自修室，學界既蘭桂坊: 34

往後嘅一個星期，自從Jojo消失咗之後，所有嘅嘢都歸於平淡。Jojo無再嚟自修室，只剩低我地兩對情侶，對面小豬頭嗰四個MK見無肉食，就轉咗位去溝其他女，我地終於可以平平靜靜咁溫書了。而我有一日亦終於有幸見到Andy同Marco，Andy拖嗰條所謂嘅新女，我認得，當我第一次嚟自修室嗰陣已經見過啦。

再無人同我拗Econ，我就變咗我地四個入面Econ最勁嗰個，大家有咩唔識都會走嚟問我，我教佢地嘅時候，就當幫自己溫書，個腦不停去記嘢，或者可以更容易去忘記另一啲嘢…

我好努力咁去忘記Jojo，因為我知道，我一直掛住佢係無任何好處，只會間接令我同Shirley慢慢變淡。

十一月九日，星期六，今日係Shirley生日，亦都係我地拍拖兩週月，我向肥鈞取經，買齊料自己整咗個芝士蛋糕，雪咗喺自己個雪櫃，呢兩日老豆同老媽子返咗大陸探親，我就諗住同Shirley喺我屋企慶祝生日，到時拎個蛋糕出嚟，俾個驚喜佢。

同Shirley補完習之後，佢話今日好值得紀念，於是又帶咗我去影貼紙相。
今次影之前，我問定哂個鏡頭喺邊，陣間擺咩甫士，終於，今次影得幾好，我地影得好恩愛。





然後，我地去到我屋企附近一間超級市場，準備買我地今晚嘅晚餐。我地一人一句，佢話想食牛扒，我就話要煎，到時洗餐懵，我話想食意粉，佢就話好易煮到唔好食。



我好鍾意同女朋友一齊行超市嘅感覺，因為咁樣我地就好似一對新婚夫婦咁
，為大家嘅晚餐做準備。

我地咩都唔識，又話買呢樣又話買嗰樣，平時唔會行超市嘅我，呢度每樣嘢都變得好新鮮，我地你一句，我一句，雖然好似拗緊交咁，但係個感覺好幸福。
到最後我都係屈服咗，買咗兩塊牛扒，幾支蠟燭，一罐忌廉湯。





返到屋企我地就開始煮嘢食，大家雞手鴨腳，個廚房又細，我地撞嚟撞去。落油咋咋聲嗰陣時大家一齊喺度鳩叫，到煎緊嗰時，佢就係咁話反啦反啦，我就係咁話未得呀未得呀，好好笑，亦好窩心。

到最後，搞到對手又污糟，成身又俾啲油煙燻到油淋淋，之不過好好玩。
幾經辛苦終於都煎到兩塊牛扒，可惜，我嗰塊已經燶撚哂。

Set好枱，放好哂蠟燭，熄埋燈，今次係一個自家制嘅燭光晚餐。

望住咁浪漫嘅場面，Shirley好開心。
「好感動呀，車厘龜親自下煮，唔知好唔好食呢。」




「唔好食你都要同我食哂佢呀，我煮得好辛苦架。」
「知啦…好好味呀。」
係咩，我嗰塊我食嗰陣就好似趙緊香口膠咁。

望住喺柔和燭光下嘅Shirley，今晚嘅佢特別迷人。

食完正餐，抖咗陣，我就喺雪櫃拎咗我自己整嘅蛋糕出嚟，喺廚所點起蠟燭，拎住慢慢咁行出去。

Happy Birthday to you
Happy Birthday to you
Happy Birthday to Shirley
Happy Birthday to you

我一路行，望住Shirley一路唱，雖然咁樣唱個feel好鬼柒，之不過喺我眼前嘅人係我女朋友，無計啦。





Shirley見到我咁樣，dup低個頭，對眼紅哂。
「唔好咁嘅樣，我整得好辛苦架。」我安慰佢。
喺個蛋糕上面，我寫住Shirley & James 2months anniversary。

「你係咪傻架，唔洗整咁多嘢…」Shirley已經有啲咽哽聲。
「你就傻，咁重要嘅日子，緊係要整多啲嘢，俾個難忘嘅經歷你嘛。唔好講咁多，吹蠟燭許願先。」

「等陣先，個蛋糕咁靚，我想影相。」
「好呀!」
「不如我地一齊影呀，我想up上fb呀。」
「好。」

影完之後，Shirley就吹蠟燭許願。
「今日我真係好感動呀，多謝你，車厘龜。」
「唔洗多謝，應該嘅，快啲食，唔知好唔好食呢。」




「一定好食!」

好快就食完個蛋糕，肥鈞無教錯路，個蛋糕幾好食，不枉我整咗三個鍾。
食完之後，我同Shirley就坐咗喺梳化休息，佢挨喺我身邊，一邊睇住部電話，望住我地啱啱影嗰張相。

「阿楠…」Shirley叫我。
佢平時叫開我車厘龜，無啦啦叫我做阿楠，有啲唔慣。
「做咩無啦啦叫我做阿楠嘅，你唔係叫我做車厘龜嘅咩。」

「嘻嘻，因為你依家好Man，所以突然唔想再叫你做車厘龜。」Shirley笑道。
「哦，哈哈，做咩?」
「你望住我，你答我吖，你愛唔愛我?」

好奇怪，又係呢啲例牌嘅女人問題，做咩要無啦啦咁問我。
「愛，緊係愛，唔係我點會專登搞咁多嘢。」當然，我亦都俾咗個例牌嘅答案佢。




「嗯…」講完Shirley就咀埋嚟。

喺呢一刻，我終於明白Shirley條問題嘅意思，當我答完佢，佢就將佢嘅一切都交付予我。

就係咁，我亦將我嘅第一次都交付予佢，好爽，好快，好攰，睇咗AV咁多年，我今日終於知道什麼叫做愛。

老媽子，我大個仔啦。