自修室，學界既蘭桂坊: 14

星期日，我無出街，成日留喺屋企。
我同Shirley Whatsapp不斷，大家當下做緊啲咩，身邊有咩趣事，乜都可以講一餐，我剩係望住部電話，都己經知道到喺電話對面既佢係點既模樣。

成日不斷同佢傾計，好快就到夜晚，大家互相講聲早抖，上床訓教。
我喺床上面掙扎左半分鍾，終於鼓起勇氣，sd多個咀咀emoji比佢。
嗞…嗞…電話震。
「喂?」
「啜~~~，快d訓啦。」
「嗯，你都係呀，啜。」
嗚呀，好MK呀。




但，好爽。

星期一，唔知係咪琴日訓得好甜，我一早就起左身。
一起身，緊係同Shirley講聲早晨先啦，然後就換衫返學。
返到學校，我第一時間就想搵肥鈞，同佢分享返琴日發生既所有事。

之不過，當我一見到佢，佢個樣好似死左老豆咁。
「喂，肥鈞，你知唔知呢，我琴日…」
「唔好同我講。」肥鈞打斷我。
「做咩呀你?」我見肥鈞好奇怪，就問佢。




「我…我衰左啦。」
「你衰左?，你咩野衰左呀?」
「屌你老味，你係咪要我講得咁白呀! Venus比Marco溝左啦，我無啦，我玩完啦…」

下…點解會咁。
「你地果日唔係去左唱K咩，果陣發生左咩事?」
「咪就係唱K果陣出事囉…」

「唉，我呢d毒撚，第一次去唱K咩都唔識，我見佢地係咁點歌，咁我諗住等佢地點完先啦，但當我拎住個remote果時，佢地個個就望住我，我又唔識噤，搞到我緊張到手都震撚哂…仲有呀，你知啦我剩係聽日文歌唔聽廣東歌既，入面d歌我無隻識，結果…」





「結果呢?」
「結果我咪剩係坐喺間K房入面望住Marco對住Venus唱情歌，坐左四粒鍾咩都做唔到囉。」

唉…咁樣又真係幾慘。
「我成日咩都無做過，我都無面再去搵佢，跟住我仲眼白白望住Marco送佢返屋企，跟住既事，我己經唔想再諗起去啦…」肥鈞個樣愈講愈崩潰。

「阿楠，我諗…我諗我以後，都唔會再去同你去灣修啦。我唔想再見到佢地兩個…」

講完，肥鈞喊左，挨左落我度。
我明既，自己鍾意既女仔同第二個男仔一齊，一定係會超級難受。
因為我自己都經歷過，只係我比較好彩。

「你咁鍾意佢，你真係就咁就諗住放棄?」我問。
呢個問題好大膽，之但係，我就係成功既例子。





「搞到咁，仲有彎轉咩。」喊到口水鼻涕都出哂黎既肥鈞昂高頭問我。
「我幫唔到你姐，但我諗應該有人幫到你既，如果係溝女既話。」

我相信肥鈞都諗到，呢個人就係Angus。

放學後，肥鈞就約左Angus喺車站等，然後肥鈞將所有野一五一十咁講哂比佢知。

「我就咁聽完你講，覺得好閒咋啵。」Angus道。
「你要溝女，就預左同人爭，唔洗爭，你溝左都唔會珍惜，好快就散，好似我咁。」
Angus輕輕嘆一口氣。
「我已經拍過廿八次拖，我永遠溝親d女都唔洗同人爭，可能有人爭既，不過我唔知咁啦，因為我永遠都係一擊即中，所以，我從來都唔識珍惜。」

「嘩…」如果呢度唔係大街大巷，我諗我同肥鈞已經跪左喺度參拜佢。

「喺自修室，你要容易d溝到女，外表並唔係最重要，最重要既，係要顯得你有才華。」




「才華?」
「去得自修室既女，點都有返些小想讀書既自覺既，如果唔係，佢地上5P，出夜街識仔唔好?所以，佢地暗啞底其實係鍾意有學識既男仔。」
「當佢有野唔識既時候，你好輕易咁解決佢唔識既難題時，佢就會覺得你好型，好MAN。」Angus續道。
「咁我依家姐係要用咩方法去追Venus?」肥鈞問。

「你繼續去諗用咩方法去追佢既話，你呢世都唔會追到佢，因為講諗方法，你點都唔會夠果個MK黎。」Angus斬釘截鐵咁講。

「你依家要做既野係，增值自己，提升自己既個人魅力，到時你唔洗出力溝佢，佢都會自己走埋黎溝返你轉頭。」
「呢樣野係好考你既恆心，我啱啱講既野我幾年前就同你呀哥講過，可惜佢就係堅持唔住，所以到依家都未有女。」

肥鈞聽完Angus既訓話，若有所思，又好似明又好似唔明咁。
「簡單d講，你依家第一樣野要做既係，搵一科你同Venus都有讀既科，然後你要比佢叻十萬八千倍。」Angus道。

「知唔知咩方法最容易又最直接可以得到女人既芳心?」
「係咩呀?」我同肥鈞異口同聲。




「就係英雄救美。」