自修室，學界既蘭桂坊: 69

我企起身，一步一步咁行出去，依家我好似活喺一個慢動作嘅世界入面，我嘅每一步都非常，非常沉重，呢幾步路，我真係想呢世都行唔完…

講就咁講，唔洗三秒，我就行到去Miss Ho面前，佢伸手，遞張成績單俾我。
我接過成績單，Miss Ho無搭我膊頭。
佢無搭我膊頭，同一開始派俾歐陽嘅表情動作一樣…咁即係算點?

代表我同歐陽係同一類人?

我好不安，我拎住份成績單，我唔敢拎轉佢，我慢慢咁行返埋自己個位，我見到肥鈞替我緊張個樣。
我自己都好緊張，我琴埋份成績單唔敢打開…




我烏低個頭，慢慢將張成績單移出枱面，我第一個會睇到嘅科目會係中國語文。

中國語文-----5  
呼，我鬆一口氣，同我預期嘅差唔多。

我繼續慢慢移，下一樣，係英國語文。

英國語文-----4
我接受到，只要唔係唔合格就得啦。





數學-----5*
呢樣我反而有啲估唔到，比預期中好咗好多。

已經睇咗三科，成績都算唔錯，我已經有返啲信心，我一口氣張成績單倒轉。
我一睇。
通識教育-----3
地理-----4
經濟-----5*

呼…我無歡呼，我瞇埋眼，呢一刻嘅我只係好似每一個打完飛機嘅男仔一樣，個世界好似停止咗咁，有種患得患失嘅感覺，呢個成績，應該點都入到大學吧…我輕輕咁嘆一口氣，一整年嘅努力，始終無白費到。





呢個時候，肥鈞拍一拍我。
「喂，你點呀?」

我無答佢，只係俾張成績單佢睇，肥鈞睇完，呆一呆。
「死仔，我見到你個死樣，我仲以為你出咗事呀，原來考得咁鬼好。」

直到聽到肥鈞講呢句說話，我先至識笑，打從心底裡笑咗出嚟。

我得咗啦，我入到大學啦!!!!!!!

接住落嚟，Miss Ho繼續派，見住一個又一個嘅同學接過成績單，有人歡喜有人愁。愁嘅個個都係差唔多咁嘅樣，即使有人本身都唔太在乎自己嘅成績，但見到一張不堪入目嘅成績單，都好難笑得出口。

考得好嘅人，見到其他人一副面如死灰嘅樣，都唔敢表現得太開心，免得佢地傷心。





肥鈞同我一樣，大致上嘅成績都喺預期之內，中文3，英文4，通識4，Econ geog都4，而佢最強嘅數學，真係俾佢摘到星，拎到5**。

到最後，全班考得最好嘅都係Hinson，有兩科拎到5**，今次，我贏唔到佢，之不過Who fucking cares?

三十六張成績單全部派哂，終於，有人忍唔住，喊咗出嚟。
平時成績叫做ok嘅Bebu，佢英文失咗手，1咗，達唔到3322入大學最低要求嘅佢，即係代表一係要讀Asso，HD，一係就要重讀。
佢好用力咁揸住張成績單，手都震埋，一邊喺度啜泣。

平時成日揸佢聊佢，佢都無乜嘢，第一次見到佢咁大嘅情緒，我個心好唔舒服。
我同肥鈞同幾個同學都走埋去搭住佢膊頭去安慰佢，但佢依然一直喺度喊，我地幾個都束手無策。

「各位，無論大家考成點，都要記住呢個只係人生一個小小嘅里程碑，日後嘅路仲有排行，繼續努力，到最後必定可以搵到屬於自己嘅道路，知道嗎，依家唔係喊嘅時候，考得好嘅記得諗好點樣去排你地嘅Jupas，要量力而為。考得唔好嘅就要諗下重讀定繼續升學。你地如果依家對升學有咩問題嘅話都可以過嚟搵我傾，我會俾意見你地。」

一直都好愛錫我地嘅Miss Ho，見到我地有同學喊到咁都唔走嚟關心下，剩係喺度講埋啲廢話，呢一刻我唔知點解有少少嬲佢。





之不過，諗諗下，做咗幾廿年老師嘅佢，可能已經見慣呢個場面，始終依家搵定後路比起坐喺度喊為之實際。

榜就放咗，有人即刻搭車去報asso，有人就喺學校填表搞重讀，望住個個同學為住自己嘅前程奔波，又一次各散東西，的確，依家唔係聚舊嘅時候。有啲人，又唔知要過幾耐先至會再見到，又或者以後都唔會再見到。

好彩地我同肥鈞嘅成績應該都入到大學，唔洗周圍走。喺學校留咗一陣，安慰下Bebu，過咗一陣嘅佢已經振作，佢決定重讀，仲話下年一定會喺大學見到佢。

見到佢咁樣，我地個心都舒服返哂。

呢個時候，肥鈞搭一搭我膊頭。
「喂，差唔多啦，快啲行啦。」

係喎，剩係掛住Bebu，差啲唔記得咗，Shirley Jojo佢地都放咗榜。
「快，我地飛的啦。」我道。
「好。」
我地兩個喺學校門口截咗架的士，雖然我有一絲盼望過的士佬會載我地去，之不過上到的士，司機唔係佢。





喺的士上面，我打完電話俾老媽子報分同報平安之後，我就即刻打俾Shirley，佢地應該都放完榜，但係佢無聽我電話。

Shirley唔聽我電話，我唯有打俾Jojo。
「喂，Jojo?」
「係…阿楠，你快啲過嚟啦。」
「做咩?」雖然我口係問做咩，但我已經感覺到，有啲唔開心嘅事情發生咗，因為我喺電話嘅另一邊，聽到Shirley嘅喊聲。
「唔講住啦，總之你快啲過嚟啦。」Jojo道。
「嗯。」我收線。

唉…睇嚟Shirley應該出咗事。