自修室，學界既蘭桂坊: 30

當我搭車返屋企嘅時候，一直喺度思考緊的士佬嘅說話。
「兩個只能活一個。」
「兩個只能活一個。」
「兩個只能活一個。」
 
唉，點解要我揀。
 
一返到屋企，我就見到老媽子坐咗喺度，拎住部電話。
「阿媽，都話唔洗等我門，我去自修室會夜返嘛。」
 




老媽子起身，走入廚房，拎咗碗湯出嚟。
「嗱，飲咗碗湯先。」
 
我接過碗湯，慢慢咁飲。
「今日有個叫Shirley嘅女仔打嚟屋企。」老媽子道。
 
聽到呢句，我差啲噎親。
「佢講啲咩呀?」我問
「佢問你去咗邊。」
「你答咗我先，佢係咪你女朋友?」老媽子追問。




 
我猶豫咗陣，算啦，醜婦終須見家翁。
「係…」
「衰仔，咁快就識到女朋友?」
「哈哈，叫做係啦...咁佢同你講咗啲咩?」
「佢話成日唔知你去咗邊，擔心你喎。」
「咁你點答佢?」
「我話你一返到屋企攰得濟就瞓著咗，到依家都仲瞓緊。」
 
老媽子果然係老媽子，真係醒目。




 
「阿媽幫你講一次大話，無下次架啦，咁你去咗邊?」
「Err…我今日有啲手痕，去咗一日網吧打機…」
 
我一講呢句，老媽子就望住我，搞到我好唔自在。
 
「你同邊個講大話都得，但唔準同阿媽講大話。」老媽子突然變到好惡，好得人驚。
 
老媽子又再將雙手搭喺我膊頭，哄到勁埋望實我對眼咁同我講。
「我知啦，你一定係有第二個。」

屌你…老媽子，不如你去做讀心神探啦… 
「係唔係!!?答我!!」 
「係…」 





正當我做好哂心理準備俾我老媽子大大力屌嘅時候，佢竟然放聲大笑出嚟，搞到我呆撚咗。 
「叻仔!咁樣你知唔知代表啲咩呀，咁樣姐係代表我同你老豆遺傳好呀，我個仔，一出嚟識女仔就一箭雙鵰啦，陳家今鋪一定有後囉。」 

「我仲以為你會鬧我添…」 

「鬧乜鬼，依家識女仔姐，又唔係做人世，想當年我俾你老豆溝緊嗰時，你估我無後備咩，你估個衰佬無後備咩，成個世界咁多人，要搵到一個同你夾嘅人好易架喳，戀愛嘅嘢，唔係下下規定要一個配一個嘅，如果真係要咁，我諗好多人一世都搵唔到自己嘅另一半。」 

「最緊要嘅係，到最後你要揀得啱。」老媽子語重心長咁講… 

「我就係唔識揀…」 
「阿仔，嗰兩個女仔，邊個你一見到就會笑，邊個你同佢講嘢嗰陣唔洗咗諗右諗，有嗰句講嗰句嘅，你就揀嗰個啦。」 

「做人最緊要開心嘛，係咪?」老媽子續道。 
「大個仔啦，自己要識諗，我瞓啦，記住我個大話，聽日唔好自己穿煲呀。」 





講完，佢就返咗入房。 

阿媽，你真係我嘅人生教練… 

今日我上床瞓嘅時候，合埋眼兩秒我就瞓著咗了，講得大話多，個人真係會好攰…