自修室，學界既蘭桂坊: 35

第二朝，唔知係咪琴晚太激太攰，我起身時已經十二點，Shirley仲瞓喺我身邊，我望住佢嘅睡相，回想起琴晚我地做過嘅嘢，雖然我地嗰陣同煮嘢食時一樣，都係雞手鴨腳，之不過，成個過程都係充滿住愛。

我幾乎將所有嘅第一次都俾哂你，Shirley。

睇戲睇得多，通常起身先嗰個就負責煮早餐，遲起嗰個一起身見到有嘢食會好開心，所以我就落床去煮早餐。
我一路煎蛋，見無嘢做，就拎部電話出嚟碌，一開fb，就見到我同Shirley慶祝生日時嘅嘅合照，有成六十幾個likes。

我噤入啲like度睇，見到有肥鈞，見到有Venus，見到有個叫Andy Fong。
見到…Jojo。





Jojo雖然unfriend咗我，但佢同Shirley仲係frd，唔知當佢見到呢張相嘅時候，會有咩感受呢…

我情不自禁咁噤咗入去佢個fb，雖然個Friend request sent依然keep住，但係我見到佢換咗張propic，由一隻麥兜變咗做花師奶。

呢樣係唯一一樣我可以睇到嘅嘢。
究竟依家嘅你點樣?

好快，我煮好早餐，Shirley都起咗身，琴日我地做咗啲咁樣嘅嘢，我依家望住佢，唔知係咪我太毒，我喺度幻想緊佢無著衫個樣，搞到我好鬼尷尬。

啱啱起身嘅佢睡眼惺忪咁樣，好靚…





Shirley見我眼甘甘咁望住佢，笑咗笑。
「做咩呀?」
「無嘢無嘢。」
「一定喺度諗衰嘢啦你。」
我見尷尷尬尬咁，就諗住扯開話題，之不過我一唔諗呢樣嘢，第一樣諗起嘅就係Jojo。

「係呢，好耐無見Jojo，佢呢排點?」我問。
「佢近排笑返啦，睇嚟佢嘅心事已經解決咗。」
「係呀?咁咪好囉。」




「點呀，掛住人呀?」
「緊係唔係，問候下姐，我依家剩係會掛住你。」
「肉麻，你真係想問候嘅，我可以幫你轉達俾佢知架喎。」Shirley笑了笑。
「唔洗啦唔洗啦，唔好俾佢知，佢知嘅話可能會暗爽，我唔想俾佢爽。」
「你地兩個就係咁鍾意鬥氣。」

食完早餐，今日星期日，老豆同老媽子有排都未返，我見無嘢做，就搵套戲嚟睇，老媽子平時好鍾意租戲睇，我入去佢間房，咁啱見到有套係放咗喺枱頭，叫One day，情約一天。

啱哂，同女朋友睇戲，睇愛情片就實無死。
我拎住餅碟，問Shirley睇唔睇，佢二話不說就應承咗。
套戲講一對男女，男嘅係一個花花公子，個女就係一個純情女生，二十年嚟一直以知己嘅身份時聚時散，雖然到最後佢地都係喺埋一齊咗，但到最後個女主角好出乎意料地無啦啦俾架車撞死咗，睇到係我側邊嘅Shirley喊哂口。

我無喊，但係當我睇完，我就喺度諗，如果我同Jojo可以維持呢種關係，做返朋友就好，哪怕一年只可以見一次，總好過以後都見唔到。

「個女仔好慘呀…」Shirley邊喊邊講。




「係…真係好慘…」

唔知Jojo睇到呢套戲，會有咩諗法呢…
「如果我死咗，你係咪都會好似個男主角咁，永遠愛我，一直養大我地個細路仔?」Shirley問。
「會…緊係會。」

成日要我答呢啲問題，硬係覺得好唔自在，之不過我又無可能答唔會嘅，唯有求其敷衍了事。

睇完套戲，已經三點令，我知道老媽子佢地大約五六點返，我望住喺我身邊嘅Shirley，啱啱又睇完套愛情片，實在係忍唔住，今次，我學套戲個男主角，咩都唔洗講，做過好深情嘅眼神望住佢，好主動咁咀埋去。

就係咁我人生嘅第二次就嚟咗。








呢樣嘢，試過一次就真係停唔到，跟住嘅一個月，我把握好自己屋企無人嘅時間，一有機會，我就帶Shirley上我屋企，我地大家之間都開始有默契，唔會再雞手鴨腳，有一次，佢仲要笑笑口咁話佢學咗新招，我問係咩，原來係用口……

我知道，要個女仔用口唔係一件易事，個女仔一定係好愛你，但當佢用完口之後
，我更加愛佢…



好快就到咗十二月中，無見Jojo兩個幾月，呢個人真係喺我生命中消失咗。

放聖誕假前，學校成績出咗，我同肥鈞成績都進步神速，除咗中英文呢啲唔係話一時三刻就可以有大進步嘅科目之外，Econ geog我都差啲追到Hinson，肥鈞仲勁，Maths直頭過埋Hinson，做咗全班第一。

我地兩兄弟，唔單止打LOL屠人，唔單止落自修室屠女，依家連讀書呢樣我地本身最弱嘅環節都可以屠殺對手。我搭搭肥鈞膊頭，大家相視而笑，我地係最佳拍檔。

放學後，我Whatsapp Shirley話我有啲特別嘢想俾佢睇，然後佢覆返我話佢都有，我心諗，係咪又有新招?





落到自修室，霸完個位，我一路望住我呢份40/50嘅Econ卷，一路係度沾沾自喜，忽然，有人拍一拍我膊頭。

我拎轉頭，係Shirley，係Venus，係…
當日膊頭內彎嘅中短髮，今日變咗明日花咁嘅bob頭。
當日長到遮住膝頭哥嘅校服裙，今日露出修長嘅長腿。
唯一無變嘅，係佢白白滑滑嘅面珠墩，同埋佢肥肥地嘅身材。

「HI。」一把久違兩個幾月嘅聲線。
「HI….Jojo。」