自修室，學界既蘭桂坊: 43
返到入自修室，我坐低，望下Shirley份卷，望下個timer，佢仲有成個Section B未做，但只係剩返二十分鍾。
唔知係咪我望住佢，搞到佢仲緊張，望住題數一直都落唔到筆。
時間一分一秒咁過，好快就夠鍾。
「夠鍾啦，要停筆啦。」我道。
「唔制呀…」Shirley一直揸實份卷，唔肯俾我。
「唔好扭計啦，今次衰咗，知道自己唔識啲咩，下次咪再努力過囉。」
Shirley扁一扁咀，俾咗份卷我，就伏低喺度。
我一路幫佢改，發現佢錯好多…好多…
最後，佢得六十分。
「改完啦。」我拍拍伏咗喺度嘅Shirley。
「求下你，唔好同我講我幾多分。」
「其實，都唔係好差姐。」
「你拎幾多分呀?」
「我…八十二分。」
「咁Jojo呢?」
「同我同分呀。」
我見佢唔出聲咁嘅樣，就諗住安慰下佢。
「唔緊要啦，仲有大把時間，你唔識嗰啲我教返你吖?」
「唔洗啦，你點教我都唔識架啦，我無U入架啦。」
「做咩發脾氣…」
「Econ又溫唔掂，依家做maths又唔掂，你話我仲有咩用吖?」
「不嬲你最差都係呢兩科架啦，你唔好唔記得你中英文都好過我架，係因為你中英文好你先唔洗溫姐，你唔好剩係記住啲衰嘢啦…你唔係話你想入文學院咩，Econ maths差啲都唔會好大影響姐。」
「我係怕差到連格都合唔到…」
「點會，你依家個成績，夠合格有餘啦。」
「其實我拎咗幾多分?」
「六十分，一定夠合格。」
本身Shirley心情好似好返小小，但當我一講完個分，佢又dup低個頭，灰咗。
「唔好灰心啦，休息下，一陣再嚟過，去食個晏先?」我摸摸佢個頭。
「嗯。」
跟住我就同Shirley Jojo又再落返自修室下面個熟食中心食嘢。
「嘩，好耐無嚟啦，好懷念呀。」Jojo道。
「你懷念呢度啲嘢食姐，肥妹。」我見依家同佢好似無乜嘢，開始串返佢。
「哈，係呀，吹咩?」
嗌完嘢食，我地就一路食嘢一路吹水。
「呢兩個月我無嚟，自修室有冇發生啲咩特別事呀?」
「有呀，有次我地又見到個小豬頭，掉低佢嗰幾個兄弟，拖住條女一齊嚟自修室，仲望住佢地打茄輪添。」我答。
「咁你有冇走埋去扮BB仔呀?」Jojo笑道。
「你唔喺度，我唔敢呀，哈哈。」
「車，無啲膽色，仲以為你會幫我出返啖氣。」
「下次有機會再見到佢，不如試下你走去扮吖，應該會有說服力啲。」我道。
「痴線!我先唔會陪你癲。」
「咩係扮BB仔呀，點解我唔知嘅。」Shirley問。
「你嗰次都喺度架，你唔知咩?半間灣修嘅人都睇到喎。」我道。
「可能我嗰陣聽緊歌，留意唔到…」
「嗰次真係笑到碌地，阿楠點解你會去做，我真係完全係講笑。」Jojo道。
「唔知喎，我咪話係因為我覺得好玩囉。」
「你份人唔好下下咁鍾意玩得唔得，遲早累死你呀。」Jojo道。
「講到咁嚴重，玩下又有咩所謂。」
「車厘龜，一陣上返去之後，你教返我啱啱份Maths卷呀?」Shirley突然插咀問。
「好呀，緊係得啦。」
我地食完飯，上返自修室，肥鈞同Venus都嚟到，我地又再次繼續溫書之旅。
我拎返Shirley嗰份Maths卷出嚟，將佢做錯同唔識嗰啲題目逐題逐題咁教返佢。
佢似懂非懂咁聽住，我教完其實我都唔知佢究竟識唔識。
之不過佢就不斷keep住係咁問我嘢，有啲問題都幾低能，不過無計啦，佢係我女朋友，點都要答佢。
「教咗咁多題，我有啲攰啦，不如你試下自己做幾題先，再有唔識我先一次過答你吖?」我道。
「嗯嗯，俾你休息陣，不過你要隨傳隨到架。」
食完飯溫書，係會有種特別攰嘅感覺，加上我晨咁早起咗身，琴晚瞓唔夠，我溫咗無耐就瞓著咗。發咗個夢。
發夢，你可以睇到啲你喺現實中留意唔到嘅嘢，又或者諗到你喺現實中諗唔到嘅嘢。
「我鍾意呢套衫多啲。」
當我講完呢句說話嘅時候，Jojo一邊扁咀，一邊從我手中搶走佢揀嗰套衫…
「我唔食啦，我要返屋企食，你地食得開心啲。」原來當我唔揀佢套衫嘅時候，佢已經覺得我唔會揀佢…所以選擇離開…
「我地行先啦Venus，唔好阻住佢地。」Jojo拖住Venus隻手，離開我嘅視線範圍…
「車厘龜，你好賤…」Jojo一邊掉頭走，一邊用手擦乾自己嘅眼淚…
喺我嘅夢中，Jojo嘅說話，Jojo嘅身影，一段又一段嘅畫面浮現於我嘅腦海。當我知道Jojo鍾意我之後，夢見呢啲片段，原來我當時做嘅每一個抉擇都喺度傷害緊佢。當時嘅我雖然不斷咁令佢唔開心，但佢依然用佢嘅樂觀同佢燦爛嘅笑容去回敬我，令我開心，令我笑。
點解當時嘅我留意唔到?點解我要發夢先知道?如果我一早知，我就唔會咁揀…
「兩個只能夠揀一個，男人最緊要嘅係專一呀!!」
「邊個同你一齊最開心，最可以有嗰句講嗰句嘅，咪揀邊個囉。」
Jojo，對唔住。
Jojo，同你一齊嘅時候，我先至最開心。
Jojo，我鍾意你。
發夢真係好，可以俾我喺度叫春，你話我扮情聖又好，MK又好，乜都好，你知唔知，我真係忍得好辛苦。
「祖祖…祖祖….」