自修室，學界既蘭桂坊: 21

自從有咗Shirley呢個女朋友之後，我完完全全脫離咗返學放學打機瞓教呢種毒撚嘅生活，依家嘅我充實咗好多。

準時起身叫醒佢，返學時認真上堂，為嘅就係讀好啲書，當Shirley有嘢唔識嘅時候，我就可以教佢，當然，有時都要偷一偷雞，喺櫃筒底覆佢Whatsapp。

放學就同肥鈞落自修室，我地每日風雨不改咁落自修室，自修室嘅每一張面孔，邊班人坐邊啲位，入面邊個同邊個拍緊拖，邊個暗戀緊邊個，我地都一清兩楚。以前，我嘅第二個屋企係IONE，依家，係自修室。

肥鈞繼續孤身奮戰，佢嘅maths勁咗好多，當我地有嘢唔識嘅時候，都會走去佢個位度問佢，之不過佢教親我地時都特別快，啲step又短，但教Venus時就一條數做成半粒鐘。

溫書嘅時候，我同Shirley會用盡所有方法連繫彼此，例如我地會拖住手溫書，我地會Share同一個耳筒嚟聽歌，又會等埋一齊去廁所。總之有咩方法可以令我地喺埋一齊嘅，我地都會做。





每日八點，我地就會去食飯，為咗就Jojo要食粥嘅關係，自修室下面嘅熟食中心就變成我地嘅例牌飯堂，食飯時，我地乜都傾，有時講是非，有時傾大家學校發生嘅事，有時傾Past paper，之不過傾親Past paper就會變咗我同Jojo嗌交，然後就要上返去對答案先知邊個啱。

去到每日我最期待嘅時間，就係離開自修室之後，送Shirley返屋企嗰半粒鍾，因為喺呢段時間我地先有機會兩個人真真正正咁獨處，我地會喺架車上面做啲咩?

心照啦。

逢星期六，我都會同Shirley同Jojo繼續去補呀肥Ray，由於我平時上堂好專心嘅關係，我依家都跟到佢講嘅嘢，有時仲可以教返佢地兩個轉頭添。

所以話，戀愛嘅力量真係好大。