自修室，學界既蘭桂坊: 20

當我嗌出呢句說話之後，全世界嘅焦點都放咗喺我身上。

「嘩，當眾求愛呀，好浪漫呀。」
「個男仔真係好有勇氣。」
「我就話係唔知醜啦。」
「你估佢掂唔掂吖嗱?」

「我地行先啦Venus，唔好阻住佢地。」

作為毒撚嘅我，呢世人第一次有成百幾條女一齊望住自己，談論自己，夫復何求?




之不過，我唔係咁諗。
我在乎嘅並唔係身邊嘅每一個，而係我眼前嘅Shirley，佢會俾咩答覆我。

Shirley沒有答話，只係笑咗笑，走埋嚟。
「行啦，傻仔。」
然後，佢主動拖住我隻手，將佢嘅五指扣向我嘅五指。
佢隻手板好柔軟，手指好纖幼。
佢拖住我一路行一路行，終於，我地行到去一條比較少人嘅大街。
我見佢一直無出聲，我自己都唔敢出聲，等佢嘅答覆，但嘅然我地都拖住手，應該無問題掛?





「下次唔好咁樣啦，你咁樣我有排俾人講呀。」Shirley輕聲道。
「嗯…對唔住，無下次。」
「緊係無下次啦，你有女朋友啦，仲想同邊個表白呀，嘻嘻。」


Shirley此話一出，我整個人抖動咗一下，嗚呀!!!!
媽呀，我得咗啦!!!
肥鈞，我得咗啦!!!
的士佬，我得咗啦!!!





「不如我地今日唔好去自修室啦，玩一日吖?」Shirley續道。
「好!!」

就係咁，我地一直拖住走，走到去銅鑼灣。
第一次同女仔拖住手行，除咗緊張，都係緊張。
之不過，拖住咗嘅手就同連結住嘅心一樣。
唔再需要用口講，只需要輕輕捏捏我嘅掌心，又或者輕輕捽一捽我嘅指尖，我就知道Shirley叫我。

我地去到世貿中心入面嘅一間遊戲機中心，佢話要影相去紀念今日喎。
第一次走入呢啲貼紙相機，望到一堆日系少女風嘅圖畫，嘅熟悉又陌生。
不過呢個地方可以俾我同Shirley單獨相處，係一個好地方。

我見Shirley噤咗幾噤，然後就話準備啦。
吓，我仲未準備好喎。
插…插…插…插。10秒都唔知有冇，影完。




我連個鏡頭都仲未搵到喺邊。
Shirley接連轉咗幾個甫士，我只係記得佢攬住我嗰個。
但我就只係一碌木咁企咗喺度，完全唔知發生緊咩事。

然後，望住啲相，佢就拎起支筆係咁篤，我無乜藝術天份，只好喺每張相上面，寫低今日嘅日期—九月九日，紀念下。

希望可以長長久久。


之後都係行街食飯，雖然呢啲我地以前都做過，之不過以前我地係朋友，依家係男女朋友，身份唔同，個感覺都唔同。

我要更加照顧佢，因為我係佢男朋友。

好快就去到夜晚，我地又搭嗰架由銅鑼灣駛向小西灣嘅巴士返屋企。





今次同上次唔同，巴士上層唔係剩係得我地兩個，有小貓三四隻。

佢帶住我坐喺比較後嘅位置，爭取多啲獨處嘅空間。

一坐底，佢就眼甘甘咁望住我。

我唔知佢做咩，之不過佢呢種麻倉憂嘅眼神，好迷人。

佢望多兩望，然後粒聲唔出咩都無講就錫咗我塊面一啖。

噢，男女朋友錫下好平常姐，我明嘅。

我望住佢笑咗笑，但佢都仲係眼甘甘咁。

我作為佢男朋友，點都要俾返啲表示，我慢慢咁哄埋佢，輕輕咁錫落佢個咀唇。





點知一錫之下，就停唔到了。佢慢慢將手放喺我頸後面，將我地兩個之間嘅距離拉近，我又試將雙手放喺佢腰間，諗住會同上次一樣啦，但我錯了。

佢個咀又開又合，同上次只係咀唇掂咀唇唔同。我一時反應唔嚟，俾佢錫到我成個咀唇邊都係口水…

我仲未搞清楚當下發生嘅事，於是我縮開咗，眼鯨鯨咁望住佢。
原來可以咁樣錫架?

Shirley望住我，咩都無講，又再咀埋嚟。
今次我唔可以再好似個傻仔咁合埋個口，我嘗試打開個口，配合佢。
佢個咀包住我個咀，我個咀又包返住佢個咀，我個咀感受到佢個口唇，佢條脷，佢嘅口水。

原來打茄輪就係咁樣。

就係咁，我地錫下停下錫下停下，一直錫到落車。呢半粒鐘，好激情。




錫到我牙骹都攰埋，我仲吞咗佢好多口水。

去到佢樓下，再同佢嚟咗個goodbye kiss之後，我就目送佢上樓。
喺我眼前呢個女仔，就係我第一個女朋友，我嘅初戀。100分嘅初戀。

回程時，我一路忍住肚痛一路同佢Whatsapp，點解我會肚痛?
可能係因為我吞咗太多佢嘅口水。