自修室，學界既蘭桂坊: 38

好快，我地就排完隊入去玩，玩緊嘅時候，我就覺得呢個過山車好頹好無癮，但我望住喺我隔離嘅Jojo，佢玩得好開心，係咁大嗌，佢俾我嘅感覺係佢豪放咗。

可能係因為佢抑壓得太耐。

玩完出返嚟，Jojo就大嗌。
「正呀!!!成身爽哂，喂阿楠，我地繼續玩啦。」

你又叫我阿楠?
「做咩叫我阿楠，唔叫我車厘龜嘅?」
「仲細咩!車厘龜，你好鍾意人叫你車厘龜咩，你唔覺好kai咩。」




「唔係…我見你地以前叫慣，依家改口奇怪姐，你地肯叫返我阿楠緊係好。」
「哈，咁就得啦阿楠。」

Jojo帶住我周圍去玩，雖然呢度啲機動遊戲真係一啲都唔刺激，不過Jojo依然keep住好hyper，我慢慢都俾佢嘅hyper帶動咗，個人high high地。

玩完之後，我地就同返Shirley佢地會合。的士佬拎住好多公仔，話要放喺佢架的士上面咁話喎。

見返佢地幾個，睇嚟佢地都影夠相，的士佬又買夠嘢，我同Jojo就提議一齊去玩。Shirley同Venus都話自己唔玩得啲太刺激嘅嘢，睇我地玩，我望住的士佬攬住佢啲公仔，忽然有啲想睇下佢玩機動遊戲。

「喂，的士佬，一齊去玩啦。」我搭住的士佬個膊頭道。





「你話你想同我玩機動遊戲…?」的士佬問。
「係呀。」
「嗚………..」的士佬又喊。
「估唔到，等咗幾廿年，終於有人肯陪我玩過山車啦…」的士佬講完，望住企喺隔離嘅肥鈞，捉住佢。
「你呀，陪埋我去玩，你夠肉地夠安全感。」
「吓…?」肥鈞呆一呆。

跟住，我，Jojo，的士佬同肥鈞就上到一架好似礦車咁嘅過山車，的士佬同肥鈞坐，肥鈞個樣好似好不安咁。





「喂，你掂唔掂架。」肥鈞問。
「痴撚線，我揸咗幾廿年的士，為咗搶客，甩尾，爬頭，超速駕駛有咩未試過，呢架咁嘅爛鬼礦車會難到我?」

一講完，架過山車就開動。
我同Jojo坐喺佢地後面，望住佢地。過山車開始高速行駛，架車愈嚟愈快，的士佬個頭就愈哄得埋肥鈞度。

「呀!!!!!!!」的士佬大叫。
「呀!!!!!!!!!!!!!!」點知肥鈞嗌得仲大聲。
「屌你老母，做咩咬人呀!!!!!!!!」肥鈞繼續大叫，原來的士佬成個頭痴咗埋咗去肥鈞隻手臂到。
「救命呀，好撚痛呀!!!」

我喺佢地後面，笑到gapgap聲，點知突然Jojo都哄埋嚟，嗌埋一份。
「好驚呀!!!!」Jojo一邊大叫，一邊捉住我隻手，令我感受到佢嗰隻有肉地嘅手臂，軟林林咁，我一個唔小心，扯咗。

二分鍾後，架過山車終於到終點，的士佬終於由肥鈞隻手臂度昂返個頭上嚟，只見肥鈞個人暈暈地咁。





我離開個位，拎返啲隨身物品之後，肥鈞仲坐咗喺度，面青口唇白咁，我行埋啲睇睇佢，佢成條手臂都係口水，個衫袖仲有好大個牙齒印…
「痴撚線…我唔玩啦…」肥鈞好似啱啱打完十次飛機咁樣。
「挑，仲問我掂唔掂，死肥仔無撚用。」的士佬道。
好彩，我係同Jojo坐，唔係同的士佬坐姐。

玩完呢個過山車之後，肥鈞已經收咗皮，加上玩得落嘅機動遊戲都玩過哂，我地就慢慢行下影下相順便等睇煙花。

行行下，我地去到白雪公主許願洞，Jojo一見到白雪公主，就好high。

「嘩，我最鍾意就係白雪公主架啦，你地嚟同我影相吖。」

Shirley同Venus都好欣然咁走埋去同佢一齊影，肥鈞負責影，我同的士佬就企埋一邊睇住佢地影相。
「嗚，白雪公主呀…」的士佬又含春。





我見佢地都喺老遠處，終於可以同的士佬正常咁溝通下，唔洗扮唔識。
「點呀，你個白雪公主喺邊度呀。」
「你收聲啦，你顧掂自己先講嘢啦。」
「顧掂自己?我有咩要顧呀?」
「白雪公主就得一個，白馬王子都係得一個，你面前呢兩個女仔，你仲有排煩呀，你都唔想其中一個變巫婆架?」
「我咪揀咗Shirley…」
「真係咩，但我見你同肥肥地嗰個女仔玩得好開心喎，我就唔信你地無嘢啦，我認得個女仔，之前錫過你架喎。」
「係，但我之前傷害過佢，所以佢依家應該無嘢架啦…」
「你知唔知，女仔通常都比較長情，你無嘢姐，但我就唔信佢咁快就無嘢啦，仲有呀，女人最記仇，你傷過佢一次，佢記你一世呀!」

「你以前又有傷害過女仔呀?」

「唔好再講啦!!!!!」
「呢個女仔我見過兩次，之前明知你有Shirley都痴埋嚟，又拖手又剩，佢係咪姣婆嚟架?」的士佬道。





我聽到的士佬咁樣話Jojo，嬲嬲地。
「食屎啦，你都唔識佢…佢好女仔嚟，所有嘢都唔關佢事，係我錯，係我搞到佢咁…」

「挑，都話咗你仆街仔嚟架啦，我今日有得嚟迪士尼，心情好先俾面你唔爆你大獲，但係你咁樣呀遲早都會自爆呀!!!」
「其實之前當我傷害完佢之後，佢呢兩個月都消失咗，一直都相安無事…我已經一直諗住同Shirley一齊落去…」

「哼，咁佢依家出返嚟，一定有佢嘅原因。」的士佬道。

俾佢咁樣講一講，我有啲驚。
「咁點算呀…上次叫你教我你又唔講…」
「做小矮人囉，不過小矮人無女。」
「屌，九唔搭八。」