自修室，學界既蘭桂坊: 55

三月十二日，今日係我考DSE嘅第一日。
我地幾個如常去到自修室溫書。
溫書嘅時候，我不停望住電話個鐘，望住一分一秒咁過，好似喺度倒數緊死期咁。
準考証上面寫五點鐘，即係我四點令就要出發。

我成日都心不在弦，書都溫唔到，好快就到四點。
「我行啦。」我望望身邊嘅Shirley道。
「加油呀，記得唔好緊張!」Shirley錫咗我塊面一啖，握一握我隻手。

嗯嗯，我感覺到我嘅力量返嚟了。



我執好哂嘢，落到樓下車站等車，我要去一間喺香港仔嘅中學考試，雖然我事先都check好哂點樣去，之不過，等咗十五分鍾都無車，搞到我有啲不安。

我企喺車站，開始喺度口噏噏，有車未呀屌你。
無啦啦有人拍拍我膊頭，嚇到我個身彈咗彈，我回頭一望，係Jojo。
「喂!，洗唔洗咁驚呀，緊張到你呢。」
「屌，嚇死人咩，無啦啦喺人後面拍人。」
「車，咁架，仲諗住同你打下氣。」

我都feel到啱啱自己語氣重咗，所以say個sor。


「對唔住，係我太緊張，語氣重咗。」
「哼!」
「係喎，又話幫我打氣，頭先喺自修室同我講咪得囉，做咩特登走落嚟?」

Jojo聽到我咁講，就喺褲袋拎咗幾粒嘉應子出嚟。
「嗱，啱啱唔記得俾你，我喺屋企攞架，食完酸味味，個人醒神啲，應該會好啲。」

我拎住佢啲嘉應子，望咗幾望，笑道。
「嘩，嘉應子，咩年代呀依家。」
「車，唔鍾意就算，俾返我。」


「講下笑姐，多謝你，我會食。」
「嗱，仲有呀，你成日話咩望住啲唔識嘅人會緊張，你一陣試下幻想到時嘅考生係我地幾個咁嚟考，我地平時食飯都係圍住坐架啦，咁樣可能會好啲。」

我聽完佢咁講，呆咗一呆。
「嘩，咁有創意嘅個方法。」
「哈，我係邊個?我係Jojo呀，係醒啲嘅!」
「我即管試下啦。」

講完，架巴士終於到。
「有車啦，我要行啦。」我道。
「加油啦，全班第一。」Jojo搭一搭我膊頭。

我上到車，望住Jojo，諗起我老媽子，Shirley，佢地三個都俾咁多支持我，我一定唔可以衰。

好快就去到考場，好多考生企咗喺操場，溫書嘅溫書，吹水嘅吹水，我就無心情溫書，又無識嘅人喺度，唯有坐喺度昅下女。



今日考口試，我竟然仲見到黑絲，仲見到熱褲，班友真係唔識死。

等咗一陣，就夠鐘要入等候室，氣氛開始變得嚴肅，臨入等候室嘅時候，我醒起Jojo嘅嘉應子，就啪咗一粒。

好耐無食過，甜甜酸酸咁，又幾好食。

喺等候室入面，填好哂嘢貼好哂barcode之後，好悶，喺度乾等，我唯有含住粒嘉應子，等佢唔好咁快食完，叫做有啲世藝。

等等下，我發現唔知係咪啲人坐喺度等得太耐，佢地個個個樣都開始呆呆滯滯咁，相反，我含住粒嘉應子，個人好醒神。

好快就嗌到自己個考生編號，好，終於到我啦。
我將剩餘嘅嘉應子都咀嚼埋，果然，食完佢，我依家信心大增。

入到考場，見到其他同組嘅考生，都正正常常咁，無mk，亦都無黑絲妹，我諗應該ok掛。



之不過，我望住佢地幾個，我又不自覺咁震起上嚟。

俾啲想像力!!!前面呢個係肥鈞，嗰個係Shirley，嗰個係Jojo…
我個心開始定返啲…再望落去…

屌，呢個男人嚟架喎，點當佢係Venus呀?
算…條友咁肥…就當佢係Bebu啦。

用咗Jojo個方法，我個心叫做定咗，無再手騰腳震。
其他嘅嘢，叫做正常發揮。我地你一句我一句，Jojo，肥鈞都表現得幾好，我同佢地lead住Shirley同Bebu。最後都叫達成到共識。

十五分鐘好快過，咁就考完，個感覺好虛幻。
我都唔知自己考成點。



步出試場，開返手機，見到自己俾人炸。
肥鈞，Venus，Shirley，Jojo都有一齊問我考成點。
分別應完佢地三個之後，我打開FB inbox個花師奶。
「多謝你粒嘉應子!!同埋我啱啱同肥鈞合作得好好! LOL」
「我個方法真係Work?」
「係呀，我有用到，用完真係無咁緊張。」
「阿楠…其實個方法…」
「?」
「我亂咁吹架咋喎xddddddddd」

我望住部電話，笑咗出嚟。
「唔緊要啦，至少用喺我身上，真係有用。」
「哈哈哈哈哈，咁咪好囉!!!!!!!!!!!」

我放返手機落褲袋，走出間學校，呼，咁就考完一份卷，其實都幾輕鬆吖。