自修室，學界既蘭桂坊: 48

接下來呢兩日，我住喺Shirley屋企，著佢爸爸嘅衫，一齊行超市，照顧Shirley嘅三餐，我地嘅生活就好似兩口子咁，好幸福美滿，果然，情侶係必須經歷一啲考驗先可以令雙方更加穩固。

平安夜，我地無出去，留喺屋企，我攬住Shirley一齊瞓，好平靜咁就渡過咗。

十二月二十五日，聖誕節，今日係我第一次有女同我過嘅聖誕節。
有女嘅聖誕節會係點樣?我都好想快啲知道。

起身已經十一點幾，Shirley仲未起身，我又去起身煎個蛋，煎緊嘅時候無聊，打開FB睇下，睇下其他人嘅平安夜點過。

我見到肥鈞同Venus去咗間好似好高級嘅西餐廳燭光晚餐，望住喺柔和燭光下嘅Venus。




唔知平安夜，佢地有冇失身呢?

再碌多兩嘢，我竟然見到兩個幾月嚟都無update過fb嘅Jojo。
佢po咗一張家庭照，佢著住一身聖誕老人裝，拎住個噹噹，成身紅卜卜嘅佢，顯得佢塊臉珠都紅卜卜咁，再加上佢嘅招牌笑容，真係好cute。

我望望個caption，寫住「平安夜同屋企人過才是最幸福的，唔知聽日會收到咩禮物呢:P」

見到呢句caption，我突然醒起，我話過要送聖誕禮物俾佢架喎，大獲。
佢呢句caption係唔係同緊我講?





我唔送嘢俾佢，又無咗件事，佢會唔會唔開心?
唔得，我以前辜負咗佢咁多次，我唔可以連呢啲咁小嘅承諾都做唔到。

噗一聲，Shirley無啦啦撲埋嚟攬住我，嚇到我差啲連個鑊都趺埋。
「喂，小心呀，煮緊嘢呀。」
「嘻嘻，Merry christmas呀。」Shirley道。
「Merry christmas，乖乖地去嗰邊坐，好快有得食。」

我煎好個雙蛋，放喺枱面，望住Shirley食，但係我依家剩係諗住今晚Jojo份禮物點算好。





「車厘龜，你煮啲嘢愈嚟愈好食喎。」Shirley道。
「哈哈，係咩，可能呢排煮得多，熟手咗。」我回過神答。
「今日聖誕節，不如我地晏就出街吖?」

仆街啦，我最唔想聽到嘅問題出現了，之不過，我有得say no咩?
「好…但係我無哂衫著啦，我著過嚟嗰套衫都臭哂，不如我依家返一返屋企，換過套衫再出過嚟吖?」
「好呀。」

食完個早餐我就即刻狗衝返屋企，返到屋企，我就見到老媽子。
老媽子一見到我，又走埋嚟索咗我幾嘢。
「阿仔，你兩日無返過嚟屋企。」
「係呀，我咪Whatsapp話咗你知我去咗朋友屋企溫書囉。」

老媽子一臉懷疑，然後道。
「朋友?定係女朋友呀?」





又俾老媽子一眼看穿，我唯有點頭承認。
「唉呀…平安夜…失身夜呀。阿仔…你有冇做錯事呀…」

雖然我平時乜都同阿媽講，但呢樣嘢，我死都唔會咁早認住。
「無呀，我地無亂嚟，真係剩係溫書。」
「你知唔知當年，我就係喺平安夜失身咗俾你老豆…」

屌，你做咩無啦啦講呢啲嘢出嚟，你會搞到我有幻想…
老媽子又再搭住我膊頭，望實我對眼，然後講。
「做男人，最緊要有承擔，要負責任，你老豆當年搞完我之後，無幾耐就同我求婚啦，咁先係好男人。」

「知啦，你唔好再講啦。」我嬲嬲地道，睇嚟佢已經認定咗我同Shirley係有搞過嘢…
「你依家係咪嫌阿媽長氣先?」
「唔係，只係我聽到老豆咩搞你，搞搞聲，個感覺好奇怪。」





我咁樣講完，老媽子笑咗笑。
「傻仔，你老豆唔搞我，又點會有你?」
「你都大個仔，怕咩尷尬，我就唔信你唔識，我成日都裝到你喺房做嗰啲嘢架啦。」老媽子續道。

屌…你係咪想講你成日睇到我打飛機…

「知啦知啦，總而言之，我同Shirley無做過啲咩嘢，呢兩日真係剩係溫書。」
「你咁講就得啦，我信你架啦。」
「嗯嗯。」終於可以駛走個長氣老母。
「記住呀，男人最緊要係講過要算數呀，負責任呀。」老媽子再回頭講一講，就返咗入房。

講過要算數…我知，我依家咪努力緊囉。