自修室，學界既蘭桂坊: 36

呢一個HI，可以話係世紀一HI。
我估唔到我仲可以見到Jojo呢個人。

之不過，佢個樣唔同咗，同埋佢竟然會hi我先。
突然間見到Jojo，我一時三刻俾唔切反應，呆坐咗喺度望住佢。
Jojo見我望住佢，笑一笑。
「做咩眼甘甘咁望住我呀，太耐無見，掛住我呀?」

咁耐無見，之前仲要係我搞到佢咁，依家佢竟然無啦啦主動聊我講嘢，老實講，我完全唔知俾咩反應佢好。我唯有問佢。





「你做咩剪咗個咁嘅頭嘅?」
「哈哈，短頭髮，清爽，剛強，啱哂我。」Jojo笑一笑道。
唔知點解，我硬係覺得佢講嘅嘢別有用心咁，不過見佢好似無哂嘢，我依家個心都安樂啲。

喺呢個時候，Jojo見到我份Econ卷，拎起嚟睇。
「Wow，五十分滿分你拎咗四十分喎，屈機。」
「哈哈，ok咁啦。」面對Jojo嘅瘋狂挑逗，我真係滴哂汗。

「喂，今日我地嚟唔係溫書架，係諗住搵埋你地去玩。」Shirley加把口埋嚟。
「做咩無啦啦去玩嘅?」我問。





Jojo拎住我份卷，一嘢哼咗落嚟。
「有冇搞錯呀你?今日係我生日呀。」
「sorsorsor，我唔知，係我錯。」

做乜鬼佢依家突然咁鬼活潑，好難捉摸呀!!!

「咁你地諗住去邊度玩呢?」我問
「去迪士尼!!」Jojo大聲一叫，搞到自修室啲人都望住佢。





「好好好，但不如我地出咗去先。」我見俾成班人望住我地幾個，好柒。
出到去，我即刻講。
「去迪士尼?依家都成四點啦喎。」

「今日我生日呀，我大哂我話事!!」Jojo又大叫。
頂…你咁high做乜嘢…
「無乜時間，我地快啲去啦，搭的士去啦。」Shirley道。

仲要搭的士!!!!!!!?

落到樓下，就即刻有架的士駛過嚟。
「喂，係咪搭的士呢?」從的士佬嘅語調中，我聽得出有一絲奸詐。

我都估我會見到你架啦，的士佬。





肥鈞因為佢最肥，所以坐喺車頭，我就坐喺後面同三個女仔一齊坐，夾係Jojo同Shirley中間。

我好不安，除咗同Shirley嗰次之外，今次係我第一次同其他人搭的士佬架的士。
我好驚佢會亂講嘢，話哂佢都知道哂我啲嘢咁濟。

一上到車，Shirley就好似認得的士佬咁。
「咦，你之前係咪載過我地架?」
「哈，靚女，你認得我喎。」

緊係認得你啦屌，你嗰次差啲搞出人命呀。
之但係，的士佬好似扮唔識我咁。

「去邊呀幾位?」的士佬續問。
「迪士尼吖唔該。」Shirley答。
「迪士尼!!!!!?」




「係呀，香港迪士尼樂園呀。」我嬲嬲地道。
「呢度灣仔喎幾位學生哥，搭的士去迪士尼，好撚貴架喎。」
「係呀，你咪理啦。」
「好啦咁……..」唔知點解，我硬係覺得的士佬有啲難言之隱。

車開咗一陣，我坐喺Jojo側邊，尷尷尬尬咁，所以我唔出聲，搞到架車入面個氣氛怪怪地咁。

突然間，的士佬開腔。
「你地真係要去迪士尼!?」
我完全唔明佢呢個問題咩意思，去咪去囉，講到好似嗰度有危險咁。其他人聽到的士佬咁問都唔知點答佢。

「係呀，我地今日去嗰度玩呀。」Jojo見無人理佢，就答。
「嗚…」的士佬無啦啦崩潰
「由細到大，我都好想去一次迪士尼…呢個係我嘅夢想…」





經過咁多次，我已經feel到的士佬又準備發癲。
「我細細個已經好鍾意睇米奇老鼠，一直喺度諗我嘅米妮會喺邊…之不過我尋尋覓覓咗四廿幾年…我都搵唔到…」

的士佬又開始含春啦，佢地個個都呆哂，我見到肥鈞坐喺佢側邊，滴緊冷汗…

「你地知唔知迪士尼代表啲咩呀…」
「咩呀?」我地眾人齊問。
「係代表童話世界呀!!!一個完美嘅夢幻世界!!!入面所有嘢都係美好架…如果現實世界可以好似迪士尼咁…我就唔洗咁樣…」

「又點樣?」我已經唔耐煩，但我知道佢下一句一定係叫我地唔好再講。
「唔好再講啦!!!!!」的士佬大叫一聲。
「其實我講咁多嘢，都係想問你地，可唔可以帶埋我去玩…?」