自修室，學界既蘭桂坊: 28

搣咗佢幾下之後，我就話。
「點呀，依家咁你都唔會想去自修室住架啦，諗住有咩做?」

「我好攰呀，唔想郁，不如我地坐喺度聽歌吖?我好鍾意同人一齊聽歌架，咁樣好開心。」然後佢遞佢另一邊耳筒俾我。

雖然咁樣有啲悶，之不過風頭火勢，佢講咩都要say yes架啦。

聽住佢電話播嘅歌，大部份都係女仔歌，我好少聽。

坐喺維園，周圍好靜，耳筒傳過嚟嘅歌聲就充斥於我嘅腦海，




然後Jojo自己都唱埋一份。

「咁咁咁踏著步，我咁咁咁覓著路，如迷途只需咁樣樣做。 這裡有我跟你遊玩，有我你永不會沉悶，試試閉上眼聽我咁咁咁講嘢。 天上有星星為你閃亮 ，有嗰啲嗰啲植物朵朵輕輕擺動你，與小兔齊共舞，你跟我成日跳跳紮令我得到嗰種嘢…」

「喂一齊唱啦，好開心架。」
「我都唔聽呢啲低b歌嘅，唔唱。」
「你就低b歌!!!好好聽囉。」

Jojo無理我，繼續自己喺度唱，佢唱到個頭咗fing右fing 咁，好可愛。





到下一首歌，我期待緊佢有冇啲其他style嘅歌時，佢就話。
「喂，聽呢首吖，好正架。」

「荃灣大窩口葵興葵芳，荔景and美孚荔枝角…」
我聽到一頭霧水，咩歌嚟架?

「喂，咩歌嚟架?」
「哈哈，地鐵站歌，你唔覺得好歡樂架咩?聽完就記得哂啲地鐵站名，好似字母歌咁，好work架!」

「你唔播啲正經歌呢，我就唔會同你一齊唱。」我無佢咁好氣。




「正經歌…咁，呢首啦。」

我聽到個前奏，好熟，應該係一首好出名嘅歌嚟，之不過個歌手開始唱時，又好似無乜印象…

我也數過　排著隊等討好你有幾個
還未有新空缺　來容納我
正選只得一個　候選經已太多

「呢首咩歌嚟?好熟。」我問。
「最佳位置呀，不過呢個係趙學而版本，趙學而唱歌好好聽。」
「嗱…呢首夠正經啦…一齊唱。」Jojo續道。
「我唔太熟，我驚我跟唔到。」我道。
「慢慢嚟，跟住我唱。」

無論你喜歡誰




請你繼續留下身邊這個位置
時常在內心一隅　
剩低幾吋　留給這女子
誰共你好　都不礙事　我都會衷心支持
未必所有關係　亦受得起刺激　但我可以

虔誠地　熱戀一輩子
共你也許　真的不容易
喜歡你　最好不要講
安守這位置

我無跟到Jojo唱，歌詞又唔太聽得清楚，唯有跟住個旋律輕輕咁哼…

「安守這位置…」
Jojo唱完呢句後，挨咗落我膊頭度。





「車厘龜…你知唔知前日當我見到你咁鬧我時，我真係好唔開心，我真係覺得我地會就此緣盡架啦…」
「Sorry…」我呆一呆，除咗sorry，我都唔知講咩好…
「哈哈，你唔明嘅。」

講完呢句之後，Jojo就瞇埋眼。
我見佢好似瞓著咗，廢事整醒佢，唯有坐定定唔郁，唔知係佢hi錯掣定佢部電話係咁，個music player一直係咁loop最佳位置呢首歌…

微風吹過，我望住對面班細佬仔，聽住趙學而嘅歌聲。
師父，我諗我大概明白了。


當Jojo瞓醒時，個天已經黑哂。
「嘩，我瞓咗幾耐呀?」
「我諗差唔多三個鐘。」我答。




「Sorry呀，我無心架，你咁樣坐咗咁耐攰唔攰呀?」

今日，唔知點解，我地大家都係咁同大家講sorry…
「ok啦，無問題。」

講完，我個肚就打鼓。
「不如去食嘢啦?」我問。
「好呀!」

Jojo諗咗諗，就話。
「喂，我地好耐無去過嗰間粥鋪啦，你估個老闆娘記唔記得我地吖嗱?」
「一定唔記得，佢失憶架嘛。」
「我地去探下佢啦不如。」
「好。」





我地慢慢由維園行返去灣仔，沿途我地一路有講有笑，佢串下我，我又串下佢，睇嚟Jojo已經開心返哂，變返嗰個成日笑嘅Jojo。

去到粥鋪，接近成兩個月無嚟過，呢到又增添咗幾分頹廢同唏噓。
入到去，個老闆娘喺度攪緊佢啲粥，唔知佢今日有冇落鹽呢?
果然，佢係唔認得我地，我同Jojo一如以往，佢食艇仔粥，我食牛肉粥。

好快，老闆娘就倒好兩碗粥放喺我地枱面。
我即刻試一啖，咦，今次好味咗好多喎。
我示意叫Jojo快啲試下，佢試咗一啖之後，瞇埋眼笑咗笑，豎起個手指公。

「慢慢食下，睇熱呀，唉…依家愈嚟愈少人嚟呢度食嘢啦，可能係我老啦，煮啲嘢愈嚟愈唔好食…」

「唔係喎，今次啲粥好好味啵。」我道。
「係呀?咁就好啦，食多啲呀。」

「你地係兩個兄妹嚟架?」老闆娘問。

老闆娘已經第三次問呢個問題，果然佢係乜都唔記得…
我望住眼前嘅Jojo，喺度食緊粥嘅佢嘟起個咀，好可愛。
我諗起佢喺維園同我講嘅說話，我諗起趙學而嘅歌聲。

我心入面好想答一個特別嘅答案。

「唔係呀，佢係我女朋友。」我答。




https://www.youtube.com/watch?v=7XtO8NyElnA
https://www.youtube.com/watch?v=stcomlsP8C0
https://www.youtube.com/watch?v=-lB9Z4IeTDc