自修室，學界既蘭桂坊: 27

當我睇到Jojo段千字文後，呆咗一呆，心諗。
做乜鳩?
我唔明自己有咩問題，有個男仔add你好小事姐，大不了咪唔理佢囉，洗唔洗咁?
佢係咁話我唔明，咁我真係唔明吖嘛，你乜都唔講，點明呀。
於是，我就當佢係發癲，無理佢。

放學去到自修室，我去到嘅時候嗰四條仔已經到咗，又再坐喺我地對面。
睇見佢地個樣就躁。

等到Shieley佢地嚟到嘅時候，我見唔到Jojo。




「咦，得你地兩個嘅?Jojo呢?」我問。
「佢話佢今日返屋企溫，唔過嚟啦喎。」Shirley答。
「哦…」
「我見佢神色怪怪地咁，唔知係咪唔舒服。」Shirley續道。

睇嚟Jojo真係有啲嘢，同埋呢件事Shirley同Venus仲未知。
之不過見佢唔到，都唔可以知道佢發生咩事，所以我都係無從入手。

我打開部手機，諗住搵下佢，但當打開個Facebook inbox見到佢篇千字文…
我就唔知可以講咩好…





我碌返上啲，睇返我同Jojo嘅對話，我發現佢係咁話個小豬頭搞到佢好煩。
究竟佢點令到Jojo咁煩?

我扮嘢去一去廁所，起身時望一望對面，我見到佢地幾個唔係喺度玩手機就喺度瞓教，個小豬頭一直都喺度碌緊電話。

當我去完廁所，經過長廊行返去自修室時，我見到個小豬頭迎面而來。
條長廊好窄，我迫不得已同佢四目交投，雖然我地互相唔認識大家，但都有啲尷尬。

當佢走到去我身邊嘅時候，佢叫一叫我。




「hi，你好呀。」
「係。」我呆一呆，我都唔識你你做咩無啦啦叫我。
「我想問呢，你知唔知你個朋友今日去咗邊呀?」

嘩屌，三唔識七，點解可以咁進取嘅。
「唔知喎。」我求其hea應佢。
「好啦咁，唔該哂。」
「我地幾個中五架，新嚟呢間自修室，你地嚟咗好耐架啦可?多多指教。」個小豬頭續道。

呢個人講嘢雖然幾有禮貌，但俾我嘅感覺係一個斯文敗類。
我諗諗下，佢應該係好想狗衝Jojo。

「佢係我朋友嚟，你唔好諗住搞佢。」我冷冷地道。
「哈哈，我都係想同佢做個朋友姐。」





講完，個小豬頭就繼續走去廁所。

第一次同佢對話，佢俾我嘅感覺係佢極之，極之MK。


第二日，我上堂時又再睇多次Jojo段千字文，我覺得我應該要應一應佢，同佢講聲Sorry。

「喂，嘟嘟，Sorry囉。」

但過咗半粒鍾，佢都無應我。
搞錯，唔係真係咁嬲呀?

我開始炸佢個inbox，係咁copy句「喂，嘟嘟，Sorry囉。」俾佢。
炸咗有成五分鍾有多，佢終於應我第一句。





「無呢個人啵。」
車，原來又喺度耍傲嬌。

「唔好咁啦靚靚Jo，車厘龜知錯啦。」再加一大堆喊喊樣。
等咗五分鍾，佢終於應我。
「點呀車厘龜，搵我做咩。」Jojo道。

我見終於撬得開佢把口，就緊係繼續去。

「做咩琴日唔嚟自修室呀?」
「唔舒服。」

同佢傾計嘅時候，唔見哂佢啲xdddddd，好唔慣。

「係咪個小豬頭搞到你唔舒服?」我追問。





一見到我咁講，佢又靜咗幾分鍾。

「好長篇呀，上緊堂呀，今日放學你可唔可以嚟維園，我同你講返咩事吖?」

我見佢仲嬲緊，廢事激親佢，於是我就應承咗，我呃Shirley話我今日要補課，補完太攰，唔去自修室啦。然後放學我就直接搭車去維園。

當我去到維園時，見到Jojo一個人坐喺張長椅度聽緊歌。
我行埋去坐低，同佢say個hi，唔知係咪因為佢戴住耳筒聽唔到定係仲發緊脾氣，
佢無應我。

我say完hi但無回應，感覺好柒，於是我就唔出聲，等佢講嘢。

坐咗三分鍾，佢終於放低一邊耳筒，同我講嘢。
「Sorry呀。」





我萬萬都估唔到，佢第一句同我講嘅說話係Sorry。

「Sor咩ry，我講先啱。」我道。
「唔係呀…我頭先睇返我地啲對話，我嗰陣真係好語無倫次，但我嗰陣真係好亂，好驚…」

「其實咩事?」我真係唔明，一個男仔add你有咩咁亂。

「你知唔知前日我同你地講拜拜之後，個小豬頭就走埋嚟係咁撩我講嘢啦，你地又走哂，得返我一個女仔，我又唔識佢，我好驚…」

「吓，咁死纏爛打?」

「起初我都無理佢，但一路行佢一路跟住我，我話我報警架佢先走咋，然後琴日佢仲搵到我個fb嚟add，我覺得好變態，所以我都唔敢再去自修室，我唔想見到佢。」

「估唔到條MK真係狗衝到咁樣。」
「咁佢咁樣，點解你又唔同Shirley Venus講嘅?」我續問。

我一講呢句，佢又靜咗，唔知我係咪講錯嘢。

「我諗住你會幫到我嘛…同佢地講佢地都幫唔到我嘅…」Jojo道。

「放心啦，你繼續唔好理佢，最多我地陪你返屋企，佢一直接觸唔到你，過一排佢就會放棄架啦。」我道。

「希望係咁啦…」Jojo又再沉默。

「對唔住呀，我下次唔會再咁架啦。」喺呢個時候，除咗say sor都係say sor。

「得啦，知啦，係我嗰日講得唔清唔楚，依家你知道件事就好啦，我唔係咁小器嘅。」

「都話嘟嘟係最好人。」講完，我又搣佢面珠墩。

「妖，去死啦。」