自修室，學界既蘭桂坊: 42

第二日，今日已經開始放聖誕假，雖然講就講係放假，但我地都繼續落自修室。
今日Jojo會返番嚟，我地個溫書團終於都齊返人。

我晨咁早就去咗自修室霸位，順便買盒Melty kiss放定喺以前Jojo坐開個位度。
霸完位，未有動力溫書住，我就睇下Shirley佢地會幾點到。

我見佢地last seen 都仲係琴晚，睇嚟佢地琴日玩得太攰，仲昏迷緊。
忽然有人拍拍我膊頭，我拎轉頭望望，係Jojo。
好耐無試過係自修室見到Jojo。





「Hi，早晨。」Jojo道。
「咁早嘅你?」
「差唔多啦，你咪仲早。」
「你盒朱古力呀。」我指住佢個位盒Melty Kiss。
「Hehe，多謝哂喎。」

Jojo一坐低，就拎咗份Maths past paper出嚟。
「喂，狀元，我地鬥下?」
「好呀，想點鬥?」
「我地做完呢份past paper，拎份marking交換改，睇下邊個高分啲?」




「好，但輸咗嗰個點先?」
「err…諗唔到，之後再算啦。」Jojo道。
「咁好啦。」

我地用電話set咗timer計時，就開始做。
呢份past paper，其實我之前上maths堂阿sir已經俾過我地做，所以做落我好多題都記得哂，無可能會輸。

做做下，Shirley都嚟到，佢一坐低就問我。
「喂，你做緊咩呀?」
「我做緊past paper呀，計緊時，等我做完再傾吖?」




「哦，咁好啦。」

由於我好多題都記得點做，有啲題目我直頭記得啲答案，我早咗二十分鍾就做完。

我望下我身邊嘅Jojo，佢仲未做哂。
「喂，我做完啦喎。」我諗住串下佢。
「妖，咪嘈啦。」


我見佢做到躁躁地咁，就唔煩佢，我轉個頭，睇下Shirley做緊咩，佢一個人溫緊econ，又好似好悶悶不樂咁。

「點呀，你溫成點?」
「唉，溫極都溫唔入腦呀，背極definition都背唔到…唔想溫啦。」
「唔好咁啦，溫呢樣唔入腦嗰陣咪溫下第二樣囉，唔好逼自己。」我見佢咁苦惱，就安慰下佢。
「點解你依家咁叻，我就溫極都仲係咁樣…明明我已經好努力…」




「傻架咩你，唔好諗埋呢啲嘢。」
「嗯…」
「不如你俾你份Past paper我做下吖。」Shirley見到我份卷，就講。
「好呀，你做完我幫你對吖。」

呢邊Shirley開始做卷，第二邊，時間到，係時候同Jojo對卷。

我同Jojo交換大家份卷，互相幫大家改，佢不嬲成績都好好，都啱得好多下。

我地互相改完，我拎到八十二分，佢又係八十二分。
「有冇咁橋，咁今次就打和啦。」Jojo道。
「喂，不過我早你二十分鍾做完喎，點計先。」我笑道。
「你早我二十分鍾做完，都唔check卷，喺度hea，你check嘅話你咪啱得多過我我，贏到我囉，傻仔。」

佢咁講又好似幾有道理，我俾佢串到面懵懵，無言以對。





「好啦好啦…咁當我輸。」
「做咩咁順灘?」
「當係我欠咗你，想點罰我即管講啦。」
「嗱係你自己認輸，唔關我事架。」Jojo笑道。

做咗成兩粒鍾卷，個人好攰，我見Shirley仲好努力咁做緊，我就唔煩佢，行出自修室去個廁所透下氣。去完廁所出返嚟，我撞到Jojo。

「喂，我諗到點罰你啦阿楠。」
「好呀，講吖。」
「嗱，我生日你又無生日禮物，仲有幾日就聖誕節，我要收聖誕禮物。」
「咁…你想要咩聖誕禮物?」
「點可以係我講，你自己諗啦，你唔好送啲無用嘅嘢俾我就得啦。」
「咁…俾啲時間我諗諗…」
「唔洗急，你仲有三日時間。」