自修室，學界既蘭桂坊: 22

好快，就過咗一個月有多，經過咁耐時間日操夜操，係一次Econ test入面我差一分就追到次次考試都考第一嘅Hinson，嚇到啲人死死下。

我好開心，然後我第一時間諗住Whatsapp Shirley話佢知，之但係等咗好耐佢都無覆我。
過咗一陣，我部電話彈咗隻麥兜出嚟。

「Shirley佢發燒呀，早退返咗屋企啦，你搵下佢，關心下佢啦。」
「原來係咁…唔該哂你!」

餘下嘅上堂時間我都無哂心情，個心只係諗住Shirley，





放學後，我無去到自修室，老早就返咗屋企，我一直望住部電話，之不過Shirley個Whatsapp一直都無online。

等到差唔多十點，Shirley先打嚟。
「喂?」對面把聲好虛弱，睇嚟真係好嚴重。
「喂?你無事吖嘛?」我好緊張。
「無嘢，發燒咋嘛，我休息下無事架啦。」
「不如我聽日過嚟探你吖?」
「傻架咩，我呀媽喺屋企架，真係無嘢，你聽日要補Econ呀，你專心上堂之後教返我好過啦。」
「好啦…」





第二日，我準時返到補習社，我見到Jojo已經到咗，喺度睇緊補習嗰啲章程。
我見佢背住我，我就慢慢咁行埋去，然後雙手一嘢大大力咁搣哂佢兩邊面珠墩。

「喂!!嘟嘟!!!」

Jojo嚇一嚇，拎轉頭見到我。
「妖，打爆你個頭吖嗱。」
「玩下姐，喂，琴日你係咪睇住Shirley早退?佢點呀?」我問。
「佢發燒囉，我摸過佢額頭，真係幾熱架，不過發燒姐，休息下應該無事嘅。」Jojo道。
「嗯…」




「唔洗咁擔心喎，HEHE。」佢拍一拍我膊頭。
「係呢，你知唔知今日係咩日子呀?」Jojo問。
「咩日子?」


今日係十月廿一號，據我所知，並唔係咩大日子。


「唔話你知，你估下啦，大日子嚟架!」
「挑，講啲唔講啲，唔估。」
「搞錯呀，今日係Venus生日呀，據聞肥鈞會同Venus表白呀。」

吓!雖然我知道經過一個月嘅時間，肥鈞因為教Venus maths，慢慢咁同佢擦出火花，但我真係唔知，條死仔諗住今日表白。

「個死仔表白都唔話我知，有冇搞錯!?」我怒道。




「人地低調呀，邊似得你咁要全世界都知吖。」Jojo笑說。
「咪抽我水，係呢，肥鈞會點表白?喺邊表?」
「呢層我點知喎，我剩係聽Venus講話肥鈞約咗佢今日喺銅鑼灣等咋。」

銅鑼灣?我地咪喺銅鑼灣。

「喂，JoJo，不如我地去捕佢地啦，應該會好好玩。」我說。
Jojo眼仔碌碌，然後笑咗笑。
「好呀!」


補習嘅時候我Whatsapp肥鈞，扮哂嘢係咁問佢今晚會去邊，本身佢死都唔講，但經過我瘋狂轟炸佢Whatsapp之後，佢就答咗我佢會去維園。

同Jojo補完習後，我見時間尚早。
「喂，Jojo，今晚先至去捕佢地，依家先三點幾，不如去睇套戲。」




「好呀，睇咩戲?」
我望住戲院出面，見到一套戲個名幾吸引，叫《反轉豬肚是王子》。
「就睇呢套啦。」
「好。」

睇完套戲，套戲係講一個肥仔著咗件變身西裝之後變咗型仔去溝女，好好笑，入面個女主角好靚。
「個女主角真係好鬼死靚。」我仲喺度回味緊。
「係呀!!!勁Sweet，個女主角係氣質派!」Jojo道。
「氣質派?哈，咁你係咩派?」
「我係…唔知喎…hehe。」
「咁我呢?」
「你?傻仔派。」
「超，我都估到你會俾啲膠答案我架啦。」
「妖，你就膠答案…」





Jojo靜默咗五秒，然後道。
「有人講過我係陽光…定爽朗派…yeah!」
「你係肥肥派。」我答。
「拜拜，收線啦我地。」
「唔好收線住啦，其實你係咪細個到依家都係肥肥地架?哈哈哈。」我笑道。
「咩料呀你，如果我答係你係咪唔同我做朋友先?」
「問下姐，好似未見過你小學雞個樣。」
「Wow，Jojo小雞樣，美艷全場，動人吸引。」

聽到佢咁講，我凝視咗佢兩秒，然後用好認真嘅語氣同佢講。
「其實睇睇下你唔係肥，你係大舊，哈哈哈哈哈哈。」
「妖…我係肥架…」
「你終於肯認啦咩?」
「食屎啦你!!」