自修室，學界既蘭桂坊: 37

聽到呢句，我真係忍唔住。
「痴撚線，帶埋你去?我地唔識你架喎。」
「嗚…」的士佬聽到我咁講，喊咗出嚟。

佢一喊，架的士開始咗fing右fing，不受控制。
屌你!!!我唔想死喺呢度呀!!!

「你俾埋我去啦…你地唔俾我去，我可能呢世人都無機會去…最多今程車唔收你地錢…」的士佬已經喊到收唔到聲，成個細路仔咁。

「其實你可以自己一個去嘅…」坐喺佢身邊滴緊冷汗嘅肥鈞細細聲道。




「收聲呀你!!!!」的士佬一聲怒吼，成架車又震咗震。

「一個人去迪士尼?你係咪低能架?你有冇見過有迪士尼嘅故事係得一個角色呀？我係米奇老鼠呀!!!我嘅米妮呢!?我隻布魯托呢!?我嘅鳩飛呢!!!?呀!!!!!」

我見到肥鈞同Venus都捉實個扶手，擰埋一邊。
Shirley捏一捏我隻手，我都知道喺呢一刻嘅佢好不安，好懷疑個的士佬係咪喺青山度走出嚟。



「好啦，你同埋我地一齊去啦。」突然之間，Jojo開聲。




「真架!?」本身喊到收唔到聲嘅的士佬聽到Jojo咁講，即刻拎轉頭問。
「你真係俾埋佢去?佢傻架喎?」我細細聲同我身邊嘅Jojo講。
「都話我今日生日，我大哂咯，我話點就點啦，佢好似好慘咁。」
「呀!!!!我終於有得去迪士尼啦!!!!」的士佬咆哮。


經過的士佬嘅忘命飛車，終於去到迪士尼，今次我都係第一次嚟，入到去，的確係幾靚，個feel真係幾童話，好彩今日閒日，人流唔算多。

一嚟到，的士佬同三個女仔就High大咗咁四圍參觀。
我見佢地周圍喺度睇，無諗過玩咁，就叫佢地。





「喂，嚟呢啲主題樂園梗係去玩機動遊戲架啦，行啦咪鬼睇。」
「唔得，我要同鳩飛影相!!!」的士佬大叫。

我無佢地咁好氣，就同肥鈞講。
「喂，去玩機動遊戲咯?」
「唔啦，Venus去邊，我就去邊…」
「屌…無撚用架你。」我嬲嬲地，你地唔係俾五舊水入嚟剩係影相下嘛。

正當我諗住自己一個去玩嘅時候，
「喂，我嚟陪你去玩吖。」喺度同緊Shirley佢地自拍嘅Jojo道。
「哦…」唔係要我同你獨處吓話…
「Shirley，你嚟唔嚟埋玩?」我續道，叫埋Shirley嚟，應該無咁尷尬嘛。
「我唔得架，我會驚，我唔玩得機動遊戲架…你地去玩啦，我要影相up fb。」
「咁好啦…」





自拍完，Jojo就走過嚟捉住我隻手。
「無時間啦，快啲行啦。」
嗚呀…點解佢可以好似乜事都無發生過咁嘅…

好快，我地就行到去飛越太空山嗰度排隊。
排緊隊嘅時候，我一直企喺度唔出聲。

我望住Jojo呢個喺呢兩個月消聲匿跡嘅人，再加上佢依家個bob頭look，感覺好陌生。好似一個啱啱識嘅人咁。

Jojo見我望住佢，笑咗笑。
「做咩呀，呢個頭唔好睇咩?」
「唔係…」
「哈，唔洗咁驚喎，我轉咗個look姐，我仲係以前嗰個Jojo嚟喎。」
「我仲以為我以後都唔會見到你添…」我直入正題。




「乜我似係啲咁唔珍惜友誼嘅人嚟咩?我唔會立亂同人絕交嘅，特別係你。」講完呢句，Jojo雙眼望實我。

佢咁樣樣，搞到我仲尷尬。
Jojo見我唔出聲咁，打咗我個頭一嘢。
「傻仔，講下笑咋，知唔知點解我揀今日搵返你呀?」
「點解?」
「因為今日係我生日，就當係一個新嘅開始，之前嘅嘢一筆過抺哂佢，我地重新做返朋友，好無?」

「好，緊係好啦。」聽到佢咁樣講，突然之間覺得佢好成熟。
「記住…係朋友!」

雖然呢個唔似我以前識嘅Jojo，但佢始終都係佢，我可以見返佢同同佢做返朋友，都係一件值得開心嘅事。

突然我醒起，佢仲未accept我fb個frd request。
我拎起我部電話，打開佢個fb，做返當時我喺自修室同樣嘅動作。




Jojo見到我咁樣，笑咗笑，之後打開佢個fb，accept返我個frd request。

我見add返佢個fb，就即刻噤入去碌幾嘢，發現上一次Update已經係兩個月前，即係我雖然之前睇唔到佢嘅嘢，但其實有冇得睇都無分別。

「咁你前排有咩做呀?」我問。
「無呀，日日返學，放學就返屋企溫書。」
「咁咪好悶?」
「仲有三四個月就考DSE啦，仲邊有咁多閒情逸致玩。過呢種生活先係正常架。」
「好啦…」

「你真係就咁就原諒我啦?」可能係我太有罪咎感，我問出呢條問題。
「頂你，男人老狗咪咁婆媽啦，講咗無事就無事，你再問埋呢啲問題我就真係嬲啦。」
「好好好，唔問唔問。」

「係呢，咁做咩你條裙短咗咁多嘅。」我見無嘢講，扯開話題。




「妖，做咩留意埋呢啲嘢，女仔扮下靚好正常姐，我都知我以前個look太村姑，依家咪學下人打扮下，個人靚啲，心情都好啲。」

「你有少少唔同咗。」

「係咩?變好定變壞先，但你好似無變過喎，都係成個傻仔咁。哈哈。」

唔知點解，佢以前串我，我一定會串返佢，到最後佢都係講唔過我，剩係識叫我收皮，但依家好似掉轉咗咁，佢串我，我就唔敢串返佢，可能係因為我都仲係形住同佢有嘢咁。

同埋，佢好似惡咗好多。