自修室，學界既蘭桂坊: 54

Last day都過埋，我地都收到DSE嘅準考証。


第二日，我地一早就落到自修室，我地就拎大家張準考証出嚟對。

大家同科，又同區，我地發現大家好多科都係一齊考。

離我地最近嘅中文口試，我被編喺第一日，即係三月十二號就考，仲有大約十日，我就正式開始考DSE。

肥鈞同Venus就三月十五號考，同時間同地點，肥鈞講笑話如果佢地真係一齊考佢會成程唔講嘢俾哂Venus講。




Shirley同Jojo 都被編喺同一日，三月十六號，之不過Jojo俾Shirley遲一個time slot。

我地大家一齊望住張準考証，有種世界末日就嚟嚟到嘅感覺。
要嚟嘅始終要嚟。

就嚟考口試，我同肥鈞都有參加出面搞嘅模擬口試。
唔知係咪日子愈嚟愈近，我開始有啲緊張。

以前喺學校考口試，對住嘅都係Hinson，Bebu呢啲識嘅人，可以對答自如，但
今次第一次對住啲唔識嘅人考口試，我發現自己一緊張起上嚟，成個身會係咁震，即使我Mark哂notes，但當我講嘅時候，望住個個雞咁眼咁望住我，我就會開始震，然後個腦一片空白。





最後，我喺成組入面拎最低分。

咁樣落去唔係辦法，去到考之前嗰日，我同佢地幾個喺熟食中心度食飯時，我講起我呢個問題。

「你地話我咁樣點算好，聽日就考啦…」我道。

當我咁樣講完，Jojo就喺度笑。
「哈哈哈，你平時唔係好大膽架咩，做咩依家變到成個毒男咁。」
「其實我本質都係一個毒男…」我苦笑。




「不如你試下考嗰陣唔好望住佢地對眼，望高少少，咁樣你咪好似望住佢講嘢，但又其實唔係望住咁樣囉。」Venus道。
「其實呢個方法我試過，之但係我無嘢望住，又好似無咗個焦點咁…」
「無架啦你，你fail硬架啦，仲話考第一喎，哈哈哈。」Jojo笑道。
「頂你個肺，咁樣咒我。」

結果講咗咁耐，都無人俾到個可行嘅方法我，聽日就考，唔通我第一科就要滑鐵盧?

溫到自修室收館，我聽日就開始考，Shirley叫我唔好送佢返屋企，早啲返屋企休息。

一返到屋企，老媽子今日有等我門，佢見到我就去咗入廚房。
「唔好瞓住，我煲咗湯，依家整返熱俾你飲。」
「聽日就考啦，阿仔，有冇信心?」老媽子續道。

雖然其實我無乜信心，之不過喺阿媽面前，無理由話自己唔掂，要佢擔心。
「有信心，口試姐應該ok嘅。」我道。




「有信心就得啦，做人最緊要有信心，無信心就輸咗九成。」
「嗯…」其實我依家最無嘅就係信心…

忽然之間，我好想知道老媽子嘅睇法。
「阿媽，其實你驚唔驚我入唔到大學架?」
「做咩無啦啦問我呢個問題?」
「無呀，正常屋企人都會好緊張啲仔女入唔入到大學架嘛。」

當我講完，老媽子就由廚房走咗出嚟，搭住我膊頭。
「阿仔，如果依家你仲係上年嘅你，我就應該會擔心啲，但依家，你好似係全班第一嚟喎，我對你有信心。」
「點呀，你咁樣問得我，睇嚟你有啲緊張喎。」老媽子續道。
「係…」
「唔洗緊張，你咪當普通考試，你中二嗰年考全班尾三，見完家長，我有冇鬧你吖，無吖嘛。」
「但係你返到屋企打咗我成粒鍾…」我道。
「我打你係因為你無盡全力!做人嘅嘢最緊要對得住自己，依家嘅你我相信考試時你一定會盡全力，盡咗力就即係對得住自己，咁樣考成點都無所謂，阿媽都會體諒你。」





咁樣講完，我忍唔住攬住阿媽。
「阿媽，我好驚呀!!」
「傻仔，驚乜嘢，你依家睇到佢咁重要，其實佢只係一個普通考試仔。你阿媽我嗰陣書都無乜讀過，依家咪又係好地地，根本無嘢好驚。」

講完，老媽子推開我，入廚房拎碗湯出嚟。
「嚟嚟嚟，蘋嗰雪梨湯，潤喉呀。阿媽幫唔到你啲咩，聽日你就要靠自己。」

我接過碗湯，飲咗啖，好甜，好暖，好窩心，媽媽永遠是最好的。
「我瞓啦，好鬼眼瞓，你都早啲瞓，記得唔洗驚。」老媽子講完，就返咗入房。

我飲完碗湯，即刻沖涼刷牙上床瞓教，希望可以瞓耐啲。
但我喺床上面典咗成粒鍾先瞓得著，因為我不停喺度幻想聽日會係咩境況。

條題目會係咩?




個考場係點樣?
會唔會見到識嘅人?

雖然其實我都成日聽到啲大人話咩大個咗回望過去，公開試只係人生一個小關口。
但對於依家嘅我嚟講，佢就係最大嘅關口呀!!!
原來真正殺到埋身嘅感覺係咁樣。