準備搞jupas嘅嘢，搞呢啲嘢好煩，又要睇科又要睇大學，好彩我嘅成績應該好多都入到。
搞搞下，我突然醒起，Jojo其實考成點?
我打開facebook，見到佢都on咗，我就搵佢。
「喂，搞緊Jupas?」
「係呀。」
「其實你考成點?」
「ok啦，你講先啦不如。」
於是我地就交換咗大家嘅成績，原來佢除咗Econ，通識同英文都好過我。」
「咁你諗住報咩科呀，Share你個A1A2A3嚟睇下吖。」
照計我同佢嘅成績差唔多，佢入到嘅科我都應該入到掛，咁講法如果第日可以同佢一齊做同學，都幾好。
佢Share咗佢嘅A1A2A3俾我睇，A1 係HKU嘅E&F，A2係CU Econ，A3係科大嘅BBA。
嘩…洗唔洗咁鍾意Econ呀你。
我有理無理，照住佢咁嚟填自己嗰三個choice。
「咁你呢，你頭三個choice係咩呀?」花師奶問。
「哈哈，秘密，唔話你知。」
「超，懶神秘。」
我無理佢，求鳩其咁鳩填埋其餘嗰啲choice之後，我就想開LOL出嚟打。
嗞嗞…電話震，係Shirley。
「喂?」
「車厘龜…」唔係好對路，我聽到對面有啲咽哽聲。
「爸爸話，要送我去英國讀書…」