自修室，學界既蘭桂坊: 29

鏗一聲，喺我對面嘅Jojo呆咗一呆，連匙羹都跌埋，瞪大對眼望住我。
我笑一笑，嵩一嵩肩膊。

「係呀?咁幾好呀，你地好襯呀，好少人會拍拖嚟食粥喎，你快啲幫你女朋友吹下碗粥啦，咁先夠恩愛嘛，哈哈。」老闆娘笑道。

「下次再喺呢頭拍拖記得嚟我度食嘢啦。」講完個老闆娘就走返去灶頭到攪佢啲粥。

「你講乜嘢呀!?」Jojo紅都面哂。
「哈哈哈，嚟啦，我幫你吹下碗粥。」我無理佢。





自從我答完老闆娘Jojo係我女朋友之後，Jojo就一直無出聲，鼓起泡鰓，唔知係咪我開玩笑開大咗，搞到佢好尷尬。

同佢行緊返佢屋企時，佢一直dup低個頭，若有所思咁。
「喂?做咩又唔講嘢啫。」我見佢咁樣，就叫下佢。

Jojo依然無講嘢，我無佢咁好氣，唯有陪住佢行。行行下，佢突然捉住我隻手，拖住我。
之不過只係普通嘅手拖手，同Shirley嘅十指緊扣唔同。

我呆一呆，咁樣係咩意思?
「做咩…?」




Jojo無應我，只係繼續拖住我行，我見佢咁，就廢事鬆手，拖一陣姐，無事嘅…

五分鍾後，就行到佢屋企樓下。
「噢，到啦，拜拜啦，快啲瞓，唔好咁樣。」我鬆開手。

鬆開手之後，Jojo雙眼瞪住我，我從來都未見過佢咁樣…

「車厘龜，你好賤…」

我呆一呆，心諗咩事無啦啦話我賤。




Jojo一講完，就gut高錫咗我塊面一啖…頭也不回咁就走入大廈門口。

我企咗喺度，呢頭話完我賤，呢頭又錫我一啖，即係算點?
我摸摸自己嘅臉龐，啱啱佢錫我嗰一下，有觸電嘅感覺…

呠…呠…突如其來嘅一聲響安聲，嚇到我成個人震咗震。
「仆街仔!!!」一把久違嘅老牛聲。

一架的士慢慢咁駛過來，的士佬擔住支煙喺司機位大嗌，無見佢一排，佢滄桑咗。

無啦啦俾人鬧我仆街仔，我嬲嬲地。

「咦，仲以為以後都唔會見到你添。」我道。

「唉，呢一日始終都係要嚟啦…」的士佬道。




「我咪講過，男人最重要係咩呀，係專一呀，仆街仔。」

佢把聲好撚嘈，講嘢好銀耳，我唔想聽到佢講嘢。

「喂，我依家邊度都唔洗去，我唔會上你架車架。」
「我今日無話會載你!!!我架的士亦都唔會載你呢啲賤男人!!整臭我架車!!我依家係嚟屌醒你嘅!!」

「我錯!!!之前係我講得唔清楚，做男人要專一，除咗係要維持生態平衡，等其他男人都有機會之外，你知唔知最重要係咩呀!?」

「係咩呀?」

「你唔專一，喺度搞三搞四，你知唔知你會製造好多怨婦出嚟架!!你搞到佢地怨氣沖天!!!對愛情失去信心!!話唔定啲同性戀都係咁俾你呢啲契弟搞出嚟架啦!!!你知唔知呀，你污染緊個城市呀，你仲西過我架的士條死氣喉呀!!!」

「我邊有搞三搞四?由始至終我都係同Shirley…」
「收聲!!!!」的士佬一聲怒吼，比起以前佢嘅怒吼，今日大聲起碼兩倍有多。」





「你頭先係咪同嗰個女仔拖住手，嗰個女仔頭先係咪錫咗你一啖?咁都叫無嘢?吓!!!!?」

唉，我都知佢乜都知架啦，我無言以對。

「咁你依家究竟鍾意邊個!?兩個只能活一個。」
「我唔識揀呀，大佬，不如你教下我啦。」我崩潰。
「哼，我都係鳩up下姐，當年如果我識揀，我就唔洗咁…」
「當年你點?」
「唔好再講啦，有得揀邊個想執番梘呀，你好自為之啦。」
講完，的士佬就慢慢咁駛走架車…

「喂屌你，講咗等於無講，咁姐係點呀!!!?」我大嗌。

的士揚長而去，無再應我。




屌..咁姐係點呀…