自修室，學界既蘭桂坊: 19

「唔撚搭的士呀!!!我學生哥嚟咋，遲個到姐，我唔會因為遲到俾成舊水搭的士喎，過主啦，客唔係咁兜架。」我大嗌。

「哥仔，拍拖未呀?」

「未呀屌你，關你咩事呀大叔。」

「就係你呢種咩都慢慢嚟嘅心態呀，搞到你仲未拍拖呀柒頭!!知唔知咩叫打鐵襯熱呀，知唔知咩係灘拎呀!!!」

「你估我想架咩屌，要有planning架嘛。」





「Plan乜撚嘢拎，係鍾意嘅，求其鳩講兩句都搞得掂啦，上車啦廢柴，我有話收你錢咩!」

嘅然佢又唔收錢，我無理由唔上車。

「呀叔我揸咗咁耐的士，最撚清楚咩嘢叫灘拎架啦，溝女同兜客一樣，你唔衝埋去兜，個客就會比人早你一步截Q咗架啦，到時你喊都無謂呀。」

遇到佢咁多次，我已經清楚佢嘅思考模式。

「大叔，你以前係咪試過俾人截咗個客呀?」我問。





「收聲呀!!!如果我以前知道呢個道理，我就唔洗咁樣…」

「點樣?」

「唔好再講啦…」

的士佬愈講愈細聲，同之前中氣十足嘅佢唔同。
睇嚟佢當年真係有一段可歌可泣嘅經歷。

的士佬之後一路都無講嘢，剩係喺度揸車。好快就去到學校門口。




「你究竟係咪鍾意個女仔!?」
「係….掛。」
「係就係，唔係就唔係，唔好掛。」
「係…」
「好!!今日放學，我喺學校門口呢度等你!!」
「下?做咩呀?」
「我即刻車你去佢到，你同我去同佢表白!!!」

唔撚係掛…玩咁大?

返到學校，我無遲到，啱啱好。
但我成日上堂都心不在弦，因為諗起一陣的士佬就會車我去同Shirley表白…
車，我死都唔去，佢都吹我唔漲架姐。
但…其實我又真係想表白喎。





唉，俾啲勇氣啦，遲早都要講，除非你唔想佢做你女朋友。

好快就放學，平時放學我一定第一時間離開學校，今日，有啲猶豫。
因為我已經見到學校門口泊咗架的士。

肥鈞拍拍我膊頭。
「喂，落自修室啦。」
「今日我未必得，我應該有啲嘢做。」
「有咩做?」
「肥鈞，今日可能係我一個好重要嘅日子。」
「咩事?」
「我應該會同Shirley表白…」

肥鈞聽到，呆咗一呆。





「嘩屌你!!唔聲唔聲，咁快去到呢個地步!?」
「係…我有諗住講你知架，你話你唔想聽姐。」
「屌!!!!!!!」肥鈞好大力咁揸實個拳頭，好似好唔抵得咁。

然後佢一嘢鍾落我個胸到，超大力，勁撚痛。
「做兄弟嘅，一定撐你嘅!!雖然我仲係毒撚姐，但我唔會咁自私要你陪我嘅，去啦屌你!!!」
「係…」
「到時溝到女唔好有異性無人性就得啦!!我實揼柒你架!!」
雖然肥鈞表面上好似鬧緊我咁，但其實我知佢係燉我高興。

唉，死就死啦。

我同肥鈞道別後，我就上咗的士佬架的士，經過一段忘命飛車之後，就去到Shirley間學校，佢地遲過我地放學，的士佬又揸得快，我去到佢地都未放學。

離佢地放學仲有五分鍾，我望住佢間學校，我好撚驚。




一陣一放學，一定有成百零二百條女湧出嚟，要我喺度表白，我真係會菸到衝上雲霄。

「大佬，一陣咁多人走出嚟，你要我喺度表白姐係要我去死姐。」我同的士佬講。
「就係要夠哂多人先至刻骨銘心架嘛，你識條春咩，信我啦，一陣等佢出嚟，你行埋去，同佢講，我鍾意你，你可唔可以做我女朋友，咁就掂架啦。」

「你依家講就易，你知唔知我好大壓力架。」
「唔需要有壓力，你覺得條女鍾唔鍾意你先。」
「應該都鍾意掛…」

我都同佢錫咗，唔鍾意無理由會俾我錫佢嘅。

「咁咪掂囉，嘅然兩情相悦，又豈在朝朝暮暮?」
「你噏乜鳩呀?」
「你唔好理，夠鍾啦，同我落車，我會喺附近睇住你。」





俾的士佬趕咗落車，我企喺佢地學校門口，好快放學鍾就響起。

啲女同學開始成班湧出嚟，見到我一個男仔，個個都投以奇異嘅目光。
媽呀，我依家真係好柒呀。

等咗兩分鍾，我終於見到Shirley jojo同Venus三個行出嚟。
我對腳已經係咁喺度震。
佢地三個見到我就叫住我，見到佢地行緊過嚟，我已經心知不妙。

佢地行到過嚟，望住我，Shirley率先開腔。
「喂，點解你會過嚟嘅?」
然後，Jojo都出聲。
「點解你咁快過到嚟架，無返學呀?大膽呀你。」

我望住佢地，雖然我依家心入面就只有嗰一句說話，但係點都講唔出口。

「阿仔，努力，阿媽支持你。」
「做兄弟嘅，一定撐你嘅。」
「知唔知咩叫打鐵襯熱呀，知唔知咩係灘拎呀!」

呀!!!!!!!!!!!!!!

我望住Shirley，大叫。
「我鍾意你呀，你可唔可以做我女朋友呀!!!」