自修室，學界既蘭桂坊: 71

「吓…?」我不禁心裡為之一沉。
本身我以為佢只會同我喺香港唔同嘅地方讀書，勢估唔到，佢依家竟然話要去英國…一個同香港相差十萬八千里嘅地方。

我呆咗喺度，久久不能說話，我仲未接受到呢個事實。
「我已經係咁同爸爸講話我唔想去，話我今年會努力讀書，下年一定可以入返大學架啦，但係佢一直堅持話喺香港讀書無前途，一定要我去…」Shirley又想喊想喊咁。
「……」我都仲係諗唔到可以講啲咩。

Shirley feel到我無嘢講，真係喊咗出嚟。
「對唔住呀…都係我唔好，考得咁差，如果我考好啲入到大學，就唔洗好似依家咁…」
「傻啦…呢樣嘢你都唔想，你都控制唔到嘅…」




「咁…咁我地點算呀，到時我去咗英國，我地就無得見啦…」

唉，鬼唔知咩，但係有咩辦法。
「我諗…到時我地就只可以用Skype溝通…」我無奈道。
「我可唔可以唔去呀…」

雖然我都唔想佢去，但係人地老豆都已經決定咗，仲邊度有得傾?
「你爸爸都已經決定咗…仲邊度有彎轉…」

對面嘅Shirley聽到我咁講，沉默了。




我亦都唔知可以講啲咩好，安慰佢又唔係，因為我自己都唔好過。
結果我地兩個拎住電話，靜默咗十分鐘，相對無言，只係間唔中聽到一啲咽哽聲。

「唉。」我輕輕咁嘆一口氣。
「都係嗰句…就算你去到邊，你都會係我嘅女朋友，雖然我地將來會有幾年時間天各一方，但我會盡我一切嘅努力去維繫…」我打破沉默。

「我要去嗰度讀四年…」Shirley細聲道。
「四年咪四年，就算幾多年，我地都會喺埋一齊。」
「嗚…」Shirley又再喊起上嚟。





跟住我講咗無數嘅安慰說話去氹佢，幾經辛苦先至令佢心情平伏返，之不過，佢要去英國讀書嘅現實就點都改變唔到。

我同Shirley收咗線之後，我就打俾肥鈞。

「肥鈞...Shirley…Shirley佢要去英國讀書…」我慢慢地道。
「吓!?真係架?」
「係…」
「唉，last day嗰日我都講過架啦，估唔到我真係開口中。」
「你叫我以後點算?」
「你問我都無用架，我又未試過，況且，我自己都驚緊呢個問題。」
「你又有咩問題?」
「我依家同Venus喺度排緊Jupas，佢嘅成績應該入唔到佢一直想入嘅BU新聞架啦，佢依家A1A2A3都放哂City，咁我緊係都想放哂City架啦，但我呀哥同呀媽都唔俾我咁做，要我入間好啲嘅大學同好啲嘅科目，話為咗我嘅將來喎，我依家得A3係City咋…」

「到時我好大機會會同Venus唔同U，你知啦，一上U一定會識到好多新朋友，到時要維繫真係唔係咁易…我呀哥仲話City出哂名多狗公…到時剩係玩Ocamp都已經俾人抽爆水，遲下再住埋hall，班狗公同佢日見夜見，我真係唔敢諗落去…」





「唉屌，如果我係讀City，又住到hall，我就可以同Venus瘋狂…」肥鈞崩潰。

聽完肥鈞咁講，剩係講緊唔同U都已經咁多問題，第日我同Shirley會喺唔同U唔同國家唔同時區，真係不堪設想…

好快，Shirley要去外國讀書呢件事我地五個都知道哂，大家都知道Shirley即將要告別我地一段好長嘅時間。
我同Shirley約定咗，喺呢個令月嘅日子入面，要日日都見，珍惜大家餘下可以見到嘅每一日，我連我份暑期工都辭埋，用返工嘅錢，日日就同Shirley去唔同嘅地方玩。

今日係八月十日，Jupas放榜嘅日子。
我自己無乜所謂，輕輕鬆鬆十二點先起身睇。
A1應該無問題吧，到時我就可以同Jojo喺同一間大學讀同一個科目，應該都幾開心。
我打開電腦，登入個Jupas，舊嘢好麻煩，我搵咗好耐先至搵到點睇自己入到咩。
我懷住輕鬆嘅心情，輕輕咁click入去，A1 HKU E&F，我嚟啦。
頁面一轉，Jupas嘅result出現。
JS4824 The Chinese University of Hong Kong
Programme:Economics





…我睇完呆撚咗…
點解會咁架!!!!!!!!!!