自修室，學界既蘭桂坊: 23
好快就去到夜晚，我同Jojo好小心咁喺維園入面個公園度行，要搵到肥鈞佢地之餘又唔可以俾佢地見到。
最後，我地喺一條行人長廓度見到佢地。肥鈞仲拎住一個蛋糕盒。
佢地兩個雖然無拖住手，之不過行得好埋，有講有笑咁。
「嚟啦嚟啦，嚟料啦!!」我輕聲道。
「快啲搵個位匿埋啦。」Jojo道。
肥鈞同Venus最後坐咗喺一張長椅上面，我見肥鈞同Venus佢地無講嘢，尷尷尬尬咁。
我同Jojo匿埋咗喺長椅對面嘅草叢後面，踎喺度，偷聽佢地講嘢。
肥鈞打開過蛋糕盒，蛋糕上面寫住「Venus生日快樂」，周圍仲有好多個細細個嘅心心。
「嘩，好靚呀，你自己整架?」Venus道。
「係呀…我專登去上堂學架。」
「多謝你呀。」
「嘩，仲要自己整埋蛋糕，咁鬼揼本嘅。」我輕聲道。
「哈，你估好似你咁咩。」Jojo笑我。
「我唔係sell呢啲嘅，睇嘢啦嘈。」
肥鈞此時喺褲袋拎咗幾支蠟燭出嚟，點上火，插喺個蛋糕上面。
「嚟啦，合埋眼許個願。」
「好。」Venus輕輕笑一笑，合上眼。
正當Venus合埋眼嘅時候，我見到肥鈞又想哄埋去Venus度，但又唔夠膽縮返埋。
「嗚呀，佢係咪想錫埋去Venus度呀。」我道。
「我睇應該係啦…好sweet…好緊張呀。」Jojo道。
轉眼間，Venus已經許完願，肥鈞都係無錫埋去，但係個頭就哄咗埋去Venus度。
剛開眼嘅Venus見到肥鈞咁近，錯一錯愕。
「做咩呀?」Venus問。
「無，無嘢…嚟，食蛋糕先。」肥鈞慌慌張張咁拎兩隻叉出嚟。
「唔係咁樣就放棄呀嘛，上啦肥鈞!!」好兄弟喺咁重要嘅時刻，我一定撐佢。
「我都好想睇佢成功呀。」Jojo道。
過咗五分鍾，佢地食完個蛋糕之後，兩個坐咗喺度，唔知講咩好。
踎咗係地下有成三個字，我同Jojo對腳都好鬼攰，所以我地互相捉住大家嘅手臂做支撐。
「嚟料未呀仆街!!」我忍唔住低聲咆哮咗一聲。
肥鈞唔知係咪聽到我嘅無聲呼喚，終於有所行動。
「Venus呀…我仲有樣禮物送俾你呀，不如你瞇埋眼多次吖。」
「仲有?咁好嘅你，好啦。」Venus笑一笑，再次瞇埋眼。
「嗚呀，橋唔怕舊，最緊要受呀，去啦!!」我好緊張，大大力咁揸住Jojo隻手。
當Venus瞇埋眼之後，肥鈞又試再慢慢咁哄埋去。
我同Jojo都緊張到就嚟透唔到氣。
肥鈞慢慢，慢慢咁哄埋去。
Venus feel到肥鈞哄埋去，雖然佢微微咁縮咗一縮，但到最後都係繼續Hold住唔郁。
咀了!!!佢地兩個咀了!!!肥鈞得米啦，就好似套戲咁，肥仔終於溝到女神啦!
「Yes!!」我振臂一呼。
唔知係咪我激動得濟，隻手chok一chok，搞到我同Jojo一齊趺低。
「唉吔。」Jojo趺底。
呢下唉吔太大聲，搞到肥鈞同Venus都聽到，即刻縮開咗，咗望右望。
「仆街，俾人發現啦，快啲走啦。」我叫Jojo。
我同Jojo一路走一路走，由於天黑附近又多樹嘅關係，停低時已經唔知走咗去邊。
「嘩，好鬼攰呀。」Jojo索哂氣。
「叫你平時做多啲運動架啦肥妹。」
「收檔啦你。」
我望住佢，突然諗起一樣嘢。
「喂，Jojo。」
「點呀死嘢。」
「依家咁樣，我地入面得返你未拍拖咋喎。」我一邊奸笑一邊講。
「車，我不嬲都話我唔care呢啲嘢架喎，你攻擊唔到我架。」
「係咩，但我見你今日睇戲同埋啱啱肥鈞嗰時，你都勁緊張，我就唔信你一啲感覺都無啦。」
聽到我咁講，Jojo沉默了。
我同佢慢慢咁向灣仔方向咁行返出維園，同佢行咗一陣，Jojo終於出聲。
「喂，認真問你。」
「咩?」
「我係咪一個靚女?哈哈哈。」
我本身發緊夢，聽到佢咁問，當堂醒哂。
「咩料，你呢個問題一啲都唔認真。」
「妖，我真係認真。」
「有咩原因令到你要問我呢個問題?」
「車，算。」Jojo一臉無奈。
「因為呢，問得呢個問題，多數都係想人答係。」我笑道。
「我無意思架，唔好諗太多，我淨係想知咋。」
「其實我好驚答你呢個問題…」
「驚咩?驚我打爆你個頭?」Jojo作勢嘅打我咁樣。
「你真係要我認真答嘅話咁我答你啦。」我立即縮開，諗咗諗，然後講。
「Hehe，好期待你會答我乜。」
「你ok嘅，不過瘦少少會好啲囉。」
「車!!!!!!!!!!呢樣嘢我都改變唔到嘅…」
「唔係架，你好似套戲咁，搵嗰套衫著，你就有機架啦。」
「你都識講套戲，邊有可能，傻仔。」
「乜真係無男仔追過你咩，我唔信。」我問。
「唔知呢，哈哈。」
「咁你有冇鍾意過男仔?」
「有定冇我都唔會話你知，Hehe。」
「拜拜…今次真係收得線。」
送到佢返屋企之後，我又再一個人搭地鐵。
Shirley一早就休息瞓咗，我望住佢個Whatsapp，今日我幾乎無同佢交流過。
過咗陣，部電話就彈咗隻麥兜出嚟，上面係一幅戲中女主角嘅圖。
「Hey，送你一張女神圖，哈哈。」
「正。」我笑咗一笑，然後覆佢。
跟住我用電話好快咁搵咗一張嗰套戲男主角嘅相，CAP低SD俾佢。
「呢個男仔鍾意你，快啲接受佢。」
「哈哈，叫佢過嚟追我吖，我會接受架。」
我又再笑了一笑，望住佢Facebook個名，我諗起Shirley嘅說話。
「你呀，可能係佢第一個男仔fd嚟架。」
其實…如果Jojo識多啲男仔嘅話，以佢嘅性格，我覺得佢其實會有好多人追。