自修室，學界既蘭桂坊: 17

去到八點幾，正當我諗住會成班人一齊去食飯嘅時候，Shirley同Venus一齊執哂嘢，準備走。

「你地去邊呀?」我問。
「我地今日同上年搞聯校活動啲人REU呀，會喺銅鑼灣食餐飯。」

REU? 聯校活動?
我記得Jojo講過，佢同Andy係玩聯校活動識。
「咁…Andy…」我望住Shirley。
「放心啦，佢今日唔會嚟架。」Shirley笑一笑道。
「你食完我過嚟送你返屋企吖?」




「唔洗啦，咁夜，聽日又要返學，我ok架啦。」
「咁好啦。」
我送佢落到去自修室樓下，同佢講拜拜時，佢錫咗我塊面一啖。

我望住佢個背影，心諗，唉，其實我係想打鐵襯熱，表白姐。
望住佢地兩個走，個心硬係唔安落咁。

我起身望望肥鈞嗰邊，Angus同佢對面條女已經走咗，剩返肥鈞一個，我走去問佢食唔食飯，佢話佢爆緊seed，唔食啦。

無啦啦啲人走哂，又係剩返我同Jojo。




我返番埋Jojo個位，打開電話。
「麥兜呀，食飯?」
「唔食飯呀車厘龜!!!」
「妖，食粥呀嘛，知啦，I mean晚飯呀。」
「醒目!」跟住一大堆xd。

我同Jojo今次執好哂書包，然後直接走去食飯。

又試去返嗰間粥鋪，好奇怪，間粥鋪都係無人，得個老闆娘。
前幾日先嚟過，間粥鋪又應該無乜人幫襯，仲諗住個老闆娘會認得我地。




「你好呀老闆娘。」我率先打聲招呼。

之不過，個老闆娘無理我地，係度攪緊佢啲粥。
我同Jojo睇咗陣，佢又係食艇仔粥，我見佢上次啲粥咁鬼淡，穩陣啲，食牛肉粥，就算啲粥無味，都有舊牛肉食下。

好快老闆娘就放低兩碗粥喺我地枱面。
「慢慢食下。」

我食一啖啲粥，真係俾我估中，啲粥淡而無味，肯定又無落鹽。
我食咗幾啖就想放棄，我望住對面嘅Jojo，佢仲係好似無乜嘢咁。

「喂，Jojo。」
「做咩呀?」
「你唔覺得啲粥好淡架咩?」
「覺呀，比我平時食開嘅真係淡咗啲。」




「我仲以為你覺得無問題，嚇死我，不如我地同佢講佢啲粥無落鹽啦。」
當我講完，我就叫咗老闆娘埋嚟，正諗住開口同佢講時，俾佢率先開腔截停咗。

「點呀，啲嘢好唔好食呀，唉…依家愈嚟愈少人嚟呢度食嘢啦，可能係我老啦，煮啲嘢愈嚟愈唔好食…」

又講，上次嚟嗰陣你咪講過囉。
「唔係呀，我覺得幾好吖，如果下次可以落多少少鹽就好啦。」
「乜我唔記得落鹽咩，弊啦弊啦。」老闆娘，即刻走去試下啲粥。
「唉，我真係無記性，我換過碗粥俾你地。」

好奇怪。

過咗陣，佢俾過碗粥我地，今次終於正常返。
「你地兄妹嚟架?」老闆娘問。
正當Jojo想答佢嗰陣時，我搶先答佢。




「係呀，佢係我個妹。」
當我答完嘅時候，Jojo用一個好詫異嘅目光望住我。

「咁夜，你地嗲哋媽咪無煮飯俾你地咩?」
「嗯嗯，佢地今日唔喺屋企，所以我地先落嚟食。」我答。
「依家好少兄妹咁好感情啦喎，竟然會一齊落街食晚飯，下次爸媽再無煮飯嘅話，咪嚟我呢度食嘢囉，慢慢食啦。」

老闆娘講完，就行返去灶頭嗰度執嘢。

我打個眼色俾Jojo，我諗佢都明發生咩事。
好快我地就食完碗粥，同老闆娘道別之後，我就送Jojo返屋企。
「估唔到個老闆娘唔係無記性咁簡單，原來佢真係會失憶。」我道。
「咪咁講v啦你，佢好慘架啦，自己一個又成日唔記得v，一定成日都好迷失咁。」
「我唔係話佢唔慘，只係突然發現覺得好特別姐。」
「不如我地多啲去嗰度食嘢，得閒去探下佢啦。」Jojo道。




「哈，你咁樣係咪姐係間接想約多啲我食飯呀?」
「收皮啦你，信唔信我打爆你個頭吖啦。」
「打爆我個頭?我依家係你呀哥嚟架，肥妹。」

當我講完，我望住佢個樣，又一手搣落佢塊面珠墩度。

「妖!!死變態。」