自修室，學界既蘭桂坊: 18

送完Jojo返屋企之後，我又再獨自回家，當我搭緊地鐵嘅時候，我拎住部電話，打開Shirley個Facebook，見到一張成班人嘅合照，相信係佢今日Reu嘅相，我望住張相，入面真係無Andy喺度，之不過喺張相入面啲仔個個都又高又型。

點解Shirley會揀我?

我亦都喺度諗，萬一喺呢張相入面，是但有一個想溝佢嘅話，我都唔會夠佢揪。

我再唔去馬，Shirley遲早就會俾人搶走。

返到屋企，都成十一點，我見到老媽子自己一個坐咗喺梳化，應該係等我門。





當我入到屋時，佢就入廚房拎咗碗湯出嚟。
「阿仔，仲暖暖地，快啲飲咗佢。」

我接過碗湯，頭先剩係食咗碗粥，仲未夠飽，我兩三下手勢就飲完碗湯。
喺我飲湯之際，我發現老媽子係咁喺我身邊索嚟索去。

「做咩呀?」我問。
「阿仔，做乜呢排日日都咁夜先返，我擔心你係咪群埋啲壞人。」

「哦，唔係…我去自修室呀。」




「自修室?姐係成班學生喺度一齊溫書嗰啲地方?」
「係呀，我就係去嗰度。」
「阿仔，你做咩呢排生性咗咁多，一定唔係剩係溫書咁簡單。」

老媽子諗咗陣，突然行埋嚟雙手搭住我膊頭，哄到勁埋望實我對眼咁同我講。
「我知啦…阿仔，你一定係去識女仔!!」

無啦啦俾阿媽一眼睇穿咗，我無言以對。
「男人老狗無理由會無啦啦發奮嘅，一定係因為有咗個鍾意嘅女仔。」





「依家睇電視成日講宅男，啲學者成日做研究話宅男嘅形成係關於家庭問題，我就話佢低能。佢地係因為無一個想追嘅女仔先會做宅男姐。當年你老豆就係為咗追我，所以先至發奮圖強，努力做嘢。之不過無啦，自從佢追到我之後，佢就無哂動力，懶哂。」

老媽子輕輕嘆一口氣。

「阿仔，努力，阿媽支持你。」

「阿媽，你真係唔擔心我去識女仔咩?」嘅然都俾佢睇穿咗，我都無謂再隱瞞。

「咪玩啦，你再唔去識女仔，仲日日玩嗰啲女仔模型，我就真係擔心你啦，唔講啦，我知道你唔係學壞就得，唉好鬼眼瞓。」

講完，老媽子就返入房瞓。

老媽子講得無錯，自從去咗自修室之後，我同肥鈞都發奮咗，唔再係以前嗰個剩係識打機嘅宅男。

車厘龜，你到底肯表白未姐。





刷完牙，我就上床準備瞓，我灘喺張床咗典右典，又想瞓又好似瞓唔著，我就拎部電話出嚟碌。

之前碌咗太多次Shirley嘅facebook，要睇嘅嘢我都已經睇過哂，一路碌住Shirley嘅fb，我就不期然咁想搵佢。

「你返到屋企未呀，瞓未呀?」我Whatsapp佢。
嗞…嗞…電話震。
「喂?我返咗屋企好耐啦，你又唔搵我，我以為你瞓咗啦。」Shirley道。

我聽到對面好靜，應該真係返咗屋企，上埋床。
「我諗住你玩緊，唔阻你嘛。」
「嘻嘻，唔會啦。」
「係呢，你地嗰個聯校活動係咩嚟架。」我諗住打開話題。
「聯校Christmas ball囉，年年都有一次架，好好玩架。」





Christmas Ball，我學校都有，中四嗰陣第一年可以參加，俾肥鈞昆我去咗一次，俾咗成舊幾水去食嘢同罰企，肥鈞仲on9，企企下直頭拎部PSP出嚟打，毒撚到。
 
「咁你上年同邊個跳呀?」我問。
「哈，你吃醋呀?」
「我八卦下姐…」
「我OC嚟架咋，即係工作人員，負責叫人買花咋，無同人跳架我。」

聽到咁樣，個心都安樂啲。

我同Shirley都瞓喺床，夜晚大家講嘢都好細聲，聽住部電話，佢就好似喺我隔離咁。

我見無嘢講，就同佢講咗今日同Jojo食飯遇到個失憶老闆娘嘅事。
「咁個老闆娘應該真係好慘…」Shirley道。
「嗯…」
「係喎，你今日同Jojo撐枱腳喎，有咩感想呀?」




「無咩感想，不過佢個人幾搞笑。」
「係呀，你唔好睇佢平時cool cool地唔講嘢呀，你要撩下佢，當你同佢熟咗之後，佢就會係咁搞gag架啦，好好笑架。」

「Jojo拍過拖未?」我無啦啦好有興趣知呢樣嘢，於是就問。
「以我所知應該就未，佢不嬲都係唔玩啲聯誼活動，我地又女校，所以佢其實男仔都唔識多個架。」
「你呀，可能係佢第一個男仔fd嚟架。」
「係呀?咁我咪好好彩?」
「唔知呢，咁你又拍過拖未呀，嘻嘻。」Shirley笑道。

Shirley一問呢個問題，就搞到我心癢癢。前兩日先同你鍚完，依家就問我拍拖啲嘢，想點姐!!!

就係咁，我就同Shirley傾電話傾到三點鍾，佢把聲好溫柔，愈夜，佢就愈細聲，到最後我都唔記得咗係邊個瞓著先了。

今朝一起身，已經七點九。
仆街，琴晚太夜瞓，唔知醒。




我極速刷牙洗面換校服，落到樓，已經七點十。
八點三就打鍾，唉，遲鳩緊，算數，慢慢嚟，仲可以去麥記食個早餐。

「我最撚憎人咩都遲過人架啦!!」一把咆哮聲。