自修室，學界既蘭桂坊: 56
三月十六日，今日Shirley同Jojo都要考中文口試。
今日見到佢地兩個，比起平時嘅裝扮唔同咗好多，Shirley就一條連身長裙，Jojo就白恤衫黑色長褲，加埋佢個bob頭，成個打扮好中性。
我第一次見到Jojo咁樣嘅look，忍唔住笑佢。
「嘩，你做乜著到成個男人咁呀。」
「收皮啦你，今日考Oral呀，緊係著得Formal啲架啦。」
「你咁樣又未免太Formal啦掛…」肥鈞都認同我。
「哈，話唔定有分加呢。」Jojo講完就坐低繼續溫書。
跟住喺自修室，我經常咗望右望，睇下Shirley同Jojo有冇緊張。
不過佢地好似乜事都無咁，我問佢地，佢地都話口試好小事，無咩值得緊張，反而驚考大卷多啲。
我諗返自己之前緊張到傻咁，可能呢啲就係男仔同女仔嘅分別。
好快就到四點，Shirley夠鍾出發去考，我就送佢去車站搭車。
「記得飲多啲水，記得唔好講英文，記得唔好昅仔呀。」我道。
「痴線，我點會昅仔。」Shirley聽到我咁講，笑了笑。
「講下笑姐，加油。」講完，我就錫一錫佢塊面。
錫佢嘅時候，我見到佢個恤袋有幾粒嘉應子。
「咦，Jojo都有俾嘉應子你食呀?」
「係呀，佢俾我嘅時候，我仲笑佢娘。」
「哈哈，我都係，不過呢，真係有用架，你到時記得食返粒，同埋記住唔好俾考官發現你食緊嘢呀。」
「知啦。」
講完，車就到，望住佢上車，睇嚟佢幾有信心，一啲驚嘅感覺都無。
Shirley不嬲中英文都幾好，應該無問題嘅。
送完Shirley，準備行返上自修室嘅時候，我經過自修室樓下間七仔。
諗起Jojo琴日嗰幾粒嘉應子，一陣就到佢考，我應該都要幫佢加加油。
我喺七仔買咗盒Melty kiss，上返去放喺佢枱頭。
「見咁耐無請過你食，你前幾日又俾嘉應子我，依家請你食朱古力啦。」
Jojo見到我盒Melty kiss，笑咗笑。
「多謝喎。」
「仲有呀，之前聖誕節無禮物俾你，依家當補數。」
「嘩，送盒朱古力就當哂咁多樣嘢，你都好著數喎。」
「哈哈，係架啦。」
「無賴。」
「咁你一陣考試前記得食啦喎，食完甜嘢個人多啲糖份，有助思考。」我道。
「睇下點啦，我都係鍾意自己啲嘉應子多啲!」
「超，咁算，咁留返俾我自己溫書食。」
「你都傻嘅，送咗就送咗，何況你話係聖誕節禮物，我就趣趣地收咗佢啦。」
Jojo將我盒朱古力放咗入書包，好快，佢都要去考試。
我無送佢搭車，因為我知道，呢樣嘢我唔應該，亦都唔需要做。
考完口試後，大家都明白呢個只係一個小小嘅熱身，等大家都投入考試嘅氣氛入面，往後嘅日子，我地就要面對一份又一份嘅大卷。
離我地最近嘅，就係最難控制嘅中文，因為你永遠唔知自己會唔會炒，但一炒，就永不翻身。
溫書時除咗做past paper，我地仲不停咁互相share一啲事例，語例，希望可以對作文有啲幫助。
好快，三月三十日，今日考中文卷一卷二。
中文，閱讀並唔係我嘅強項，但作文係我強項。
只要擁有幾個貼近題目要求嘅例子，每個作簡單論述，要拎5以上並不為難。
當我考完，自信滿滿咁走返出嚟，嗯嗯，應該考得唔錯。
接住嘅聆聽同綜合，多得老媽子嗰部用咗成兩舊水買嘅收音機，我無俾啲大牛龜同埋地圖炮擾敵，平平安安咁就渡過咗。
第二日，考通識，我呢啲專業9upper考通識特別得心應手，加上自己作文底幾好，雖然自己鳩噏完一大輪都唔知自己up乜，之不過應該過到骨嘅。
四月十三日，考英文，其實由細到大，英文不嬲都係我最差最差嗰一項，唔識串字，用錯tense，用錯in at on之類嘅通病我全部都有，好彩地Shirley英文好好，自從佢做咗我女朋友之後，佢就成日教我英文，我亦都因為佢主動接觸咗英文好多，所以考起上嚟，叫做ok咁啦。
四月十五日，考Maths，今日我地五個都喺同一個考場，我地幾個都好早就去到間學校。
肥鈞一臉輕鬆，喺間學校閒逛，行行下仲拎部PSP出嚟打太鼓，有啲唔識佢嘅人見到佢咁樣喺度笑，以為佢係嚟氈屍底，我就笑返嗰啲人，因為肥鈞一定拎硬5**。
我自己Maths都叫做ok，我唔求拎到好好成績，希望坐4望5咁啦。
去到間學校都無拎書出嚟溫，因為我要幫我身邊嘅Shirley作最後衝刺。
Shirley拎住本雞精書，唸唸有詞，起勢喺度背sin cos tan。
我望住佢一臉緊張咁嘅樣，我都好明白，因為佢嘅maths真係比較差。
八點三，考場度門開咗，夠鍾要入去考試了。
Shirley見到啲人陸陸續續咁入去，佢開始好驚。
「死啦…我仲未背好哂啲公式呀…」
「唔好緊張，其實你背到，你緊張先至覺得自己唔記得姐，輕鬆啲，夠鐘啦，要入去啦，加油。」
Shirley一路扁住咀，一路同我一齊走入去。
我回頭望一望附近嘅Jojo，佢都執好哂嘢，我留意佢拎咗粒我買嘅Melty kiss出嚟食。
「喂，咁自私自己食，我又要。」我道。
Jojo聽到我咁講，笑一笑，俾咗一粒我。
「加油啦。」
「加油。」